சென்னை

கோவில் திருவிழாக்களில் ஆபாசமாக உடை அணிந்து கரகாட்டம் உள்ளிட்ட நடனங்கள் ஆடினால், தாமாக முன்வந்து கோர்ட்டு அவமதிப்பு வழக்குத் தொடரப்படும் என்று சென்னை உயர்நீதிமன்றம் கடும் எச்சரிக்கை விடுத்துள்ளது.

அரியலூர் மாவட்டம், உடையார்பாளையம் பாப்பாத்தம்மன் கோவில் திருவிழாவில் கரகாட்டம் உள்ளிட்ட கலை நிகழ்ச்சிகள் நடத்த போலீசார் அனுமதி மறுத்ததை எதிர்த்து சென்னை உயர்நீதிமன்றத்தில் வழக்குத் தொடரப்பட்டது. இந்த வழக்கு நீதிபதி வி.லட்சுமிநாராயணன் முன்பு விசாரணைக்கு வந்தது. அப்போது குறுக்கிட்ட நீதிபதி, “கரகாட்டம் ஆடும் பெண்களின் உடைகளைப் பார்த்திருக்கிறீர்களா? மிகவும் ஆபாசமாக உள்ளது. இதுபோன்ற ஆபாச நடனத்தை எப்படி அனுமதிக்க முடியும்? தமிழ்நாட்டை விட ஆந்திர மாநில கரகாட்டம் இன்னும் மோசமாக உள்ளது,” என்று விமர்சித்தார்.

அப்போது போலீஸ் தரப்பில் ஆஜரான வழக்கறிஞர், ஆபாச நடனம் மட்டுமின்றி, அரசியல் ரீதியான கோஷங்களும் எழுப்பப்படும் என்ற அச்சத்தாலேயே அனுமதி மறுக்கப்பட்டதாகத் தெரிவித்தார். இதற்குப் பதிலளித்த நீதிபதி, “அரசியல் பேச நாடு முழுவதும் அனைவருக்கும் உரிமை உள்ளது. அந்த உரிமை உடையார்பாளையத்திற்கும் உண்டு. ஆனால் ஆபாச நடனத்திற்குத்தான் அனுமதி வழங்க முடியாது,” என்று திட்டவட்டமாகத் தெரிவித்தார்.

இதையடுத்து, கடந்த ஜூன் மாதம் இதேபோன்ற ஒரு நிகழ்ச்சிக்கு நீதிமன்றம் நிபந்தனையுடன் அனுமதி வழங்கியதை மனுதாரர் தரப்பு சுட்டிக்காட்டியது. அதைப் படித்துப் பார்த்த நீதிபதி, உடையார்பாளையம் கோவில் திருவிழாவிற்கும் நிபந்தனையுடன் கரகாட்டத்திற்கு அனுமதி வழங்கினார்.

அதேசமயம் ஒரு அதிரடி எச்சரிக்கையையும் அவர் விடுத்தார். “கரகாட்டக் கலைஞர்கள் ஆபாசமாக உடை அணிந்து நடனம் ஆடினால், போலீசார் சட்டப்படி நடவடிக்கை எடுக்க வேண்டும். ஆபாசமாக ஆடியதற்கான ஆதாரங்கள் தாக்கல் செய்யப்பட்டால், அதன் அடிப்படையில் நீதிமன்றம் தாமாக முன்வந்து கோர்ட்டு அவமதிப்பு வழக்கை விசாரணைக்கு எடுத்து, சம்பந்தப்பட்டவர்கள் மீது கடுமையான நடவடிக்கை எடுக்கும்,” என்று நீதிபதி உத்தரவிட்டார்.

#MadrasHighCourt #Karakattam #TempleFestival #JusticeVLakshminarayanan #ObsceneDance #Ariyalur #TamilNaduNews #Chennai #ViralNewsTN #TrendingTN #LatestNewsTN #TNNewsUpdates