யாழ்ப்பாணம் திக்கம் வடிசாலையை மீள இயக்கி, ஏற்றுமதியை இலக்காகக் கொண்ட உற்பத்தி நிலையமாக மாற்றுவதற்கான நடவடிக்கைகள் முன்னெடுக்கப்படவுள்ளதாக கடற்றொழில், நீரியல் மற்றும் கடல்வளங்கள் அமைச்சர் இராமலிங்கம் சந்திரசேகர் தெரிவித்துள்ளார்.

திக்கம் வடிசாலையை மீள இயக்குவது தொடர்பான விசேட கலந்துரையாடல், அமைச்சர் இராமலிங்கம் சந்திரசேகர், வடக்கு மாகாண ஆளுநர் நா. வேதநாயகன் மற்றும் பெருந்தோட்ட மற்றும் சமூக உட்கட்டமைப்பு வசதிகள் பிரதி அமைச்சர் சுந்தரலிங்கம் பிரதீப் ஆகியோரின் இணைத் தலைமையில் யாழ்ப்பாணத்திலுள்ள ஆளுநர் செயலகத்தில் நடைபெற்றது.

இதன்போது, திக்கம் வடிசாலையை மையப்படுத்திப் பனை அபிவிருத்திச் சபைக்கும் தனியார் நிறுவனமொன்றுக்கும் இடையில் மேற்கொள்ளப்பட்டுள்ள ஒப்பந்தத்தின் சட்டவலுவை ஆராய்ந்து, சட்ட மாஅதிபர் திணைக்களத்தின் ஆலோசனையைப் பெற்றுக்கொள்ளவும் தீர்மானிக்கப்பட்டது.

குறித்த ஒப்பந்தம் கடந்த 2022ஆம் ஆண்டு மேற்கொள்ளப்பட்டதுடன், 25 ஆண்டுகள் நடைமுறையில் இருக்கும் வகையில் அமைக்கப்பட்டுள்ளதாகப் பனை அபிவிருத்திச் சபையின் தலைவர் தெரிவித்துள்ளார்.

எனினும், ஒப்பந்தம் மேற்கொள்ளப்பட்ட பின்னர் வடிசாலை மூடப்பட்டமை மற்றும் அதனைமீள இயக்குவதில் காணப்படும் சட்டச் சிக்கல்கள் தொடர்பில் விரிவாக ஆராய வேண்டியுள்ளதாகவும் அவர் குறிப்பிட்டுள்ளார்.

இதேவேளை, கடந்த காலங்களில் திக்கம் வடிசாலை முடங்கிய நிலைக்குத் தள்ளப்பட்டுள்ளதாகத் தெரிவித்த பிரதி அமைச்சர் சுந்தரலிங்கம் பிரதீப், கூட்டுறவுச் சங்கத்தினருக்குத் தெரியாமல் தனியார் நிறுவனத்துடன் ஒப்பந்தம் மேற்கொள்ளப்பட்டதாகக் கூறப்படும் விடயம் தொடர்பில் முழுமையான விசாரணை நடத்த அரசாங்கம் உறுதியாக இருப்பதாகத் தெரிவித்துள்ளார்.

எனினும், ஒப்பந்தம் தொடர்பான சிக்கல்களைக் காரணமாகக் கொண்டு வடிசாலையைத் தொடர்ந்து முடங்கிய நிலையில் வைத்திருக்க முடியாது எனக் குறிப்பிட்ட அவர், அதனை மீள இயக்குவதற்கான தடைகளை நீக்கி, அனைவரும் ஒன்றிணைந்து செயற்பட வேண்டுமென வலியுறுத்தியுள்ளார்.

வடக்கு மாகாண ஆளுநர் நா. வேதநாயகன் கருத்துத் தெரிவிக்கையில், தற்போதைய ஒப்பந்தத்தின் காரணமாகக் கூட்டுறவுச் சங்கத்தினருக்குக் கிடைக்க வேண்டிய நன்மைகள் கிடைக்காத நிலை காணப்படுவதாகச் சுட்டிக்காட்டியுள்ளார்.

எனவே, ஒப்பந்தத்தின் சட்டவலுவை ஆராய்வதுடன், அனுமதிப்பத்திரத்தைச் சங்கத்தின் வசம் வைத்துக்கொண்டு தனியார் முதலீட்டாளர்களுடன் இணைந்து வடிசாலையை இயக்குவதற்கான சாத்தியக்கூறுகளையும் ஆராய வேண்டுமென அவர் தெரிவித்துள்ளார்.

இதன்போது, வடமராட்சி பனை, தென்னை வளக் கூட்டுறவுச் சங்கங்களின் பிரதிநிதிகள், தமது கொத்தணியின் பெயரில் அனுமதிப்பத்திரம் வழங்கப்பட்டால், ஏற்றுமதியை இலக்காகக் கொண்ட முதலீட்டாளர்களுடன் இணைந்து வடிசாலையைச் செயற்படுத்த முடியும் எனத் தெரிவித்துள்ளனர்.

கலந்துரையாடலின் முடிவில், திக்கம் வடிசாலையை மீள இயக்குவதற்கான சாத்தியமான அனைத்து வழிகளையும் ஆராய்ந்து, ஏற்றுமதியை இலக்காகக் கொண்ட உற்பத்தி நடவடிக்கைகளை முன்னெடுப்பதற்கான திட்டங்களைத் தயாரிப்பதற்கும், இதற்கான நடவடிக்கைகளைத் துரிதப்படுத்துவதற்கும் இணக்கம் காணப்பட்டுள்ளது.