சென்னை
தமிழ்நாடு சட்டப்பேரவைக் கூட்டத்தொடரில் தமிழ்த்தாய் வாழ்த்து கட்டாயம் பாடப்பட வேண்டும் என முதலமைச்சர் கொண்டு வந்த அரசினர் தனித் தீர்மானத்தை ஆதரித்துப் பள்ளிக்கல்வித்துறை அமைச்சர் ராஜ்மோகன் நெகிழ்ச்சியுடனும் பெருமிதத்துடனும் உரையாற்றினார்.
சட்டப்பேரவையில் அமைச்சர் ராஜ்மோகன் பேசியதாவது:
தாய் மொழியையே பெயராக வைக்கும் தமிழ்க் கூட்டம்!
“உலகில் உள்ள பெரும்பாலான மக்கள் தங்களின் குழந்தைகளுக்குத் தங்களது தாய் மொழியில் பெயர் வைப்பார்கள். ஆனால், தங்கள் தாய் மொழியையே குழந்தைகளுக்குப் பெயராக வைக்கக்கூடிய ஒரே கூட்டம் இந்தத் தமிழ்க் கூட்டம்தான். தமிழரசன், தமிழழகன், தமிழழகி எனத் தங்கள் தாய்மொழியின் பெயரையே பிள்ளைகளுக்குச் சூட்டி அழகு பார்க்கக்கூடிய உன்னதமான கூட்டம் நம் தமிழ்க் கூட்டம். அத்தகைய சிறப்புமிக்க தமிழ்க் கூட்டம், தனது தமிழ்த் தாயை வாழ்த்திப் பாடும் சிறப்புமிக்க பாடல்தான் தமிழ்த்தாய் வாழ்த்து.”
தமிழ்த்தாய் வாழ்த்து:
“ஆனால், இந்தப் பாடல் வெறும் தமிழ்த்தாய்க்கான வாழ்த்துப் பாடல் மட்டுமல்ல; இது இந்த ஒட்டுமொத்தப் பூமித்தாயையும் வாழ்த்தும் வாழ்த்துப் பாடலாகும். இந்த நிலம், அந்த நிலத்தைச் சுற்றியுள்ள கடல்… அந்த நீல நிறக் கடலையே பூமித்தாய் தனக்குப் புடவையாகச் சுற்றியிருக்கிறாள் என்பதைத்தான் ‘நீராரும் கடலுடுத்த நிலமடந்தை’ என்ற வரிகள் உணர்த்துகின்றன. அந்தப் பூமித்தாய்க்கு ஒரு அழகான முகம் உள்ளது. ‘சீராரும் வதனமென’ என்பதில் வதனம் என்றால் முகம் என்று பொருள். அந்தச் சீராரும் வதனம் எதுவென்று உற்றுப் பார்த்தால், அது ‘திகழ்பரத கண்டமெனில்’, அதாவது இந்தப் பூமித்தாயின் முகம் பாரதத்தாய். அவளுக்குச் சிறு பிறை போன்றதொரு நெற்றி இருக்கிறது, அதுதான் தென்னிந்தியா. அந்த அழகிய நெற்றிக்கு மேலும் அழகு சேர்க்க அதில் வைக்கப்படுகிற ஒரு பொட்டுதான் தமிழ்நாடு என்கிற நமது தாய். அந்தப் பொட்டு வெறும் நெற்றிக்கு மட்டுமா வாசம் தருகிறது? இல்லை, எட்டுத் திக்கும் அதன் மணம் வீசுகிறது. அப்படி எட்டுத் திக்கும் புகழோடு வீற்றிருப்பவள்தான் நமது தமிழ்த் தாய். இத்தனை காலங்கள் கடந்துவிட்டால் எந்த ஒரு தாய்க்கும் வயதாகும்தானே!”
உலகத் தாய் வாழ்த்து:
“ஆனால், இத்தனையாயிரம் ஆண்டுகள் வளர்ந்த பின்னும் நீ எப்படி இன்னும் இவ்வளவு இளமையாக இருக்கிறாய்! உனது அந்த இளமையை நான் வாழ்த்துகிறேன் என்று தமிழை வாழ்த்தி, தமிழ்நாட்டை வாழ்த்தி, தென்னிந்தியாவைச் சொல்லி, பாரதத் தாயையும் வாழ்த்தி, ஒட்டுமொத்த உலகத் தாயையே வாழ்த்தும் இந்தத் தமிழ்த்தாய் வாழ்த்தை, ஒரு ‘உலகத் தாய் வாழ்த்து’ என்று சொல்வதில் நான் பெருமிதம் கொள்கிறேன். இருகரம் கூப்பி வணங்கி வாழ்த்துகிறேன்.”
“இனிமேல் நடைபெறும் அனைத்துப் பொது நிகழ்ச்சிகளிலும், கல்வி நிலையங்களிலும், எங்கெல்லாம் தமிழர்கள் வாழ்கிறார்களோ, அங்கெல்லாம் தமிழ்த்தாய் வாழ்த்து மட்டுமே முதலில் கம்பீரமாக ஒலிக்கும். அதற்காகச் சட்டப்பேரவையில் இந்த வரலாற்றுச் சிறப்புமிக்க தீர்மானத்தை நிறைவேற்றியவர் என்ற முறையில், சரித்திரத்தில் முதலமைச்சர் விஜய்யின் பெயரே என்றென்றும் நிலைத்து நிற்கும். அவரை வாழ்த்தி, இந்தச் சிறப்புத் தீர்மானத்தை நான் முழுமையாக வரவேற்கிறேன்.”
இவ்வாறு அமைச்சர் ராஜ்மோகன் தனது உணர்ச்சிகரமான உரையைப் பதிவு செய்தார்.
#TamilThaiVaazhthu #MinisterRajmohan #TNAssembly #ChiefMinisterVijay #TVKGovernment #TamilNaduNews #Chennai #TamilLanguage #TamilCulture #TrendingTN #ViralNewsTN #TNPolitics #LatestNewsTN
