பிராம்ப்டன் விபத்து நடந்த இடத்தில் தீயணைப்பு வீரர் மீது மோதுவது போல் சென்ற ஓட்டுநர் மீது குற்றச்சாட்டு

பிராம்ப்டன் (Brampton) நகரில் விபத்து நடந்த இடமொன்றில், தீயணைப்பு வீரர் ஒருவர் மீது மோதுவது போல் சென்று, காவல்துறையின் ரோந்து வாகனத்தின் (Police cruiser) மீது பிக்கப் ரக ட்ரக் (Pickup truck) வண்டியை மோதிய ஓட்டுநர் மீது பீல் பிராந்திய காவல்துறை (Peel Regional Police) குற்றம் சாட்டியுள்ளது.

இந்தச் சம்பவம் கடந்த ஜூன் 27 அன்று கென்னடி வீதி (Kennedy Road) மற்றும் சாண்டல்வுட் பார்க்வே (Sandalwood Parkway) பகுதிக்கு அருகில் நிகழ்ந்துள்ளது.

காவல்துறை வெளியிட்டுள்ள வீடியோவில், தீயணைப்பு வாகனங்கள் மற்றும் பிற அவசர உதவிக் வாகனங்களால் மறிக்கப்பட்டிருந்த வீதிச் சந்திப்பிற்குள் அந்த ட்ரக் வண்டி நுழைவதைக் காண முடிகிறது. அந்த பிக்கப் வண்டி காவல்துறையின் ரோந்து வாகனத்தின் மீது மோதுவதற்கு முன்னர், அங்கிருந்த தீயணைப்பு வீரர் ஒருவர் அதன் பாதையிலிருந்து விலகி குதிக்க வேண்டிய கட்டாயம் ஏற்பட்டுள்ளது.

இச்சம்பவத்தில் காயங்கள் எதுவும் ஏற்படவில்லை எனப் பதிவாகியுள்ளதுடன், ஓட்டுநரும் சம்பவ இடத்திலேயே தங்கியிருந்தார்.

மது அருந்தியமை இதற்குக் காரணியாக இருக்காது என நம்புவதாகவும், எவரையும் காயப்படுத்தும் நோக்கம் ஓட்டுநருக்கு இருந்ததற்கான எந்தவொரு அறிகுறியும் இல்லை எனவும் காவல்துறை தெரிவித்துள்ளது.

வயது முதிர்ந்த ஒருவர் என காவல்துறையினரால் விவரிக்கப்படும் அந்த ஓட்டுநர் மீது, அலட்சியமாக வாகனத்தை இயக்கியதாகக் (Careless driving) குற்றம் சாட்டப்பட்டுள்ளது.

இது தொடர்பான வீடியோ பின்னூட்டப் பகுதியில் (Comments section) பதிவிடப்பட்டுள்ளது.

இந்தக் குற்றச்சாட்டு நீதிமன்றத்தில் இன்னும் நிரூபிக்கப்படவில்லை. மேலும், குற்றம் சாட்டப்பட்டவர் மீதான குற்றம் நிரூபிக்கப்படும் வரை அவர் நிரபராதியாகவே கருதப்படுவார்