கிளிநொச்சியில் விடுதலைப்புலிகளின் பயிற்சி முகாம் இயங்குவதாக உண்மைக்கு புறம்பாக தகவல்களை வெளியிட்ட நபர் குறித்து பொதுமக்கள் பாதுகாப்பு அமைச்சர் ஆனந்த விஜயபால நாடாளுமன்றத்தில் பல விடயங்களை தெளிவுபடுத்தினார்
அமைச்சர் மேலும் தெரிவித்துள்ளதாவது
பளையில் விடுதலைப்புலிகளின் பயிற்சி முகாம் இயங்குகின்றது என்ற தகவலை பரப்பியவர் பொரலஸ்கமுவையை சேர்ந்த சங்கீத் ஜயசேகர.
சங்கீத் ஜயசேகரவிடமிருந்து இரண்டு போலி அடையாள அட்டைகள் மீட்கப்பட்டுள்ளன,அவர் ஏழு முகவரிகளை பயன்படுத்தியுள்ளார்.
அவருக்கு எதிராக ஏற்கனவே மோசடி உட்பட மூன்று குற்றவியல் குற்றச்சாட்டுகள் உள்ளன.
சந்தேகநபர் தான் ஒரு மருத்துவர் என போலி நாடகமாடியுள்ளார்.அவர் கடந்தகாலங்களில் சில அமைச்சரவை பணியார்களின் ஆலோசகராக பணியாற்றியவர்,இந்த நியமனங்கள் குறித்தும் அதிகாரிகள் விசாரணைகளை மேற்கொண்டுள்ளனர்.
பளையில் விடுதலைப்புலிகளின் பயிற்சி முகாம் இயங்குவதாக அவர் தெரிவித்த இடத்தை பாதுகாப்பு படையினரும் பொலிஸாரும் சோதனையிட்டனர் ஆனால் அதற்கான ஆதாரங்கள் எவையும் கிடைக்கவில்லை.உண்மையில் அது ஒரு பயிர்ச்செய்கை இடம்பெறும் பகுதி.
சமூகங்களிடையே பதற்றத்தை ஏற்படுத்தவதற்காக சந்தேகநபர் திட்டமிட்டு செயற்பட்டார்.பயங்கரவாதத்திற்கோ அல்லது இன சமூக பதற்றங்களை தூண்டும் முயற்சிகளிற்கோ ஒருபோதும் இடமளிக்க மாட்டோம் என அமைச்சர் குறிப்பிட்டுள்ளார்.
