சென்னை:

“ஈழ நிலத்தில் தமிழர்கள் முடிவுற்றதாக எதிரிகள் கருதிய அதே முள்ளிவாய்க்கால் மண்ணில் இருந்து, ‘விழுந்ததெல்லாம் அழுவதற்கல்ல; மீண்டெழுவதற்கே!’ என்ற இன மீட்சி முழக்கத்துடன் தமிழ்த்தேசிய இனம் மீண்டெழ வேண்டும்” என்று நாம் தமிழர் கட்சியின் தலைமை ஒருங்கிணைப்பாளர் செந்தமிழன் சீமான் உருக்கமான அறிக்கை வெளியிட்டுள்ளார்.

மே 18 முள்ளிவாய்க்கால் நினைவு நாளையொட்டி அவர் வெளியிட்டுள்ள அறிக்கையில், “இந்தியா உள்ளிட்ட உலக வல்லாதிக்க நாடுகளின் துணையோடு சிங்கள இனவாத அரசு நடத்திய இந்நூற்றாண்டின் மிகப்பெரிய இனப்படுகொலை முடிவுற்று, 2 லட்சம் தமிழர்கள் கொடூரமாகக் கொல்லப்பட்டு 17 ஆண்டுகளைக் கடந்துவிட்டோம். இழைக்கப்பட்ட அநீதிக்குச் சர்வதேச சமூகத்திடம் நீதிகேட்டு உலகெங்கும் வாழும் தமிழர்கள் இன்றளவும் அறவழியிலும், சட்டரீதியாகவும் போராடி வருகிறோம். ஆனால் இன்றளவும் போர்க்குற்ற விசாரணையோ, ஈழ விடுதலைக்கான பொதுவாக்கெடுப்போ நடத்தப்படாமல் எந்தவொரு தீர்வும் கிடைக்கவில்லை. தமிழர்கள் அதிகாரமின்றி உலகெங்கும் வாழும் தற்காலத் துயர்மிகுச் சூழலில், தாயக விடுதலைக்காக மீண்டெழுந்து நிற்க வேண்டியது ஒவ்வொரு தமிழரின் வரலாற்றுப் பெருங்கடமையாகும்” எனக் குறிப்பிட்டுள்ளார்.

மேலும், “கடந்த 17 ஆண்டுகளாகத் தமிழ்நாட்டில் பெருகி வரும் தமிழ்த்தேசியப் பேரெழுச்சியைத் தடுத்திடவும், தமிழ் இன உணர்வை அழித்திடவும் திட்டமிட்ட அரசியல் சூழ்ச்சிகள் பல நடைபெறும் சமகாலச் சூழலில், நாம் நமது ஒற்றுமையையும் பலத்தையும் உலகிற்கு உணர்த்த வேண்டியது பேரவசியமாகிறது. எத்தனை சதித்திட்டங்கள் தீட்டினாலும், பெருகிவரும் தமிழின உணர்வை எவராலும் தடுத்திட முடியாது என்பதை நிறுவுவோம். ஈழப்போரின் இறுதி நாட்களில் உணவுக்கு வழியில்லாமல், நம் உறவுகள் உப்பில்லா கஞ்சியையே உண்டு இனமீட்சிக்குப் போராடினார்கள். அத்துயரினை நினைவுகூரும் வகையில், சென்னை மறைமலைநகரில் மே 18 மாலை 4 மணிக்கு நாம் தமிழர் கட்சி முன்னெடுக்கவுள்ள தமிழ்ப்பேரின எழுச்சிப் பொதுக்கூட்டத்தில் உப்பில்லா கஞ்சியை நாமும் உண்டு, மாண்ட உறவுகளுக்கு வீரவணக்கம் செலுத்துவோம். தமிழர்களின் தாகம் தமிழீழத் தாயகம்!” என்று சீமான் தனது அறிக்கையில் அறைகூவல் விடுத்துள்ளார்.

#Seeman #MullivaikkalRemembrance #May18 #NaamThamizharKatchi #EezhamTamils #TamilGenocide #MaraimalaiNagar #UppillaKanji #Veeravanakkam #ThalapathyVijay #TVK_Government #TamilNationalism #SenthamizhanSeeman #NTK_Meeting #JusticeForTamils #LankanWarCrimes #PrideOfTamils #TamilNews #VijayMakkalIyakkam #CM_Vijay_Official_“`