வடக்கு எட்மன்டன் (Edmonton) பகுதியில் உள்ள அடுக்குமாடி குடியிருப்பு ஒன்றில் ஏற்பட்ட தீ விபத்து காரணமாக, அப்பகுதியில் செவ்வாய்க்கிழமை காலையிலும் போக்குவரத்துத் தடைகள் ஏற்படக்கூடும் என எட்மன்டன் மாநகர சபை எச்சரித்துள்ளது. சம்பவ இடத்தில் பொலிஸாரும் அவசரக்கால மீட்புக் குழுவினரும் தொடர்ந்து பணிகளில் ஈடுபட்டு வருகின்றனர்.
கடந்த திங்கட்கிழமை (ஜூலை 13) இரவு, 132 அவென்யூ (132 Avenue) மற்றும் 82 ஸ்ட்ரீட் (82 Street) சந்திப்பிற்கு அருகிலுள்ள அடுக்குமாடி கட்டடத்தில் வாகனம் ஒன்று மோதியதுடன், அங்கிருந்த கட்டடத்திலும் தீ பரவியுள்ளது. இது குறித்து அவசர அழைப்பைப் பெற்ற தீயணைப்புப் படையினர் சம்பவ இடத்திற்கு விரைந்து தீயை அணைக்கும் பணியில் ஈடுபட்டனர்.
செவ்வாய்க்கிழமை காலை வெளியிடப்பட்ட செய்திக்குறிப்பில், இத்தீ விபத்தில் அந்தக் குடியிருப்பில் வசித்த ஒருவர் உயிரிழந்துள்ளதாகவும், வாகனத்தை ஓட்டி வந்த ஓட்டுநர் உயிருக்கு ஆபத்தான காயங்களுடன் மருத்துவமனையில் அனுமதிக்கப்பட்டுள்ளதாகவும் மாநகர சபை உறுதிப்படுத்தியுள்ளது.
எட்மன்டன் தீயணைப்பு மற்றும் மீட்புச் சேவையினர் (Edmonton Fire Rescue Services) தொடர்ந்து சம்பவ இடத்தில் பணிகளை மேற்கொண்டு வருவதால், 137 அவென்யூ மற்றும் எல்லோஹெட் ட்ரெயில் (Yellowhead Trail) ஆகியவற்றுக்கு இடைப்பட்ட 82 ஸ்ட்ரீட் பகுதியைப் பயன்படுத்துவதைத் தவிர்க்குமாறு வாகன ஓட்டிகள் கேட்டுக்கொள்ளப்பட்டுள்ளனர்.
இச்சம்பவம் குறித்து பொலிஸார் தொடர்ந்து விசாரணைகளை முன்னெடுத்து வருவதோடு, கட்டடத்தில் வசித்தவர்களில் இன்னும் தொடர்புகொள்ள முடியாதவர்களை (Unaccounted for) அடையாளம் காணும் பணிகளிலும் ஈடுபட்டுள்ளனர். பாதிக்கப்பட்ட குடியிருப்பாளர்களுக்குத் தேவையான உதவிகளை வழங்குவதற்காக செஞ்சிலுவைச் சங்கத்தினரும் (Red Cross) சம்பவ இடத்திற்கு விரைந்துள்ளனர்.
