மத்திய கிழக்கில் நிலவி வரும் போர்ச் சூழல் காரணமாக, இந்த கோடை காலத்தில் வெளிநாடுகளுக்குப் பயணம் செய்யும் கனேடியர்கள் பல்வேறு இடர்பாடுகளைச் சந்திக்க நேரிடும் என கனடா அரசாங்கம் (Global Affairs Canada) எச்சரிக்கை விடுத்துள்ளது.

அறிவுறுத்தலின் முக்கிய அம்சங்கள்:

• பயணத் தடங்கல்கள்: எரிபொருள் தட்டுப்பாடு காரணமாக விமானங்கள் ரத்து செய்யப்படலாம். அத்துடன், உங்கள் இலக்கு நாடுகளில் உள்ளூர் சேவைகள் மற்றும் பொருட்களைப் பெற்றுக்கொள்வதிலும் சிக்கல்கள் ஏற்படக்கூடும்.

• மத்திய கிழக்கு மற்றும் பிற பகுதிகள்: மத்திய கிழக்கு நாடுகளுக்குச் செல்பவர்கள் அல்லது அந்தப் பிராந்தியத்தின் ஊடாகப் பயணம் செய்பவர்களின் திட்டங்கள் எவ்வித முன்னறிவிப்புமின்றி மாற்றப்படலாம். இது தவிர, உலகளாவிய எரிபொருள் மற்றும் விநியோகச் சங்கிலிப் பாதிப்பால் மற்ற நாடுகளுக்குச் செல்பவர்களும் பாதிக்கப்பட வாய்ப்புள்ளது.

• சுய பாதுகாப்பு: வெளிநாடு செல்வது என்பது தனிப்பட்ட விருப்பம் சார்ந்தது. எனவே, அங்கு சிக்கிக்கொள்ளும் குடிமக்களுக்கு கனடா அரசாங்கம் வழங்கக்கூடிய உதவி மிகவும் மட்டுப்படுத்தப்பட்டதாகவே இருக்கும்.

• தயார்நிலை: திட்டமிட்ட காலத்தை விட அதிக நாட்கள் வெளிநாட்டில் தங்கியிருக்க நேரிட்டால், அதற்கான நிதி வசதி மற்றும் தேவையான மருந்துப் பொருட்கள் உங்களிடம் இருப்பதை உறுதி செய்து கொள்ளுங்கள். இதற்காக கனடா அரசாங்கம் எவ்வித நிதி உதவியும் வழங்காது.

• பயணக் காப்புறுதி (Travel Insurance): பயணம் ரத்து செய்யப்படுதல் அல்லது இடைநிறுத்தப்படுதல் போன்றவற்றை உள்ளடக்கிய விரிவான காப்புறுதியைப் பெற்றுக்கொள்ளுமாறு பரிந்துரைக்கப்பட்டுள்ளீர்கள். குறிப்பாக எரிபொருள் தட்டுப்பாடு அல்லது பிராந்திய மோதல்கள் போன்றவற்றுக்கு காப்புறுதிப் பாதுகாப்பு வழங்கப்படுகிறதா என்பதை உறுதி செய்து கொள்ளுங்கள்.

பயணத்தைத் தொடங்குவதற்கு முன்னரும், நாடு திரும்புவதற்கு முன்னரும் உங்கள் விமான நிறுவனம் அல்லது பயண முகவருடன் தொடர்புகொண்டு தற்போதைய நிலையைச் சரிபார்க்குமாறு கனேடியர்கள் அறிவுறுத்தப்பட்டுள்ளனர்.