இலஞ்ச ஊழல் குற்றச்சாட்டுகளைப் புலனாய்வு செய்வதற்கான இலங்கை ஆணைக்குழு (Bribery or Corruption Commission), குமரன் பத்மநாதன் (கே.பி. என பரவலாக அறியப்படுபவர்) கைது செய்யப்பட்டதன் பின்னர் அவரிடமிருந்து கைப்பற்றப்பட்டதாகக் கூறப்படும் பெருமளவிலான தங்கம் என்னவானது என்பது குறித்து உயர்மட்ட விசாரணை ஒன்றை ஆரம்பித்துள்ளது.

இந்த விசாரணையின் ஒரு பகுதியாக, முன்னாள் இராணுவத் தளபதி பீல்ட் மார்ஷல் சரத் பொன்சேகா இன்று (11) ஆணைக்குழுவின் முன்னிலையில் ஆஜராகி இது தொடர்பான சாட்சியங்களை வழங்கியுள்ளார்.

குமரன் பத்மநாதன், , ஆகஸ்ட் 2009 இல், மலேசியாவின் கோலாலம்பூரில் வைத்து இலங்கை புலனாய்வு அமைப்புகள் மற்றும் சர்வதேச பாதுகாப்புப் படைகள் இணைந்து நடத்திய கூட்டு நடவடிக்கையின் போது கே.பி. கைது செய்யப்பட்டு, பின்னர் இரகசியமாக இலங்கைக்குக் கொண்டு வரப்பட்டார்.

இலங்கை திரும்பிய பின்னர், அரசாங்கப் பாதுகாப்பின் கீழ் வைக்கப்பட்டிருந்த கே.பி, பின்னர் அமைதியான அரசியல் செயல்முறைகள் மற்றும் சமூக சேவை நடவடிக்கைகளில் ஈடுபடுத்தப்பட்டார்.

தற்போது நடைபெற்று வரும் விசாரணையானது, கே.பி.யின் வசம் இருந்ததாக நம்பப்படும் பல தொன் (tonnes) எடையுள்ள தங்கம் அக்காலத்தில் அதிகாரிகளால் பொறுப்பேற்கப்பட்டதாகவும், அதன் பின்னர் அந்த சொத்துக்களுக்கு என்ன நடந்தது என்பது குறித்தும் எழுந்துள்ள குற்றச்சாட்டுகளை மையமாகக் கொண்டு அமைந்துள்ளது.

ஆணைக்குழுவில் சாட்சியமளித்த பின்னர் ஊடகவியலாளர்களிடம் பேசிய பீல்ட் மார்ஷல் சரத் பொன்சேகா, இது தொடர்பான தனது நிலைப்பாட்டை விளக்கினார்.

“2009 இல் கைது செய்யப்பட்ட குமரன் பத்மநாதன் அல்லது கே.பி. தொடர்பான விவகாரம் குறித்து ஆணைக்குழுவில் ஆஜராகுமாறு எனக்கு அழைப்பு விடுக்கப்பட்டிருந்தது. அவரிடம் இருந்த சில குறிப்பிட்ட அளவிலான தங்கம் அக்காலத்திலிருந்த அரசாங்கத்தாலும் சம்பந்தப்பட்ட பாதுகாப்பு அதிகாரிகளாலும் பொறுப்பேற்கப்பட்டதாக லஞ்ச ஊழல் ஆணைக்குழுவிற்குத் புகார்கள் கிடைத்துள்ளன, அதுகுறித்து எனக்கு என்ன தெரியும் என்று என்னிடம் கேட்கப்பட்டது,” என்று அவர் செய்தியாளர்களிடம் கூறினார்.

மேலும் அவர் குறிப்பிடுகையில், கே.பி. கைது செய்யப்பட்ட போது, “நான் இராணுவத் தளபதியாகப் பணியாற்றவில்லை. நான் முப்படைகளின் தலைமை அதிகாரியாக (Chief of Defence Staff) பதவியேற்றிருந்தேன். எனவே, அவரிடமிருந்து ஏதேனும் பொருட்கள் கைப்பற்றப்பட்டிருந்தால், அதுபற்றிய விபரங்கள் எனக்குத் தெரியாது. அந்த ஆண்டின் நவம்பர் 16 ஆம் திகதி நான் முப்படைகளின் தலைமை அதிகாரி பதவியிலிருந்து ஓய்வு பெற்றேன். இதையே நான் ஆணைக்குழுவிற்கும் விளக்கமளித்தேன்” என்றார்.

தனது பதவிக்காலத்தில் இத்தகைய விடயங்கள் தொடர்பாக கே.பி.யுடன் தனக்கு எந்தவித தொடர்பும் இருக்கவில்லை என்றும் முன்னாள் இராணுவத் தளபதி தெரிவித்தார்.

யுத்தத்தின் பின்னரான காலத்தில் கைப்பற்றப்பட்ட இந்த சொத்துக்களின் பொறுப்புக்கூறல் மற்றும் அவை யாரிடம் ஒப்படைக்கப்பட்டன என்ற சங்கிலித்தொடர் விபரங்களை நிறுவ அதிகாரிகள் தற்போது முயன்று வருவதால், சம்பந்தப்பட்ட தங்கத்தின் அளவு காரணமாக இந்த விசாரணை பொதுமக்களிடையே பெரும் கவனத்தை ஈர்த்துள்ளது.