பல தசாப்தங்களாகக் காத்திருக்கும் மன்னார் மற்றும் ராமேஸ்வரம் இடையிலான பயணிகள் கப்பல் சேவையை மீண்டும் ஆரம்பிப்பதற்கான முதற்கட்ட சாத்தியக்கூறு ஆய்வுகளை (Pre-feasibility study) அரசாங்கம் ஆரம்பித்துள்ளதாகத் துறைமுகங்கள் மற்றும் சிவில் விமானப் போக்குவரத்து அமைச்சர் அநுர கருணாதிலக்க இன்று நாடாளுமன்றத்தில் தெரிவித்தார்.
இக் கப்பல் சேவைக்கான பூர்வாங்க ஆய்வுகளை நடத்துவதற்கு அமைச்சரவையின் அனுமதி கிடைத்துள்ளதாகவும், தற்போது அந்த ஆய்வுகள் முன்னெடுக்கப்பட்டு வருவதாகவும் அமைச்சர் குறிப்பிட்டார்.
விரைவில் நடவடிக்கை: இந்த ஆய்வுகளின் முடிவுகள் சாதகமாக அமையும் பட்சத்தில், இரு நாடுகளுக்கும் இடையிலான கப்பல் சேவையை மிக விரைவில் ஆரம்பிக்கத் தேவையான நடவடிக்கைகள் எடுக்கப்படும் என அவர் உறுதியளித்தார்.
குறைந்த செலவில் போக்குவரத்து: இந்தச் சேவை ஆரம்பிக்கப்படுவதன் மூலம், இரு இடங்களுக்கும் இடையிலான பயணிகள் மற்றும் சரக்கு போக்குவரத்துச் செலவு பெருமளவில் குறையும் என எதிர்பார்க்கப்படுகிறது.
ஆன்மீகச் சுற்றுலா மேம்பாடு: இந்தியா மற்றும் இலங்கை ஆகிய இரு நாடுகளுக்கும் இடையிலான ஆன்மீகச் சுற்றுலாவை (Religious Tourism) ஊக்குவிக்க இக் கப்பல் சேவை ஒரு பாலமாக அமையும் என அமைச்சர் சுட்டிக்காட்டினார்.
நாடாளுமன்ற உறுப்பினர் செல்வம் அடைக்கலநாதன் எழுப்பிய கேள்விக்கு பதிலளிக்கும் போதே அமைச்சர் இந்தத் தகவல்களை வெளியிட்டார். தலைமன்னார் – ராமேஸ்வரம் இடையிலான வரலாற்றுப் புகழ்மிக்க இக் கப்பல் சேவை மீண்டும் ஆரம்பிக்கப்படுவது வடபகுதி மக்களின் நீண்டகாலக் கனவாக இருந்து வருகின்றமை குறிப்பிடத்தக்கது.
