வான்கூவர்: கனடாவின் வான்கூவர் நகரில் கடந்த 2025 ஆம் ஆண்டு செப்டம்பர் மாதம் நிகழ்ந்த நபர் ஒருவரின் மரணம் (Homicide) தொடர்பாக, 32 வயதுடைய டேவிட் ரிச்சர்ட் மோரின் (David Richard Morin) என்பவருக்கு எதிராக ‘மனிதப்படுகொலை’ (Manslaughter) குற்றச்சாட்டு சுமத்தப்பட்டுள்ளது.

கடந்த 2025 செப்டம்பர் மாதம், கிழக்கு வான்கூவரின் பிரேஸர் வீதி (Fraser Street) மற்றும் கிழக்கு 6 ஆவது அவென்யூ சந்திப்புப் பகுதிக்கு அருகில் உள்ள வீடொன்றில் 54 வயதுடைய மைக்கல் ஸ்மாடு (Michael Smadu) என்பவர் படுகாயமடைந்த நிலையில் கண்டெடுக்கப்பட்டு, பின்னர் சம்பவ இடத்திலேயே உயிரிழந்தார். இக்கொலைச் சம்பவம் தொடர்பான விசாரணைகளின் அடிப்படையில், கடந்த ஜூன் 11 ஆம் திகதி சந்தேகநபரான டேவிட் ரிச்சர்ட் மோரினுக்கு எதிராக உத்தியோகபூர்வமாகக் குற்றச்சாட்டு பதிவு செய்யப்பட்டுள்ளதுடன், அவர் நீதிமன்றத்தில் முன்னிலைப்படுத்தப்பட்ட பின்னர் தொடர்ந்து காவலில் வைக்கப்பட்டுள்ளார்.

முந்தைய குற்றப் பின்னணி

பொலிஸாரின் தகவல்களின்படி, இந்த சந்தேகநபர் கடந்த 2022 ஆம் ஆண்டு வான்கூவர் நகரின் மையப்பகுதியில் உள்ள புகழ்பெற்ற ‘டிம் ஹோர்டன்ஸ்’ (Tim Hortons) உணவகத்தில் நடந்த, சர்வதேச அளவில் பேசப்பட்ட கத்திக்குத்துச் சம்பவத்தில் குற்றவாளியாகக் காணப்பட்ட அதே நபர் என்பது உறுதி செய்யப்பட்டுள்ளது.

அச்சம்பவத்தில், மெக்சிகோவிலிருந்து வான்கூவருக்கு வருகை தந்திருந்த சுற்றுலாப்பயணி ஒருவர், உணவக வரிசையில் நின்றுகொண்டிருந்தபோது எந்தவொரு காரணமுமின்றி திடீரெனக் கத்தியால் குத்தப்பட்டுப் பலத்த காயமடைந்தார். அந்தத் தாக்குதல் சம்பவத்திற்காகத் தனது சிறைத்தண்டனையின் ஒரு பகுதியை அனுபவித்த பின்னர், மோரின் சில நிபந்தனைகளின் கீழ் (Supervision) விடுவிக்கப்பட்டிருந்தார்.

எனினும், தனது விடுதலைக்கான நிபந்தனைகளை மீறிய குற்றச்சாட்டின் கீழ் (Breaches of release conditions) அவர் பலமுறை பொலிஸாரால் கைது செய்யப்பட்டதுடன், பொதுமக்கள் விழிப்புடன் இருக்குமாறும் பொலிஸாரால் எச்சரிக்கைகள் விடுக்கப்பட்டிருந்தன.

தற்போது புதிய கொலைக் குற்றச்சாட்டின் கீழ் கைது செய்யப்பட்டுள்ள டேவிட் ரிச்சர்ட் மோரின், எதிர்வரும் ஜூலை 3 ஆம் திகதி மீண்டும் நீதிமன்றத்தில் முன்னிலைப்படுத்தப்படவுள்ளார்.