கனடாவின் பிரிட்டிஷ் கொலம்பியா மாகாணத்தில் தாயும் மகளும் கரடித் தாக்குதலில் உயிரிழந்த சம்பவம் தொடர்பாக நான்கு கிரிஸ்லி (Grizzly) கரடிகள் கொல்லப்பட்டுள்ளன.

பெல்லா கூலா (Bella Coola) பகுதியில் உள்ள பாதை ஒன்றில் பிற்பகல் வேளையில் நடைபயிற்சி மேற்கொண்ட ஜெனிஃபர் பால்கராஸ் (Jennifer Balcarras – 48) மற்றும் அவரது மகள் சேலா ரீட் (Selah Reed – 20) ஆகியோர் இம்மாத தொடக்கத்தில் உயிரிழந்தனர்.

அவர்களது மரணம் தொடர்பில் பிரிட்டிஷ் கொலம்பியா வனவிலங்கு பாதுகாப்பு சேவை (BCCOS) விசாரணையைத் தொடங்கியது. தடயவியல் சோதனைகளின் மூலம், பெண் கரடி ஒன்றும் அதன் மூன்று குட்டிகளுமே இத்தாக்குதலுக்குக் காரணம் என்பது உறுதியானது.

பொதுமக்களின் பாதுகாப்பைக் கருதி, “மாகாண மனித-வனவிலங்கு மோதல் எதிர்வினை வழிகாட்டுதல்களின்படி” அந்த நான்கு கரடிகளும் அழிக்கப்பட்டதாக பிசிசிஓஎஸ் (BCCOS) ஆய்வாளர் ஜெஃப் டயர் (Jeff Tyre) செவ்வாய்க்கிழமை வெளியிட்ட புதுப்பிப்பில் தெரிவித்தார்.

“விசாரணையின் சான்றுகள் மற்றும் விலங்குகளின் டிஎன்ஏ (DNA) ஆகியவை பகுப்பாய்வு செய்யப்பட்டு, இத்தாக்குதலுக்கும் பெண் கரடி மற்றும் அதன் மூன்று குட்டிகளுக்கும் நேரடித் தொடர்பு இருப்பது உறுதியாக நிரூபிக்கப்பட்டுள்ளது” என்றும் அவர் மேலும் கூறினார்.

இத்தாக்குதல் “பெரும்பாலும் இரையை வேட்டையாடும் நடத்தையை (predatory behaviour) வெளிப்படுத்துவதாக இருந்தது” எனக் குறிப்பிட்ட டயர், இத்தகைய சம்பவங்கள் “மிகவும் அரிதானவை” என்றும் சுட்டிக்காட்டினார்.

கடினமான நிலப்பரப்பு மற்றும் மோசமான வானிலைக்கு மத்தியிலும், கடந்த வாரத்தில் 12-க்கும் மேற்பட்ட வனவிலங்கு பாதுகாப்பு அதிகாரிகள் இந்த புலனாய்வு நடவடிக்கையில் ஈடுபட்டதாகவும் அவர் தெரிவித்தார்.

உயிரிழந்த ஜெனிஃபர் மற்றும் சேலா ஆகிய இருவரும் “ஒன்றாகவே நேரத்தைச் செலவிடும் நெருங்கிய தோழிகளைப் போல வாழ்ந்தவர்கள்” என்றும், பல பொதுவான பொழுதுபோக்குகளைப் பகிர்ந்து கொண்டவர்கள் என்றும் ஜெனிஃபரின் சகோதரர் ஜோஷ், சிபிசி (CBC) ஊடகத்திற்குத் தெரிவித்தார்.

“ஜெனி மலைப்பாதைகளில் நடைபயிற்சி மேற்கொள்ளும் போதெல்லாம், சேலாவும் அவளுக்கு அருகிலேயே இருப்பாள்” என்று அவர் கூறினார்.

இதே பெல்லா கூலா பகுதியில் 2025 ஆம் ஆண்டு பாடசாலைக் குழுவொன்றின் மீது நடத்தப்பட்ட தாக்குதலில் இந்த நான்கு கரடிகளுக்கும் தொடர்பில்லை என்பது டிஎன்ஏ பரிசோதனையில் உறுதி செய்யப்பட்டுள்ளதாக ஆய்வாளர் டயர் தெரிவித்தார்.

கடந்த ஆண்டு நவம்பர் மாதம் நடந்த அந்தச் சம்பவத்தில் 11 பேர் காயமடைந்ததுடன், அவர்களில் இருவர் பலத்த காயமடைந்தனர். ஆனால், அத்தாக்குதலுக்குக் காரணமான கரடி கண்டறியப்படவில்லை.

“சமீபத்திய கொடூரத் தாக்குதலில் ஈடுபட்ட கரடிகளைப் பிடித்து கருணைக்கொலை செய்துள்ளதாக பிரிட்டிஷ் கொலம்பியா வனவிலங்கு பாதுகாப்பு சேவை உறுப்பினர்கள் மூலம் இன்று அறிந்து கொண்டோம்” என நுஷால்க் சமூகத்தின் (Nuxalk Nation) தேர்ந்தெடுக்கப்பட்ட தலைவர் சாமுவேல் சூனர் (Samuel Schooner) வெளியிட்டுள்ள அறிக்கையில் தெரிவித்துள்ளார்.

“இந்தச் சம்பவத்திற்குத் தீர்வு காண அர்ப்பணிப்புடன் பாடுபட்ட பிரிட்டிஷ் கொலம்பியா வனவிலங்கு பாதுகாப்பு சேவைக்கு எங்களது நன்றிகளைத் தெரிவித்துக் கொள்கிறோம். கடந்த ஆண்டின் தாக்குதலில் இருந்து நாங்கள் மீண்டு வரும் வேளையில், இத்தாக்குதல் எங்களது சமூகத்தினரிடையே மீண்டும் பெரும் மனஉளைச்சலை ஏற்படுத்தியுள்ளது. பாதிக்கப்பட்டவர்களின் குடும்பத்தினருடன் எங்களது பிரார்த்தனைகள் எப்போதும் இருக்கும்” என்றும் அவர் குறிப்பிட்டுள்ளார்.