கனடாவிற்குள் சட்டப்பூர்வமாக நுழைந்து, நிதி லாபத்திற்காக திட்டமிட்ட குற்றங்களைச் செய்து வரும் ‘குற்றவியல் சுற்றுலாப் பயணிகளின்’ (Criminal Tourists) பரந்த வலையமைப்பைத் தம்மால் கண்டறியப்பட்டுள்ளதாக ஒன்டாரியோவின் டர்ஹாம் பிராந்திய காவல்துறையினர் தெரிவித்துள்ளனர்.

“புரொஜெக்ட் ஜெட்செட்டர்” (Project Jetsetter) என்ற பெயரில் நடத்தப்பட்ட இந்த விசாரணை குறித்துப் பேசிய புலனாய்வாளர்கள், இந்த திட்டமிட்ட குற்றவியல் வலையமைப்புடன் 200-க்கும் மேற்பட்ட சம்பவங்கள் தொடர்புடையவை என்றும், இதன் மூலம் 2.6 மில்லியன் டாலருக்கும் அதிகமான நிதி இழப்பு ஏற்பட்டுள்ளதாகவும் உறுதிப்படுத்தியுள்ளனர். இதுவரை 46 நபர்கள் கைது செய்யப்பட்டு, அவர்கள் மீது மொத்தம் 1,442 குற்றச்சாட்டுகள் சுமத்தப்பட்டுள்ளன. மேலும், தற்போதும் தேடப்பட்டு வரும் நபர்களுக்கு எதிராக குறைந்தது 164 கைது வாரண்டுகள் பிறப்பிக்கப்பட்டுள்ளன.

இந்த விசாரணையின் மூலம், பெரிய அளவிலான சில்லறை வர்த்தகத் திருட்டுகள் (Retail thefts), வாகன மற்றும் நிதி மோசடிகள், திட்டமிட்டு ஏற்படுத்தப்படும் விபத்துக்கள் (Staged collisions), கவனத்தைத் திசை திருப்பி நடத்தும் திருட்டுகள், மற்றும் வாகனங்கள் மற்றும் பொருட்களை வெளிநாடுகளுக்குக் கடத்துதல் உள்ளிட்ட திட்டமிட்ட, மீண்டும் மீண்டும் செய்யக்கூடிய பல குற்றவியல் முறைகளை காவல்துறையினர் கண்டறிந்துள்ளதாக தலைமை அதிகாரி பீட்டர் மோரேரா தெரிவித்தார்.

சந்தேக நபர்களாக அடையாளம் காணப்பட்டவர்களில் பெரும்பாலானோர் ருமேனியாவைச் சேர்ந்தவர்கள் என்றும், சிறிய அளவிலான பகுதியினர் இந்தியாவைச் சேர்ந்தவர்கள் என்றும் டிடெக்டிவ் பிராட் சாப்மேன் விளக்கினார். “அவர்கள் அடிக்கடி ஒரு இடத்திலிருந்து மற்றொரு இடத்திற்குப் பயணம் செய்கிறார்கள். இங்கு வந்து குற்றங்களைச் செய்துவிட்டு, நாங்கள் அவர்களை அடையாளம் காண்பதற்கு முன்பே பல நேரங்களில் நாட்டை விட்டு வெளியேறிவிடுகிறார்கள்,” என்று சாப்மேன் கூறினார். இந்த ‘புரொஜெக்ட் ஜெட்செட்டர்’ என்பது 2019 முதல் 2026 வரையிலான பல விசாரணைகளின் கூட்டு முடிவு என்றும் அவர் குறிப்பிட்டார்.

‘அழுக்கு எண்ணெய்’ மோசடி (The ‘dirty oil’ scam)

இந்தக் குழுவினர் காரின் மைலேஜ் அளவைக் குறைத்துக் காட்டி (Odometer rollback) ஏமாற்றுவதுடன், வாகனங்களை விற்க முயல்பவர்களை அணுகி, டெஸ்ட் டிரைவ் செய்யும்போது காரின் புகைக்குழாயில் (Tailpipe) ரகசியமாகத் திரவ ஊற்றி எஞ்சின் பழுதடைந்துவிட்டது போல் நாடகமாடி, குறைந்த விலைக்கு காரைப் பறிக்கும் ‘அழுக்கு எண்ணெய்’ மோசடியிலும் ஈடுபட்டுள்ளனர். மேலும், போலி அடையாளங்களைப் பயன்படுத்தி வாகனங்களுக்கு நிதி உதவி (Financing) பெற்று, அந்த வாகனங்களை வெளிநாடுகளுக்குக் கடத்தியும் உள்ளனர்.

முதியவர்களைக் குறிவைக்கும் 268% அதிகரித்த திருட்டுகள்

இந்தக் குழுவினர் முதியவர்களைக் குறிவைத்து, முகவரி கேட்பது போல் நடித்து, அவர்களுக்குக் கழுத்துச் சங்கிலி போன்ற போலி நகைகளைப் பரிசளிப்பது அல்லது கட்டிப்பிடிப்பது போல் பாசாங்கு செய்து, அவர்கள் அணிந்திருக்கும் உண்மையான தங்க நகைகளைத் திருடிச் சென்றுள்ளனர். டர்ஹாம் பிராந்தியத்தில் முதியவர்களைக் குறிவைக்கும் இத்தகைய கவனச்சிதறல் திருட்டுகள் கடந்த ஆண்டை விட 268 சதவீதம் அதிகரித்துள்ளன. சில்லறை விற்பனைக் கடைகளிலும் முதியவர்களின் கவனத்தைத் திசைதிருப்பி அவர்களின் வங்கி அட்டைகள் மற்றும் பின் (PIN) எண்களைத் திருடிப் பணத்தைப் பறித்துள்ளனர்.

அவமானம் மற்றும் பயம் காரணமாகப் பல முதியவர்கள் இந்தத் திருட்டுகள் குறித்துப் புகார் அளிப்பதில்லை என்பதால், முதியவர்களைப் பராமரிப்பவர்கள் அந்நிய நபர்களிடம் எச்சரிக்கையாக இருக்குமாறு அவர்களுக்கு அறிவுறுத்த வேண்டும் எனப் போலீசார் கேட்டுக்கொண்டுள்ளனர்.

‘இது பனிப்பாறையின் நுனி மட்டுமே’

இந்தக் குற்றங்கள் டொராண்டோ மற்றும் கனடா முழுவதும் பரவியுள்ளதாகக் குறிப்பிட்ட காவல்துறை அதிகாரிகள், கனடாவில் இருந்து வெளியேறுபவர்களைக் கண்காணிக்கும் வலுவான அமைப்பு மத்திய அரசிடம் இல்லாததையும், இந்தக் குற்றங்களுக்கான தண்டனைகள் போதிய அளவில் இல்லாததையும் சுட்டிக்காட்டியுள்ளனர். தற்போது கண்டறியப்பட்டுள்ள இந்த விபரம் “பனிப்பாறையின் நுனி மட்டுமே” (Tip of the iceberg) என்றும், தேடப்பட்டு வரும் மீதமுள்ள நபர்களைப் பிடிக்கத் தீவிர விசாரணை தொடர்வதாகவும் காவல்துறையினர் தெரிவித்துள்ளனர்.