தனது பெற்றோரைக் கொலை செய்த குற்றத்திற்காகத் தேடப்பட்டு வரும் 46 வயதுடைய நபர் ஒருவர், கடந்த வெள்ளிக்கிழமை மதியம் தெற்கு எட்டோபிகோக் (Etobicoke) குடியிருப்புப் பகுதியில் ஓடிச் செல்லும் காட்சிகள் அங்குள்ள வீடொன்றின் ‘டோர் பெல்’ (Doorbell) பாதுகாப்பு கேமராவில் பதிவாகியுள்ளன. அவரைத் தேடும் பணிகள் தீவிரமாக முன்னெடுக்கப்பட்டு வருகின்றன.
CTV நியூஸ் ஊடகத்திற்குக் கிடைத்த அந்தப் பாதுகாப்பு கேமரா காட்சிகளில் இருப்பவர் தேடப்பட்டு வரும் ஜோர்டான் சாங்வின் (Jordan Sangwin) தான் என்பதை பீல் பிராந்திய காவல்துறையினர் சனிக்கிழமை உறுதிப்படுத்தியுள்ளனர்.
வெள்ளிக்கிழமை பிற்பகல் 3:06 மணியளவில், சாம்பல் நிற ஹூடி (Grey hoodie), கரும் நிறக் காற்சட்டை அணிந்து, கையில் ஒரு கருப்பு நிற டஃபெல் பையை (Duffel bag) ஏந்தியவாறு, சாங்வின் ‘யாக்டர்ஸ் லேன்’ (Yachters Lane) மற்றும் ‘லேக் ஷோர் பொலிவார்ட் வெஸ்ட்’ (Lake Shore Boulevard West) பகுதிக்கு அருகிலுள்ள ஒரு வீட்டைக் கடந்து ஓடுவது கேமராவில் பதிவாகியுள்ளது.
இதற்கடுத்த மூன்று நிமிடங்களில், காவல்துறை அதிகாரி ஒருவர் நடந்து சென்றுகொண்டே, சந்தேகநபர் தென்பட்டது குறித்து தனது வாக்கி-டாக்கியில் (Radio) தகவல் தெரிவிக்கும் சத்தமும் கேட்கிறது.
பிற்பகல் 3:11 மணியளவில், துப்பாக்கிகளை ஏந்தியவாறு மேலும் இரண்டு அதிகாரிகள் அந்தப் பகுதியை நோக்கி நகர்வதும், அவர்களில் ஒருவர் “அவன் இதைக் கடந்து குதித்திருக்கலாம், அல்லது ஒரு வீட்டின் பின்வளவினூடாகச் சென்றிருக்கலாம்” என்று கூறுவதும் அந்த டோர் பெல் கேமராவில் பதிவாகியுள்ளது.
கடந்த ஜூன் 18 ஆம் தேதி மிசிசாகாவின் (Mississauga) ‘லேக்ஷோர் ரோட் ஈஸ்ட்’ மற்றும் ‘ஹுரோன்டாரியோ ஸ்ட்ரீட்’ பகுதிக்கு அருகிலுள்ள அவர்களது இல்லத்தில் வைத்து, தனது பெற்றோரான கரோல் (Carol – 70) மற்றும் கார்வுட் (Garwood – 71) ஆகியோரை ஜோர்டான் சாங்வின் கொலை செய்ததாகக் குற்றம் சுமத்தப்பட்டுள்ளது. அன்றிலிருந்து தப்பியோடியுள்ள அவரை, பீல் மற்றும் டொராண்டோ காவல்துறையினர் இணைந்து தேடி வருகின்றனர்.
கொலை நடந்த இரண்டு நாட்களுக்குப் பிறகு, அதாவது ஜூன் 21 அன்று எடுக்கப்பட்ட சாங்வினின் இரண்டு புதிய புகைப்படங்களையும் காவல்துறையினர் வெள்ளிக்கிழமை வெளியிட்டுள்ளனர். “விசாரணையின் இரகசியத் தன்மையைப் பாதுகாப்பதற்காக” இப்புகைப்படங்கள் எங்கு எடுக்கப்பட்டன என்ற விபரத்தைக் காவல்துறையினர் வெளியிடவில்லை.
அவருக்கு எதிராக இரண்டு முதல்தரக் கொலைக் குற்றச்சாட்டுகளின் (First-degree murder) கீழ் கனடா தழுவிய பிடியாணை (Canada-wide warrant) பிறப்பிக்கப்பட்டுள்ளது.
சாங்வின் ஆயுதம் ஏந்திய ஆபத்தான நபராகக் கருதப்படுவதால், அவர் தென்பட்டால் பொதுமக்கள் யாரும் அவரை அணுகாமல் உடனடியாக 911 என்ற அவசர எண்ணிற்கு அழைக்குமாறும், அப்பகுதி குடியிருப்பாளர்கள் தொடர்ந்து விழிப்புடன் இருக்குமாறும் காவல்துறையினர் அவசரமாகக் கேட்டுக்கொண்டுள்ளனர்.
