சீன மின்சார வாகனங்களின் (EV) இறக்குமதி தொடர்பான கனடாவின் கொள்கை குறித்து, அந்நாட்டு பிரதமர் மார்க் கார்னி மற்றும் அமெரிக்க அதிபர் டொனால்ட் டிரம்ப் ஆகியோர் விவாதித்த ரகசிய உரையாடல் ஜி7 உச்சிமாநாட்டில் மைக் ஆன் செய்யப்படிருந்ததால் (Hot Mic) தற்செயலாக கசிந்து பரப்பை ஏற்படுத்தியுள்ளது.
உச்சிமாநாட்டின் மதிய உணவு அமர்வுக்கு முன்னதாக இரு தலைவர்களும் பேசிக்கொண்டிருந்த போது இச்சம்பவம் நிகழ்ந்துள்ளது. கனடிய சந்தைக்குள் ஒரு குறிப்பிட்ட எண்ணிக்கையிலான சீனத் தயாரிப்பு மின்சார வாகனங்களை மட்டுமே அனுமதிக்கும் கனடாவின் ஒப்பந்தம் குறித்து டொனால்ட் டிரம்பிடம் பிரதமர் மார்க் கார்னி விளக்குவது அந்த ஆடியோவில் பதிவாகியுள்ளது.
கனடா, சீன மின்சார வாகனங்களின் இறக்குமதியை ஆண்டுக்கு 49,000 வாகனங்களாகக் கட்டுப்படுத்தியுள்ளதாகவும், இது கனடிய வாகனச் சந்தையின் ஒட்டுமொத்த அளவில் மூன்று சதவீதத்திற்கும் குறைவானது என்றும் டிரம்ப்பிடம் கார்னி தெரிவித்துள்ளார்.
“நீங்கள் இதை நிச்சயம் விரும்புவீர்கள் என்று நான் நினைத்தேன்,” என கார்னி அமெரிக்க அதிபரிடம் கூற, அதற்கு டிரம்ப், “அது நல்லது, நான் அதை விரும்புகிறேன்,” என்று பதிலளித்துள்ளார்.
இந்த ஆண்டின் தொடக்கத்தில், கனடாவின் கேனோலா வித்து (Canola seed) உள்ளிட்ட சில முக்கிய ஏற்றுமதிப் பொருட்களுக்கான இறக்குமதி வரியை சீனா குறைப்பதற்குப் பகரமாக, ஒரு குறிப்பிட்ட எண்ணிக்கையிலான சீன மின்சார வாகனங்கள் மீதான இறக்குமதி வரியைக் கனடா குறைக்கும் வர்த்தக ஒப்பந்தம் ஒன்றை மார்க் கார்னி அறிவித்திருந்தார்.
முக்கிய நட்பு நாடுகளுடனான உறவுகளைப் பேணிக்கொண்டு, அதே நேரத்தில் பொருளாதாரப் போட்டி குறித்த கவலைகளுக்கு மத்தியில் கனடா தனது வர்த்தக உறவுகளை விரிவுபடுத்த முயன்று வரும் வேளையில் இந்த உரையாடல் வெளியாகியுள்ளது குறிப்பிடத்தக்கது.
