சென்னை

மத்திய அரசு கொண்டுவரவுள்ள வெளிநாட்டுப் பங்களிப்பு (ஒழுங்குமுறை) திருத்த மசோதா 2026 (FCRA Amendment Bill, 2026)-ஐ திரும்பப் பெற வலியுறுத்தித் தமிழ்நாடு சட்டப்பேரவையில் ஒருமனதாக நிறைவேற்றப்பட்ட தீர்மானத்தை மதிமுக முதன்மைச் செயலாளரும், நாடாளுமன்ற உறுப்பினருமான துரை வைகோ மனதார வரவேற்றுள்ளார்.

கல்வி, சுகாதாரம், சமூகநலம் உள்ளிட்ட துறைகளில் நாட்டிற்குப் பெரும் பங்களிப்பை வழங்கி வரும் சிறுபான்மையினரால் நடத்தப்படும் தொண்டு நிறுவனங்கள், சமூக ரீதியாகப் பின்தங்கிய மக்களின் வாழ்க்கைத் தரத்தை உயர்த்துவதில் முக்கியப் பங்காற்றுகின்றன. இவற்றின் செயல்பாடுகளுக்கு இடையூறு ஏற்படுத்தும் வகையில் இந்த FCRA திருத்த மசோதா கொண்டுவரப்படுவது மிகவும் கவலைக்குரியது. இதனால் தொண்டு நிறுவனங்கள் மூலம் பலனடையும் ஏழை, எளிய மற்றும் ஒடுக்கப்பட்ட மக்கள் நேரடியாகப் பாதிக்கப்படுவார்கள் என்று அவர் சுட்டிக்காட்டியுள்ளார்.

இந்த விவகாரம் தொடர்பாகத் துரை வைகோ தொடர்ந்து குரல் கொடுத்து வருகிறார். கடந்த ஆகஸ்ட் 4-ஆம் தேதி நடைபெற்ற இந்தியா கூட்டணியின் நாடாளுமன்ற உறுப்பினர்கள் கூட்டத்தில், இந்த மசோதாவைக் கடுமையாக எதிர்த்து நாடாளுமன்றத்தில் விவாதிக்க வேண்டும் எனத் தனது கோரிக்கையை அவர் வலியுறுத்தியிருந்தார்.

மேலும், ஆகஸ்ட் 8-ஆம் தேதி கலைவாணர் அரங்கத்தில் முதலமைச்சர் ஜோசப் விஜய் தலைமையில் நடைபெற்ற தமிழ்நாடு நாடாளுமன்ற உறுப்பினர்களின் கலந்தாய்வுக் கூட்டத்திலும் இந்த விவகாரத்தைத் துரை வைகோ எழுப்பினார். சிறுபான்மை மக்கள் முதலமைச்சர் மீது வைத்துள்ள நம்பிக்கையைச் சுட்டிக்காட்டி அவர் பேசினார். அப்போது, சிறுபான்மை மக்களின் நலன்களுக்கு எதிரான எந்த நடவடிக்கையையும் தமிழ்நாடு அரசு ஏற்காது என்றும், இது குறித்துச் சட்டப்பேரவையில் தனித்தீர்மானம் கொண்டு வரப்படும் என்றும் முதலமைச்சர் விஜய் அன்றைய கூட்டத்திலேயே உறுதியளித்திருந்தார். அதன்படி தற்போது தீர்மானம் நிறைவேற்றப்பட்டுள்ளதை மதிமுக வரவேற்றுள்ளது.

#DuraiVaiko #MDMK #FCRAAmendmentBill #TNAssembly #ChiefMinisterVijay #TVKGovernment #TamilNaduNews #Chennai #TNPolitics #ViralNewsTN #TrendingTN #LatestNewsTN #TNNewsUpdates