திண்டுக்கல்
விவசாயிகளுக்கு அளித்த வாக்குறுதிகளை நிறைவேற்றக் கோரியும், மேகதாது அணை கட்டப்படுவதைத் தடுக்கத் தவறிய தவெக அரசைக் கண்டித்தும், அதிமுக சார்பில் திண்டுக்கல்லில் நடைபெற்ற மாபெரும் கண்டன ஆர்ப்பாட்டத்தில் முன்னாள் அமைச்சர் திண்டுக்கல் சீனிவாசன் மாநில அரசை மிகக் கடுமையாக விமர்சித்துள்ளார்.
“சட்டசபை கேவலமாக நடக்கிறது – சர்வாதிகாரம்”:
திண்டுக்கல் மேற்கு மாவட்டச் செயலாளர் வி.பி.பரமசிவம் முன்னிலையில் நடைபெற்ற இந்த ஆர்ப்பாட்டத்திற்குத் தலைமை தாங்கிய முன்னாள் அமைச்சர் திண்டுக்கல் சீனிவாசன், ஆர்ப்பாட்ட முடிவில் செய்தியாளர்களைச் சந்தித்தார். அப்போது பேசிய அவர், “சட்டசபையில் நாங்கள் இருக்கும்போது முழுமையான ஜனநாயகம் இருந்தது. ஆனால் இப்போது ‘ஜனநாயகன்’ என்று பெயர் வைத்திருக்கிற நடிகர் கட்சியில் துளியும் ஜனநாயகம் கிடையாது; சர்வாதிகாரம்தான் நடந்துகொண்டு இருக்கிறது. தற்போதைய மோசமான சூழ்நிலையில், சட்டப்பேரவை மிகவும் கேவலமாக நடந்துகொண்டு இருக்கிறது. ஒரு லட்சம் கோடி வெளிநாட்டு ஒப்பந்தங்கள் என்று கூறி மக்களைத் தொடர்ந்து ஏமாற்றுகிறார்கள்,” என்று குற்றம் சாட்டினார்.
அமைச்சர்கள் ஆதவ் அர்ஜுனா, மரிய வில்சனுக்குக் கண்டனம்:
தொடர்ந்து பேசிய அவர், “நாங்கள்தான் எம்.ஜி.ஆர் ஆட்சியைக் கொடுக்கிறோம் என அமைச்சர் ஆதவ் அர்ஜுனா கூறுவதை விட வெட்கக்கேடு வேறு எதுவுமே இல்லை. நிதியமைச்சர் மரிய வில்சன் ஆணவத்தின் உச்சியில் இருக்கிறார். ‘நான் இப்படித்தான் இருப்பேன்’ என்று மிகவும் திமிராகப் பேசுகிறார். அதிமுக ஆட்சிதான் நடக்கிறது என்றால், அமைச்சர் ஆதவ் அர்ஜுனா உடனடியாக ராஜினாமா செய்துவிட்டுப் போய்விடலாம். இன்னும் 6 மாதம் நேரம் கொடுங்கள் எனக் கேட்கலாம். அதை விட்டுவிட்டு எல்லாம் எங்களுக்குத் தெரியும் என்பது மாதிரி பேசுவது முற்றிலும் தவறு,” என்று கடுமையாகச் சாடினார்.
“விவசாயிகளின் வயிற்றில் அடிக்காதீர்கள்”:
மேலும் அவர் கூறுகையில், “நாங்கள் எம்.ஜி.ஆர்., ஜெயலலிதாவின் பிள்ளைகள். எடப்பாடி பழனிசாமி தலைமையில் அதிமுக மிகச் சிறப்பாகச் செயல்படுகிறது. அரசிடம் நிதி இல்லை என்று தெரிந்தே தேர்தல் நேரத்தில் மக்களுக்குப் பொய்யான வாக்குறுதிகளைக் கொடுத்துள்ளார்கள். விவசாயிகளின் வாழ்க்கையிலும், அவர்களின் வயிற்றிலும் அடிக்காதீர்கள்; கொடுத்த வாக்குறுதிகளை உடனடியாக நிறைவேற்றுங்கள் என்று வலியுறுத்தித்தான் அதிமுக பொதுச்செயலாளர் எடப்பாடி பழனிசாமி இந்த மாநிலம் தழுவிய ஆர்ப்பாட்டத்தை அறிவித்தார்,” என்று திட்டவட்டமாகத் தெரிவித்தார்.
#DindigulSrinivasan #AIADMK #EdappadiPalaniswami #EPS #TVKGovernment #ChiefMinisterVijay #AadhavArjuna #MariaWilson #TNAssembly #Mekedatu #TNPolitics #TamilNaduNews #Dindigul #ViralNewsTN #TrendingTN #LatestNewsTN #TNNewsUpdates
