இலங்கை செலுத்த வேண்டிய கடன் தவணை செலுத்துவதில் ஏற்பட்டுள்ள தாமதம் குறித்து ஆஸ்திரேலிய அதிகாரிகள் சுட்டிக்காட்டிய பின்னரே, 2.5 மில்லியன் அமெரிக்க டாலர் மதிப்பிலான சைபர் திருட்டு குறித்து இலங்கை அதிகாரிகள் அறிந்து கொண்டதாக, இந்த விவகாரத்தை நன்கு அறிந்த எதிர்க்கட்சி நாடாளுமன்ற உறுப்பினர் ஒருவர் தெரிவித்துள்ளார். இது நாட்டின் நிதி மேற்பார்வையில் உள்ள பாரிய முறையற்ற தன்மையை வெளிப்படுத்தியுள்ளது.
அரசாங்க நிதி பற்றிய குழுவின் (COPF) உறுப்பினரும், புதிய ஜனநாயக முன்னணியின் (NDF) நாடாளுமன்ற உறுப்பினருமான ரவி கருணாநாயக்க இது குறித்து ‘டெய்லி மிரர்’ பத்திரிகையிடம் கூறுகையில்; 22.9 மில்லியன் அமெரிக்க டாலர் மதிப்பிலான இருதரப்புக் கடன் தவணையின் வட்டி செலுத்துகை தொடர்பாக, கடந்த ஆண்டு நவம்பரில் மூன்றும், இந்த ஆண்டு ஜனவரியில் இரண்டுமாக மொத்தம் ஐந்து கொடுப்பனவுகள் செலுத்தப்பட வேண்டியிருந்தது என்றார்.
“பணம் செலுத்துவதில் ஏற்பட்டுள்ள தாமதம் குறித்து ஆஸ்திரேலிய அதிகாரிகள் கேள்வி எழுப்பினர். அதன் பின்னரே ஏதோ தவறு நடந்துள்ளதை அரசாங்கம் உணர்ந்து கொண்டது,” என்று அவர் கூறினார்.
வெளிநாட்டுக் கடன் வழங்குநர் ஒருவர் சிவப்பு எச்சரிக்கை விடுக்கும் வரை இந்த அத்துமீறல் கண்டறியப்படாமல் இருந்தது, நாட்டின் உள்நாட்டு நிதி கட்டுப்பாட்டு கட்டமைப்பில் உள்ள ஆபத்தான இடைவெளியைச் சுட்டிக்காட்டுகிறது. கடன் மறுசீரமைப்பு மற்றும் கொடுப்பனவுகள் உலகளாவிய ரீதியில் உன்னிப்பாகக் கவனிக்கப்படும் இக்காலகட்டத்தில், இத்தகைய பாதிப்புகள் பெரும் கவலையை ஏற்படுத்தியுள்ளன.
சர்ச்சைக்குரிய இந்த பரிவர்த்தனைகளில் மூன்று, மத்திய வங்கியின் பொதுக் கடன் திணைக்களத்தின் (PDD) கீழ் இருந்தபோதே நடந்துள்ளதால், இதற்குக் இலங்கை மத்திய வங்கியும் பொறுப்பேற்க வேண்டும் என்று கருணாநாயக்க மேலும் வாதிட்டார்.
2024 ஆம் ஆண்டின் 33 ஆம் இலக்க பொதுக் கடன் மேலாண்மைச் சட்டத்தின்படி, நிதியமைச்சின் கீழ் பொதுக் கடன் மேலாண்மை அலுவலகம் (PDMO) நிறுவப்பட்டதைத் தொடர்ந்து, மத்திய வங்கி தனது பொதுக் கடன் திணைக்களத்தை மூடிவிட்டு, அதன் ‘லங்காசெக்யூர்’ (LankaSecure) பிரிவை கொடுப்பனவுகள் மற்றும் தீர்வுத் திணைக்களத்திற்கு 2026 ஜனவரி 1 முதல் மாற்றியிருந்தது.
இந்த சைபர் திருட்டு தொடர்பான விசாரணைகள் தற்போது ஆஸ்திரேலிய கூட்டாட்சி காவல்துறையின் (Australian Federal Police) உதவியுடன் முன்னெடுக்கப்பட்டு வருகின்றன.
