ஒட்டாவா — தனது கட்சியின் நாடாளுமன்ற உறுப்பினர் ஒருவரின் வீட்டில் திட்டமிட்ட தீவைப்புச் சதி நடந்திருப்பதாகக் கூறியுள்ள கனடியப் பிரதமர் மார்க் கார்னி (Mark Carney), சமூக வலைதளப் பதிவொன்றில் இதனை “வன்முறை மற்றும் அச்சுறுத்தலின் கோழைத்தனமான செயல்” என்று சாடியுள்ளார்.

ஸ்கார்பரோ சென்டர்-டான் வேலி ஈஸ்ட் (Scarborough Centre-Don Valley East) தொகுதியின் லிபரல் கட்சி எம்.பி.யான சல்மா ஜாஹித் (Salma Zahid) வெளியிட்டுள்ள அறிக்கையில், நள்ளிரவில் அடையாளம் தெரியாத நபர் ஒருவர் தனது தனிப்பட்ட இல்லத்தில் நின்றிருந்த தனது காரையும் மற்றொரு வாகனத்தையும் தீவைத்து கொளுத்தியதாகத் தெரிவித்துள்ளார்.

“இது ஏற்றுக்கொள்ள முடியாத ஒன்று. கனடியர்களாகிய நாம் இதுபோன்றவர்கள் அல்ல,” என்று கார்னி எழுதியுள்ளார். ஜாஹித்தும் அவரது குடும்பத்தினரும் காயமின்றிப் பாதுகாப்பாக இருப்பதை அறிந்து தான் நிம்மதியடைந்ததாகப் பிரதமர் குறிப்பிட்டார்.

இந்தச் சம்பவத்தின் போது எம்.பி.யும் அவரது குடும்பத்தினரும் வீட்டிற்குள் இருந்துள்ளனர். அவரது மகன் தீப்பற்றி எரிவதைக் கண்டதும் அவசர உதவி எண்ணான 911-ஐத் தொடர்பு கொண்டுள்ளனர்.

இரண்டு வாகனங்களும் முற்றாக அழிந்துவிட்டபோதிலும், வீட்டிற்கு எவ்வித சேதமும் ஏற்படவில்லை என்றும், யாருக்கும் காயம் ஏற்படவில்லை என்றும் ஜாஹித் தெரிவித்துள்ளார்.

“நானும் எனது குடும்பத்தினரும் பாதுகாப்பாக இருக்கிறோம்,” என்று ஜாஹித் எழுதியுள்ளார்.

டொரொண்டோ தீயணைப்புப் படையினர் “அழைப்பிற்கு உடனடியாகப் பதிலளித்துச் செயல்பட்டனர்” என்று குறிப்பிட்ட ஜாஹித், முதலுதவி மற்றும் அவசரகாலப் பணியாளர்களின் தொழில்முறை சேவைக்குத் தனது நன்றியைத் தெரிவித்துக் கொண்டார்.

மேலும், இச்சம்பவம் தீவைப்புச் சதியாக இருக்கக்கூடும் என்ற கோணத்தில் விசாரிக்கப்பட்டு வருவதாகவும் அவர் சேர்த்துக் கொண்டார்.

“இதன் பின்னணியில் என்ன நோக்கம் இருக்கும் என்பது குறித்து நான் ஊகிக்க விரும்பவில்லை. காவல்துறையின் விசாரணை முடிவுகளுக்காகக் காத்திருப்போம். ஆனால், இதுபோன்ற தாக்குதல்கள் ஏற்றுக்கொள்ள முடியாதவை; ஸ்கார்பரோ சென்டர்-டான் வேலி ஈஸ்ட் தொகுதி மக்களுக்குச் சேவையாற்றும் என் பணியிலிருந்து இது என்னை பின்வாங்கச் செய்யாது,” என்று ஜாஹித் எழுதியுள்ளார்.

எதிர்க்கட்சியான கன்சர்வேடிவ் கட்சியின் தலைவர் பியர் பொய்லீவ்ரேவும் (Pierre Poilievre) ஜாஹித்திற்கும் அவரது குடும்பத்தினருக்கும் தனது ஆதரவைத் தெரிவித்ததுடன், இந்தச் செயலுக்குக் காரணமான குற்றவாளி தண்டிக்கப்பட வேண்டும் என்ற தனது விருப்பத்தையும் வெளிப்படுத்தியுள்ளார்.