சென்னை
தமிழ்நாடு சட்டப்பேரவையில் வருவாய் மற்றும் மக்கள் நல்வாழ்வுத்துறை மானியக் கோரிக்கை மீதான விவாதத்தில், திமுக மற்றும் ஆளுங்கட்சியான தவெக இடையே மிகக் கடுமையான மற்றும் அனல் பறக்கும் காரசார விவாதம் அரங்கேறியுள்ளது.
“தவெக வாக்குறுதிகள் என்னாச்சு?”:
விவாதத்தில் பேசிய திமுக முன்னாள் அமைச்சர் கே.கே.எஸ்.எஸ்.ஆர். ராமச்சந்திரன், “எதிர்க்கட்சித் தலைவர் உதயநிதி ஸ்டாலின் எந்த ஆதிக்கத்துக்கும் அஞ்சாமல் துணிவுடன் செயல்படுகிறார். கடந்த திமுக ஆட்சியில் 27 லட்சம் பேருக்கு அரசு மனைப்பட்டா மற்றும் கொரோனா காலத்தில் ரூ.4,000 நிவாரணம் வழங்கினோம். ஆனால், தவெக அரசு ஆட்சிக்கு வந்து 3 மாதங்கள் ஆகியும், மகளிருக்கு ரூ.2,000, வேலைவாய்ப்பற்றோருக்கு ரூ.4,000 மற்றும் இலவச சிலிண்டர் உள்ளிட்ட எந்தத் தேர்தல் வாக்குறுதியையும் இதுவரை நிறைவேற்றவில்லை,” என்று கடுமையாகச் சாடினார்.
“ஸ்டாலின் வரும்போது நீங்கள் இருக்க மாட்டீர்கள்”:
தொடர்ந்து ஆவேசமாகப் பேசிய அவர், “மு.க.ஸ்டாலின் தலைமையிலான திமுக ஆட்சி மீண்டும் உறுதியாக வரும்; விழுந்த வேகத்தில் எழுந்து நிற்கும் கட்சி திமுக. அப்பா (ஸ்டாலின்) எங்கே என்று கேட்கிறீர்கள்; அவர் பேரவைக்கு வரும்போது இங்கு நீங்கள் பல பேர் இருக்க மாட்டீர்கள், நாங்கள் மட்டுமே இருப்போம்,” என்று திட்டவட்டமாகத் தெரிவித்தார்.
“விஜய் இருக்கும் வரை திமுகவுக்கு எதிர்கட்சி வரிசைதான்!”:
இதற்கு உடனடியாகப் பதிலடி கொடுத்த அவை முன்னவர் செங்கோட்டையன், “முதலமைச்சர் விஜய் இருக்கும் வரை திமுக மீண்டும் ஆட்சிக்கு வரப் போவதே இல்லை. திமுகவுக்கு இனி எப்போதுமே எதிர்க்கட்சி வரிசைதான். எம்.ஜி.ஆர் முதலமைச்சராக இருந்தவரை திமுக மீண்டும் ஆட்சிக்கு வரவில்லை என்பதுதான் வரலாறு,” என்றார்.
குறுக்கிட்ட நேரு… பதிலடி கொடுத்த செங்கோட்டையன்:
அப்போது குறுக்கிட்ட திமுக எம்.எல்.ஏ. கே.என்.நேரு, “எம்.ஜி.ஆர் இருக்கும்போதுதான் 1980 நாடாளுமன்றத் தேர்தல் மற்றும் 1986 உள்ளாட்சித் தேர்தலில் திமுக வெற்றி பெற்றது,” எனப் சுட்டிக்காட்டினார். இதற்குப் பதிலளித்த செங்கோட்டையன், “நீங்கள் நாடாளுமன்றத் தேர்தலில் வெற்றி பெற்று ஆட்சியை கலைத்தீர்கள்; ஆனால் அதன் பிறகும் சட்டமன்றத் தேர்தலில் வெற்றி பெற்று நிரந்தர முதலமைச்சராக வரலாறு படைத்தவர் எம்.ஜி.ஆர்,” என்று காட்டமாகத் தெரிவித்தார்.
#TNAssembly #KKSSR #Sengottaiyan #TVKGovernment #ChiefMinisterVijay #JosephVijay #ThalapathyVijay #DMK #MKStalin #UdhayanidhiStalin #KNNehru #TNPolitics #TamilNaduNews #ChennaiNews #ViralNewsTN #TrendingTN #LatestNewsTN #TNNewsUpdates
