கனடாவின் நோவா ஸ்கோடியா மாகாணத்தில் உள்ள பிரிட்ஜ்வாட்டர் பகுதியில், ஆபத்தானவர் எனக் கருதப்படும் 30 வயதுடைய ஒருவரை பொலிஸார் தீவிரமாகத் தேடி வருகின்றனர்.

இந்தச் சம்பவம் குறித்த முக்கிய விபரங்கள் வருமாறு:

தேடப்படும் நபர் 30 வயதுடைய லத்தீப் தாக் எல் டின் (Latef Tag El Din) என அடையாளம் காணப்பட்டுள்ளார். இவர் திங்கட்கிழமை பிற்பகல் 2:45 மணியளவில் பிரிட்ஜ்வாட்டரில் உள்ள சவுத் ஷோர் (South Shore) பிராந்திய வைத்தியசாலையிலிருந்து தப்பியோடியுள்ளார்.

இவர் 5 அடி 10 அங்குல உயரமும், 169 இறாத்தல் எடையும் கொண்டவர். கறுப்பு நிறத் தலைமுடி மற்றும் பழுப்பு நிறக் கண்களை உடையவர். இவரது இரண்டு கைகளிலும் ‘டட்டூ’ (Tattoos) வரையப்பட்டுள்ளதுடன், வலது கையில் “Money” என்றும் இடது கையில் “Building” என்றும் எழுதப்பட்டுள்ளது.

இவர் மீது கனடா தழுவிய பிடியாணை (Canada-wide warrant) பிறப்பிக்கப்பட்டுள்ளதுடன், இவர் ஒரு ஆபத்தான நபர் என்றும் பொலிஸார் எச்சரித்துள்ளனர். இவரைப் பிடிப்பதற்காக வைத்தியசாலை தற்காலிகமாக மூடப்பட்டு (Lockdown), பின்னர் திறக்கப்பட்டது.

சட்டவிரோத ஆயுதங்களை வைத்திருந்தமை மற்றும் நீதிமன்ற உத்தரவுகளை மீறியமை உள்ளிட்ட பல்வேறு குற்றச்சாட்டுகளுக்காக இவர் ஏற்கனவே சிறைத்தண்டனை அனுபவித்து வந்தவர் என்பது குறிப்பிடத்தக்கது.

இவர் ஒரு சிவப்பு நிற ‘டாட்ஜ் கேரவன்’ (Dodge Caravan) ரக வாகனத்தில் ஒரு பெண்ணுடன் பயணிக்கலாம் என சந்தேகிக்கப்படுகிறது. இவரைப் காண்பவர்கள் உடனடியாக 911 அல்லது 902-543-2464 என்ற இலக்கத்திற்கு அழைக்குமாறு பிரிட்ஜ்வாட்டர் பொலிஸார் கேட்டுக்கொண்டுள்ளனர்