சென்னை: நாகை மற்றும் ஈழத்துத் தமிழ் மீனவர்களிடையே அண்மையில் ஏற்பட்ட மோதல் குறித்து நாம் தமிழர் கட்சியின் தலைமை ஒருங்கிணைப்பாளர் சீமான் மிகுந்த வருத்தமும் எச்சரிக்கையும் தெரிவித்துள்ளார். இது தொடர்பாக அவர் வெளியிட்டுள்ள அறிக்கையில், கடந்த ஏப்ரல் 25-ஆம் தேதி கோடியக்கரை அருகே மீன்பிடித்துக் கொண்டிருந்த நாகை மீனவர்களுக்கும், ஈழ மீனவர்களுக்கும் இடையே ஏற்பட்ட மோதலில், காங்கேசன்துறையைச் சேர்ந்த அயந்தன் என்ற மீனவர் தமிழக மீனவர்களால் சிறைபிடிக்கப்பட்டுப் போலீசாரிடம் ஒப்படைக்கப்பட்ட நிகழ்வு அதிர்ச்சியளிப்பதாகக் குறிப்பிட்டுள்ளார்.
இலங்கை கடற்படை தமிழக மீனவர்கள் மீது தொடர்ந்து நடத்தி வரும் தாக்குதல்கள், கொலைகள் மற்றும் சொத்துச் சூறையாடல்களை மறைத்துவிட்டு, இருநாட்டுத் தமிழ் மீனவர்களிடையேதான் பிரச்சனை உள்ளது போன்ற மாயத்தோற்றத்தை உருவாக்க இலங்கை இனவாத அரசு திட்டமிட்டுச் சதி செய்வதாகச் சீமான் குற்றம்சாட்டியுள்ளார். தமிழர்களின் இன ஓர்மையைச் சிதைக்க நடக்கும் இத்தகைய சூழ்ச்சிகளைத் தொப்புள்கொடி உறவுகளான இருநாட்டு மீனவர்களும் உணர்ந்து, எச்சரிக்கையுடன் இருக்க வேண்டும் என்றும் அவர் கேட்டுக்கொண்டார். எல்லைச் சிக்கல்களைப் பேச்சுவார்த்தை மூலம் தீர்த்துக்கொள்ள முன்வர வேண்டும் என வலியுறுத்திய அவர், தற்போது போலீஸ் காவலில் உள்ள ஈழ மீனவர் அயந்தனுக்கு உரிய மருத்துவ சிகிச்சை அளித்து, அவரை விரைவாகத் தாயகம் திருப்பி அனுப்பத் தமிழக அரசும், ஒன்றிய அரசும் நடவடிக்கை எடுக்க வேண்டும் என வலியுறுத்தியுள்ளார்.
#Seeman #NaamTamilarKatchi #NTK #TamilFishermen #SriLankaNavy #EelamTamils #Nagapattinam #Kankesanthurai #FishermenIssue #TamilUnity #SeemanStatement #SeaBoundary #BreakingNews #TamilPolitics #SaveFishermen #April30
