வியாழக்கிழமை அதிகாலை நகரத்தின் ‘சென். ஜேம்ஸ் டவுன்’ (St. James Town) பகுதியில் இடம்பெற்ற கொள்ளை சம்பவம் தொடர்பான அழைப்புக்குச் சென்ற ரொறன்ரோ பொலிஸ் அதிகாரி ஒருவர் சுடப்பட்டுள்ளதாகப் பொலிஸார் தெரிவித்துள்ளனர்.
பொலிஸாரின் கூற்றுப்படி, அதிகாலை 3:20 மணியளவில் திருடப்பட்ட ஈ-பைக் (e-bike) குறித்து விசாரிக்கப் பொலிஸார் அழைக்கப்பட்டனர். அதனைத் தொடர்ந்து ‘புளூர்’ (Bloor) மற்றும் ‘ஷெர்போர்ன்’ (Sherbourne) வீதிகள் சந்திக்கும் பகுதியில் சந்தேக நபரை அவர்கள் கண்டறிந்தனர்.
சந்தேக நபரால் அதிகாரி ஒருவர் சுடப்பட்டதாகவும், அவர் தீவிரமான ஆனால் உயிருக்கு ஆபத்தில்லாத காயங்களுடன் விரைவாக மருத்துவமனைக்குக் கொண்டு செல்லப்பட்டதாகவும் பொலிஸார் தெரிவித்தனர்.
சந்தேக நபர் கைது செய்யப்பட்டுள்ளதுடன், அவரிடமிருந்த துப்பாக்கியும் பறிமுதல் செய்யப்பட்டுள்ளது.
சம்பவம் நடந்த வீதியின் ஒரு பகுதி பொலிஸ் பாதுகாப்பு நாடாவினால் (Police tape) தடுக்கப்பட்டுள்ளதுடன், சாலையில் ஈ-பைக் ஒன்று விழுந்து கிடப்பதைக் காணக்கூடியதாக உள்ளது.
தற்போது ஷெர்போர்ன் மற்றும் பார்லிமென்ட் வீதிகளுக்கு இடையிலான புளூர் வீதி இரு திசைகளிலும் மூடப்பட்டுள்ளது.
இது தொடர்பான மேலதிக விசாரணைகள் தொடர்ந்து நடைபெற்று வருவதாகப் பொலிஸார் தெரிவித்துள்ளனர்.
