கனடியப் பிரதமர் மார்க் கார்னிக்கு (Mark Carney) கொலை மிரட்டல் விடுத்த குற்றச்சாட்டின் பேரில் மொன்றியலைச் (Montreal) சேர்ந்த நபர் ஒருவர் கைது செய்யப்பட்டுள்ளார்.
51 வயதான மார்க் போர்லியர் (Marc Porlier) என்பவர் ஆகஸ்ட் 8 அன்று மொன்றியல் நீதிமன்றத்தில் ஆஜர்படுத்தப்பட்டார்.
ராயல் கனடியன் மவுண்டட் பொலிஸின் (RCMP) தகவல்படி, குற்றவியல் சட்டத்தின் 264.1 பிரிவின் கீழ், ஒருவருக்கு மரணம் அல்லது கடுமையான உடற்காயத்தை விளைவிக்கும் வகையில் மிரட்டல் விடுத்ததாக அவர் மீது குற்றம் சாட்டப்பட்டுள்ளது.
“செனட்டர் ஒருவர் உட்பட பலருக்கு அனுப்பப்பட்ட மின்னஞ்சல் (Email) வழியே அவர் இந்த மிரட்டல் கருத்துகளைத் தெரிவித்ததாகக் கூறப்படுகிறது” என்று காவல்துறையினர் குறிப்பிட்டுள்ளனர்.
ஆகஸ்ட் 5 அன்று தொடங்கப்பட்ட விசாரணையைத் தொடர்ந்து, போர்லியர் கைது செய்யப்பட்டதாகக் காவல்துறையினர் விளக்கமளித்தனர்.
“ஒருவரின் பாதுகாப்பு உணர்வைப் பாதிக்கும் எந்தவொரு மிரட்டலையும் RCMP தீவிரமாகக் கருதுகிறது” என்று கூறியுள்ள காவல்துறையினர், “வன்முறை சார்ந்த அறிக்கைகள் சகித்துக் கொள்ளப்பட மாட்டாது. இதில் ஈடுபடுபவர்கள் கடுமையான தண்டனைகளுடன் கூடிய குற்றவியல் வழக்குகளை எதிர்கொள்ள நேரிடும். இத்தகைய குற்றங்களைத் தடுக்க மக்கள் இதுபோன்ற சம்பவங்களைப் புகாரளிக்க வேண்டும்” என்றும் வலியுறுத்தினர்.
சட்டவிரோதச் செயல்கள் குறித்த தகவல்கள் ஏதேனும் தெரிந்தால், காவல்துறையினரை 514-939-8300 அல்லது 1-800-771-5401 என்ற எண்களில் தொடர்பு கொள்ளுமாறு கேட்டுக்கொள்ளப்படுகிறார்கள்.
மேலும், பொதுமக்கள் தேசிய பாதுகாப்பு தகவல் நெட்வொர்க்கை (National Security Information Network) 1-800-420-5805 என்ற எண்ணில் அழைக்கலாம் அல்லது தங்களின் உள்ளூர் காவல் நிலையத்தைத் தொடர்பு கொண்டு அறியத் தரலாம்.
