ஒன்டாரியோ (கனடா):

கனடாவின் ‘நெடுஞ்சாலை 17’ (Highway 17) பாதையில் இடம்பெற்ற கொடூர வீதி விபத்தில் தனது தாயைப் பறிகொடுத்த மகள் ஒருவர், மேலும் பல உயிர்கள் பலியாவதைத் தடுக்க அப்பாதையில் உடனடி பாதுகாப்பு சீர்திருத்தங்களைச் செய்யுமாறு மாகாண அரசாங்கத்திற்குக் கோரிக்கை விடுத்துள்ளார்.

நடப்பு ஆண்டில் கடந்த 7 மாதங்களில் மட்டும் நெடுஞ்சாலை 17-ல் ஏற்பட்ட பல்வேறு விபத்துகளில் 7 பேர் உயிரிழந்துள்ளனர். இதில் கடந்த மே மாதம் இடம்பெற்ற விபத்தொன்றில், மல்லோரி பிரிண்டன் (Mallory Brinton) என்பவரின் தாயாரான பிரெண்டா ஓபின் (62) பரிதாபமாக உயிரிழந்தார்.

2,600-க்கும் மேற்பட்டோர் ஆதரவு:

இறந்துபோன பிரெண்டா ஓபின் பல ஆண்டுகள் பள்ளிப் பேருந்து ஓட்டுநராகப் பணியாற்றிய அனுபவம்மிக்கவர். அவ்வளவு அனுபவமும் கவனமும் கொண்ட ஒருவருக்கே இந்த நிலைமை எனில், யார் வேண்டுமானாலும் இங்கு விபத்தில் சிக்கக்கூடும் என அச்சம் தெரிவிக்கும் அவரது மகள் மல்லோரி, விபத்து நடந்த சந்திப்பில் பாதுகாப்பை பலப்படுத்தக் கோரி ஆன்லைன் மனு ஒன்றை இயக்கினார்.

இந்த மனுவில் இதுவரை 2,600-க்கும் மேற்பட்டோர் கையெழுத்திட்டுள்ளனர். அதில் குறிப்பிடப்பட்டுள்ள முக்கிய கோரிக்கைகள்:

• நெடுஞ்சாலையில் இருந்து இடதுபுறம் திரும்பும் வாகனங்கள் குறித்து எச்சரிக்கும் கூடுதல் பலகைகள் அமைத்தல்.

• வீதியில் தெளிவாகத் தெரியும் வகையில் திருப்பக் குறிகளை (Turn arrows) வரைதல்.

• குறிப்பாக இரவிலும் தெளிவாகத் தெரியக்கூடிய மின்னு விளக்குகள் (Flashing warning lights) மற்றும் மேலதிக போக்குவரத்து கட்டுப்பாட்டு நடவடிக்கைகளை நடைமுறைப்படுத்துதல்.

தொடரும் சோகம்:

கடந்த ஜூலை 17 அன்று ரென்ஃப்ரூ (Renfrew) அருகே நேர்ந்த மற்றொரு வீதி விபத்தில் ஒட்டாவாவைச் சேர்ந்த 19 வயது வாலிபர் உயிரிழந்தார். இதன் மூலம் இந்த ஒரே நெடுஞ்சாலையில் பலியானோரின் எண்ணிக்கை 7 ஆக உயர்ந்துள்ளது. இதனால் அப்பகுதியைப் பயன்படுத்தும் மக்களிடையே பெரும் அச்சம் உருவாகியுள்ளது.

மாகாண நிர்வாகத்தின் நடவடிக்கை:

இக்கோரிக்கைகள் அடங்கிய மனுவை மாகாண நாடாளுமன்ற உறுப்பினர் (MPP) பில்லி டெனால்ட்டிடம் மல்லோரி அளித்துள்ளார். இதற்கிடையில், நெடுஞ்சாலையின் பாதுகாப்பை ஆய்வு செய்து மேம்பாடுகளைச் செய்ய நடவடிக்கை எடுக்கப்பட்டு வருவதாகவும், ஆர்ன்பிரையர் (Arnprior) முதல் ரென்ஃப்ரூ வரையிலான சாலையை இருவழியாக (Twinning) விரிவாக்கம் செய்யும் திட்டமிடல் தொடர்ந்து நடைபெற்று வருவதாகவும் போக்குவரத்து அமைச்சகம் தெரிவித்துள்ளது.