பாதுகாப்பான, சீரான மற்றும் ஒழுங்குமுறையான புலம்பெயர்வுக்கான உலகளாவிய உடன்படிக்கையின் பிரகாரம் 2026 – 2028 ஆண்டு காலப்பகுதிக்கான இலங்கையின் தேசிய செயற்பாட்டுத் திட்டத்தை உருவாக்குவதற்கு அமைச்சரவை அனுமதி வழங்கியுள்ளது.

அரசாங்கத்தகவல் திணைக்களத்தில் செவ்வாய்க்கிழமை (04) நடைபெற்ற அமைச்சரவை தீர்மானங்களை அறிவிக்கும் ஊடகவியலாளர் சந்திப்பில் கலந்து கொண்டபோது அமைச்சரவை பேச்சளரும் அமைச்சருமான நளிந்த ஜயதிஸ்ஸ மேற்கண்ட அறிவிப்பை வெளியிட்டார்.

குறித்த அறிவிப்பில் அவர் மேலும் தெரிவிக்கையில்,

‘பாதுகாப்பான, சீரான மற்றும் ஒழுங்குமுறையான புலம்பெயர்வுக்கான உலகளாவிய உடன்படிக்கை (The Global Compact for Safe, Orderly and Regular Migration) என்பது சர்வதேச புலம்பெயர்வில் அனைத்துப் பரிமாணங்களையும் முழுமையான விதத்தில் அமைந்த சர்வதேச ரீதியாகக் கலந்துரையாடப்பட்டுள்ள ஐக்கிய நாடுகள் சபையின் முதலாவது செயற்கருவியாகும்.

குறித்த உடன்படிக்கை, இலங்கை அரசு 2018 ஆம் ஆண்டு இடம்பெற்ற ஐக்கிய நாடுகள் சபையின் பொதுச் சபைக் கூட்டத்தொடரில் ஏற்றுக் கொண்டுள்ளது.

இலங்கைத் தொழிலாளர்களுக்கு வெளிநாட்டு தொழில் வாய்ப்புக்களை வழங்குவதற்கு மேலதிகமாக, புலம்பெயர் செயன்முறையில் திறன் விருத்தியை அதிகரிப்பதன் மூலம் வெளிநாட்டு செலாவணியை ஈட்டுவதற்கு பங்களித்தல் போன்ற நேர்மயமான விளைவுகளை மேலும் அதிகரிப்பதற்கு பாதுகாப்பான, சீரான மற்றும் ஒழுங்குமுறையான புலம்பெயர்வுக்கான உலகளாவிய உடன்படிக்கை மூலம் தேவையான வழிகாட்டல்கள் வழங்கப்பட்டுள்ளன.

அத்துடன், மனித வியாபாரம் மற்றும் சட்ட விரோதமாக ஆட்களை ஏற்றிச் செல்லல் போன்ற புலம்பெயர்வுடன் தொடர்புடைய முறைகேடுகளைத் தடுப்பதற்கும் ஏதுவாக அமையும். குறித்த உடன்படிக்கையை இலங்கையில் அமுல்படுத்துவதற்கு அப்போதைய வெளிவிவகார அமைச்சு மற்றும் தொழில் அமைச்சு மற்றும் வெளிநாட்டு வேலைவாய்ப்புக்கள் அமைச்சின் இணை ஏற்பாட்டின் கீழ் 2021 ஆம் ஆண்டில் செயற்பாட்டுக் குழுவொன்று நியமிக்கப்பட்டுள்ளது.

இக்குழுவால் 2022 ஆம் ஆண்டில் இலங்கையில் தேசிய செயற்பாட்டுத் திட்டம் தயாரிக்கப்பட்டுள்ளது. ஆனாலும், எமது நாட்டில் ஏற்பட்டுள்ள பொருளாதார நெருக்கடி காரணமாக குறித்த செயற்பாட்டுத் திட்டத்தை அமுல்படுத்த முடியாமல் போனதுடன், இக்குழு 2025 ஆம் ஆண்டில் மீண்டும் மீள்கட்டமைக்கப்பட்டுள்ளது.

இக்குழுவால் அனைத்துத் தரப்பினர்களின் கருத்துக்களைப் பெற்றுக்கொண்டு 2026 – 2028 ஆண்டு காலப்பகுதிக்கான பாதுகாப்பான, சீரான மற்றும் ஒழுங்குமுறையான புலம்பெயர்வுக்கான உலகளாவிய உடன்படிக்கையை அமுல்படுத்துவதற்கான திட்டமொன்று தயாரிக்கப்பட்டுள்ளது. அதற்கமைய, வெளிவிவகார, வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் சமர்ப்பித்துள்ள யோசனைக்கு அமைச்சரவை அங்கீகாரம் வழங்கியுள்ளது என்றார்.