தூத்துக்குடி

முதலமைச்சர் விஜய் குறித்து அவதூறு பரப்பும் வகையிலும், மிரட்டல் விடுக்கும் வகையிலும் பேசிய வழக்கில் நிபந்தனை ஜாமீனில் வெளிவந்துள்ள விளாத்திகுளம் திமுக சட்டமன்ற உறுப்பினர் மார்க்கண்டேயன், தூத்துக்குடி மாவட்ட குற்றப்பிரிவு காவல் நிலையத்தில் இன்று நேரில் ஆஜராகிக் கையெழுத்திட்டார். பின்னர் செய்தியாளர்களைச் சந்தித்த அவர் தவெக அரசைக் கடுமையாக விமர்சித்தார்.

செய்தியாளர்களிடம் பேசிய மார்க்கண்டேயன், “திமுகவினரை யாராலும் குறிவைக்க முடியாது. எதற்காக எங்கள் மீது வழக்கு பதிவு செய்ய வேண்டும்? இதில் வழக்கு பதிவு செய்ய என்ன இருக்கிறது?” என்று சரமாரியாகக் கேள்வி எழுப்பினார்.

“நிதி அமைச்சருக்குச் சட்டமன்றத்தில் அவ்வளவு கோபம் தேவையில்லை. அமைதியின் மொழி தனக்குத் தெரியும் என்று அவர் கூறுகிறார். கோபத்தில் அடிப்பதுதான் அமைதியின் மொழியா? அவர் தன்னை மாற்றிக்கொள்ள வேண்டும். சட்டமன்றத்தில் என்னுடைய செயல்பாடு எப்போதுமே ஒரே மாதிரிதான் உள்ளது,” என்றார்.

“தவெக ஆட்சியின் 100 நாள் செயல்பாடு முற்றிலும் பூஜ்யமாகவே உள்ளது. தமிழ்நாடு முழுவதும் ஒன்பதரை லட்சம் பேருக்கு மின் கட்டணம் கடுமையாக உயர்ந்துள்ளது. ரூ.2,000 கட்டணம் வந்தவர்களுக்கு தற்போது ரூ.5,000 முதல் ரூ.6,000 வரை கட்டணம் வந்துள்ளது. இதை அமைச்சரே ஒப்புக்கொள்கிறார், ஆனால் தனிப்பட்ட முறையில் புகார்கள் வரவில்லை என மழுப்புகிறார்,” என்று குற்றம் சாட்டினார்.

“எல்லா சினிமா நடிகர்களும் அரசியலுக்கு வருகிறார்கள். அவர்களை வர வேண்டாம் எனச் சொல்ல முடியாது. ஆனால், நடிகர்கள் அரசியலுக்கு வருவதால் திமுகவுக்கு எந்தப் பாதிப்பும் கிடையாது. திமுக மாபெரும் பேரியக்கம். 2019 நாடாளுமன்றத் தேர்தல், 2021 சட்டமன்றத் தேர்தல், உள்ளாட்சித் தேர்தல் மற்றும் 2024 நாடாளுமன்றத் தேர்தல் எனத் தொடர்ந்து நான்கு தேர்தல்களிலும் திமுக மாபெரும் வெற்றி பெற்றுள்ளது. நடந்து முடிந்த சட்டமன்றத் தேர்தலிலும் எங்கள் கூட்டணி 74 தொகுதிகளைக் கைப்பற்றியுள்ளது,” என்று பெருமிதம் தெரிவித்தார்.

“தேர்தலில் ஒரு அரசியல் கட்சியால் தொடர்ந்து ஜெயித்துக்கொண்டே இருக்க முடியாது. இப்போது நாங்கள் எதிர்க்கட்சியாகச் செயல்படுகிறோம்; அடுத்த கட்டத்தை நோக்கி நகர்வோம். நாங்கள் எதற்காக அதிமுகவுடன் கூட்டணி வைக்க வேண்டும்? தவெக தான் அதிமுகவுடன் கூட்டணி வைத்துள்ளது. அதிமுக சட்டமன்ற உறுப்பினர்கள் எத்தனை பேர் அங்கே போய் சேர்ந்துள்ளனர் என்பதைப் பாருங்கள்,” என்று அடுக்கடுக்கான கேள்விகளை எழுப்பினார்.

#DMK #Markandayan #TVKGovernment #ChiefMinisterVijay #Thoothukudi #TNPolitics #TamilNaduNews #TNEB #TNAssembly #ViralNewsTN #TrendingTN #LatestNewsTN #TNNewsUpdates