இவ்வருடத்தில் இதுவரை இலங்கையில் 22 துப்பாக்கிச் சூட்டுச் சம்பவங்கள் பதிவாகியுள்ளதாகவும், இவற்றில் 15 பேர் உயிரிழந்துள்ளதுடன் 12 பேர் காயமடைந்துள்ளதாகவும் தெரிவிக்கப்பட்டுள்ளது. இந்தச் சம்பவங்களில் பாதியளவிலான — மொத்தம் 10 சம்பவங்கள் — ஜூலை 11 முதல் ஜூலை 25 வரையிலான இரண்டு வார காலப்பகுதிக்குள்ளேயே பதிவாகியுள்ளன.
இக்காலப்பகுதியில் இடம்பெற்ற 10 துப்பாக்கிச் சூட்டுச் சம்பவங்களில் மூவர் உயிரிழந்துள்ளதுடன் ஐவர் காயமடைந்துள்ளனர். இச்சம்பவங்கள் இலக்கு வைக்கப்பட்ட கொலைகள் மற்றும் ஒழுங்கமைக்கப்பட்ட குற்றக் குழுக்களுடன் தொடர்புடைய தாக்குதல்கள் எனப் பல்வேறு வகைகளாக அமைந்துள்ளன. ஏனைய சில சம்பவங்களில் சொத்துக்களுக்குச் சேதம் ஏற்பட்டுள்ளதோடு, காயங்கள் எதுவும் ஏற்படுத்தப்படாமல் நபர்கள் இலக்கு வைக்கப்பட்டுள்ளனர். துப்பாக்கிச் சூட்டுச் சம்பவங்களுடன் தொடர்புடைய பலரை பொலிஸார் கைது செய்துள்ள நிலையில், ஏனைய வழக்குகள் தொடர்பிலான விசாரணைகள் தொடர்கின்றன.
இதனிடையே, நாடு முழுவதும் அண்மைக்காலமாக இடம்பெற்று வரும் துப்பாக்கிச் சூட்டுச் சம்பவங்களுக்குப் போட்டி போதைப்பொருள் கடத்தல் வலையமைப்புகளே காரணம் எனத் தெரிவித்துள்ள இலங்கை பொலிஸார், இத்தாக்குதல்கள் முதன்மையாக ஒழுங்கமைக்கப்பட்ட குற்றக் குழுக்களின் தகராறுகள், ஒப்பந்தக் கொலைகள் (Contract killings) மற்றும் போட்டிக்குழுக்களை அச்சுறுத்தும் முயற்சிகளாலேயே தூண்டப்படுவதாகக் குறிப்பிட்டுள்ளனர்.
கடந்த இரண்டு வாரங்களில் பதிவான பத்து துப்பாக்கிச் சூட்டுச் சம்பவங்கள் மற்றும் சனிக்கிழமை இடம்பெற்ற சமீபத்திய சம்பவம் குறித்துக் கேட்கப்பட்ட கேள்விகளுக்குப் பதிலளித்த பொலிஸ் ஊடகப் பேச்சாளர் உதவிப் பொலிஸ் அத்தியட்சகர் (ASP) எஃப்.யு. வூட்லர், இதுவரை விசாரிக்கப்பட்ட ஒவ்வொரு சம்பவமும் ஒழுங்கமைக்கப்பட்ட குற்றங்கள் மற்றும் சட்டவிரோத போதைப்பொருள் வர்த்தகத்துடன் தொடர்பைக் காட்டியுள்ளதாகத் தெரிவித்தார்
