சென்னை
தமிழ்நாடு சட்டப்பேரவை கூட்டத்தொடரில் தவெக அரசு பொறுப்பேற்று 100 நாட்கள் நிறைவடைந்துள்ள நிலையில், போதைப்பொருள் நடமாட்டம், சட்டம்-ஒழுங்கு பிரச்சனை மற்றும் மாணவர் படுகொலைகள் தொடர்பாகத் திமுக மற்றும் ஆளுங்கட்சியான தவெக இடையே மிகக் கடுமையான காரசார விவாதம் நடைபெற்றது.
“விளம்பரம் மட்டுமே செய்கிறது தவெக அரசு” – உதயநிதி குற்றச்சாட்டு:
சட்டசபையில் கோவை மாணவர் அமுதன் படுகொலை, திருவொற்றியூர் மாணவர் தனுஷ் கொலை, மேகமலை விவகாரம், கர்நாடகாவில் 3 தமிழர்கள் சுட்டுக்கொலை உள்ளிட்ட பிரச்சனைகள் குறித்துத் திமுக சார்பில் கவன ஈர்ப்புத் தீர்மானம் கொண்டுவரப்பட்டது. இதில் பேசிய எதிர்க்கட்சித் தலைவர் உதயநிதி ஸ்டாலின், “கோவை அமுதன் கொலை கோஷ்டி மோதல் அல்ல; போதைப்பொருள் கும்பல் குறித்துக் காவல்துறையிடம் தகவல் கொடுத்ததால் திட்டமிட்டு நடத்தப்பட்ட படுகொலை. இதேபோல் திருவொற்றியூரிலும் போதையைத் தட்டிக்கேட்ட பள்ளி மாணவர் தனுஷ் குமார் கொல்லப்பட்டுள்ளார். போதைப்பொருள் தடுப்புப் படை அமைத்துள்ளதாகக் பல கோடி ரூபாய்க்கு விளம்பரம் செய்யும் இந்த அரசு, களத்தில் சட்டம்-ஒழுங்கைக் கட்டுப்படுத்தத் தவறிவிட்டது,” என்று குற்றம்சாட்டினார்.
“முந்தைய ஆட்சியில் போதைப்பொருள் அதிகம்” – அமைச்சர் நிர்மல் குமார் பதிலடி:
இதற்கு விளக்கமளித்துப் பேசிய அமைச்சர் நிர்மல் குமார், “கோவை அமுதன் கொலை இரு குழுக்களுக்கு இடையேயான பழிவாங்கும் நோக்கில் நடந்தது. இதில் தொடர்புடைய 17 பேர் கைது செய்யப்பட்டுள்ளனர். இந்த வழக்கில் போதைப்பொருள் பயன்படுத்தியதாக எவ்விதத் தகவலும் இல்லை. கடந்த திமுக ஆட்சியில்தான் போதைப்பொருள் நடமாட்டம் அதிகமாக இருந்தது; போதைப்பொருள் கடத்தலில் கைதான ஜாஃபர் சாதிக், அப்போது முதலமைச்சர் குடும்பத்தினருடனும் அமைச்சர்களுடனும் எவ்வளவு நெருக்கமாக இருந்தார் என்பது அனைவருக்கும் தெரியும்,” என்று சாடினார். இதற்குப் பதிலளித்த உதயநிதி ஸ்டாலின், “குற்றச்சாட்டு எழுந்த உடனே அவர் நீக்கப்பட்டு கைது செய்யப்பட்டார்; ஆனால் உங்கள் ஆட்சியில் என்ன நடக்கிறது?” எனக் கேள்வி எழுப்பினார்.
அமைச்சர்கள் சரத்குமார், ஆதவ் அர்ஜுனா காரசாரம்:
தொடர்ந்து ஐபிஎல் போட்டி மாத்திரை விவகாரம் குறித்து அமைச்சர் சரத்குமாரிடம் உதயநிதி கேள்வி எழுப்ப, அதற்குப் பதிலளித்த அமைச்சர் சரத்குமார், “அது திமுக ஆட்சியில் நடந்த நிகழ்வு; ஆதாரம் இல்லாமல் பேசக் கூடாது,” என்றார். இதனையடுத்துப் பேசிய அமைச்சர் ஆதவ் அர்ஜுனா, “தற்போதைய தவெக ஆட்சியில் போதைப்பொருள் விழிப்புணர்வுக்காக மட்டும் ரூ.264 கோடி நிதி ஒதுக்கப்பட்டுள்ளது. போதைப்பொருள் புழக்கம்தான் கடந்த தேர்தலில் திமுக அடைந்த படுதோல்விக்கு முக்கியக் காரணம்,” என்று விமர்சித்தார்.
திமுக வெளிநடப்பு:
போதைப்பொருள் விவகாரத்தில் ஆளுங்கட்சியினர் மற்றும் எதிர்க்கட்சியினர் இடையே தொடர்ச்சியாகக் காரசார வாக்குவாதம் நீடித்த நிலையில், திமுக எழுப்பிய கேள்விகளுக்கு அரசின் சார்பில் முறையான மற்றும் திருப்திகரமான பதில் அளிக்கப்படவில்லை எனக் கூறி, தவெக அரசைக் கண்டித்து எதிர்க்கட்சித் தலைவர் உதயநிதி ஸ்டாலின் தலைமையில் திமுக சட்டமன்ற உறுப்பினர்கள் அவையிலிருந்து வெளிநடப்பு செய்தனர்.
#TNAssembly #UdhayanidhiStalin #TVKGovernment #ChiefMinisterVijay #JosephVijay #ThalapathyVijay #DMK #DrugIssueTN #MinisterNirmalKumar #AadhavArjuna #Sarathkumar #TamilNaduNews #ChennaiNews #TNPolitics #ViralNewsTN #TrendingTN #LatestNewsTN #TNNewsUpdates
