கோவை

கோவையில் நடைபெற்ற சுற்றுலா மாநாட்டில் பங்கேற்றப் பின்னர் செய்தியாளர்களைச் சந்தித்த தமிழ்நாடு சுற்றுலாத்துறை அமைச்சர் ராஜேஷ் குமார், சுற்றுலாத்துறை திட்டங்கள் மற்றும் முதலமைச்சர் விஜய் பிரதமர் வேட்பாளராக முன்னிறுத்தப்படுவாரா என்பது குறித்த பல்வேறு கேள்விகளுக்கு விரிவாகப் பதிலளித்தார்.

தமிழ்நாடு சுற்றுலாத்துறையை வளர்ச்சிப் பாதைக்குக் கொண்டு செல்லும் நோக்கில் பல்வேறு துரித நடவடிக்கைகள் எடுக்கப்பட்டு வருகின்றன. இதன் ஒரு பகுதியாக, வரலாற்றுச் சிறப்புமிக்க மகாபலிபுரத்தை மேம்படுத்த ரூ.200 கோடி நிதி ஒதுக்கப்பட்டுள்ளது. ஆன்மிகச் சுற்றுலா, இயற்கைச் சுற்றுலா, சூழலியல் சுற்றுலா மற்றும் வேளாண்மைச் சுற்றுலா எனப் பல பிரிவுகளின் கீழ் திட்டங்கள் விரைவுபடுத்தப்பட்டு வருகின்றன. கங்கை மற்றும் தாமிரபரணி ஆறுகளை இணைக்கும் முதற்கட்டப் பணிகளுக்காக ரூ.60 கோடியும், நாகூர், வேளாங்கண்ணி, திருக்கடையூர் ஆகிய ஆன்மீகத் தலங்களை இணைக்கும் ஒருங்கிணைந்த சிறப்புத் திட்டத்திற்கும் நிதி ஒதுக்கப்பட்டுள்ளது.

சுற்றுலாத்துறை என்பது வனத்துறை, இந்து சமய அறநிலையத்துறை எனப் பல துறைகளுடன் இணைந்து செயல்படுவதால், அத்துறைகளிடமிருந்து தடையில்லா சான்றிதழ் (NOC) பெறுவதில் சில நடைமுறைத் தாமதங்கள் ஏற்படுகின்றன. இப்பிரச்சினை முதலமைச்சரின் கவனத்திற்குக் கொண்டு செல்லப்பட்டு, உயர்மட்ட அளவில் கமிட்டி அமைத்து உடனுக்குடன் அனுமதி வழங்க நடவடிக்கைகள் மேற்கொள்ளப்பட்டு வருகின்றன. மேலும், சில முக்கிய திட்டங்களுக்காக மத்திய அரசிடமும் நிதி கோரப்பட்டுள்ளது.

தமிழகத்திலிருந்து ஒருவர் பிரதமராக வர வேண்டும் என அமைச்சர் ஆதவ் அர்ஜுனா கூறியது அவருடைய தனிப்பட்ட நிலைப்பாடு. தென்னிந்தியாவிற்குப் பிரதிநிதித்துவம் வேண்டும் என்ற நோக்கில் அவர் பேசியிருக்கலாம். ஆனால், அனைவரையும் அரவணைத்துச் செல்லும் ராகுல் காந்திதான் 2029-ஆம் ஆண்டு நாடாளுமன்றத் தேர்தலில் பிரதமர் வேட்பாளர். முதலமைச்சர் விஜய் பிரதமர் வேட்பாளராக முன்னிறுத்தப்படுவாரா? என்பது வெறும் யூகம் மட்டுமே; அதற்குப் பதிலளிக்க முடியாது.

வரவிருக்கும் உள்ளாட்சித் தேர்தலில் காங்கிரஸ் கட்சி சார்பில் ‘கை’ சின்னத்தில் போட்டியிட்டு அமோக வெற்றி பெறத் தேவையான அனைத்து களப்பணிகளும் தீவிரமாக மேற்கொள்ளப்பட்டு வருகின்றன என்று அமைச்சர் ராஜேஷ் குமார் தெரிவித்தார்.

#ChiefMinisterVijay #ThalapathyVijay #MinisterRajeshKumar #RahulGandhi #Congress #AadhavArjuna #TamilNaduTourism #Mahabalipuram #Coimbatore #TNPolitics #TamilNaduNews #ViralNewsTN #TrendingTN #LatestNewsTN #TNNewsUpdates