ஓல்ட் ஸ்ட்ராத்கோனாவில் (Old Strathcona) உள்ள மெக்டொனால்ட்ஸ் (McDonald’s) உணவகம் ஒன்றில் எதிர்பாராத விதமாக நடத்தப்பட்ட இரு வேறு தாக்குதல் சம்பவங்களைத் தொடர்ந்து, அதில் பாதிக்கப்பட்ட இருவர் மற்றும் மேலதிக சாட்சிகளை எட்மண்டன் காவல்துறையினர் தேடி வருகின்றனர்.

புலனாய்வாளர்களின் தகவல்படி, இச்சம்பவம் 2026 மே 11 அன்று பிற்பகல் 2:20 மணியளவில் 103 ஆவது வீதி மற்றும் 80 ஆவது அவென்யூவிற்கு அருகில் உள்ள உணவகத்தில் இடம்பெற்றுள்ளது. இரண்டு ஆண்கள் அங்கு உணவருந்திக் கொண்டிருந்த போது, மற்றொரு வாடிக்கையாளரால் எவ்வித தூண்டுதலும் இன்றி அவர்கள் தாக்கப்பட்டதாகக் கூறப்படுகிறது. தாக்குதலை நடத்திய நபர் பின்னர் அங்கிருந்து நடந்து தப்பியோடியுள்ளார்.

பின்னர் கண்காணிப்பு கேமரா (CCTV) காட்சிகளை ஆய்வு செய்த காவல்துறையினர், சந்தேகநபர் 61 வயதுடைய ஜீன் ஜேக்கப்ஸ் (Gene Jacobs) என அடையாளம் கண்டுள்ளனர்.

ஜேக்கப்ஸுக்கு எதிராகப் பின்வரும் குற்றச்சாட்டுகளின் கீழ் பிடியாணை பிறப்பிக்கப்பட்டுள்ளது:

• தாக்குதல் நடத்துதல் (Assault – 2 வழக்குகள்)

• நன்னடத்தை விதியை மீறுதல் (Breach of Probation)

பாதிக்கப்பட்டவர்களுக்கும் சந்தேகநபருக்கும் இடையே முன்னரே எந்தவொரு அறிமுகமும் இருக்கவில்லை என்று புலனாய்வாளர்கள் தெரிவித்துள்ளனர்.

விசாரணைகள் தொடர்ந்து முன்னெடுக்கப்பட்டு வரும் நிலையில், இச்சம்பவத்தில் தொடர்புடைய அந்த இரு ஆண்களையும், அதேபோன்று இச்சம்பவத்தைக் நேரில் பார்த்த எவரையும் முன்வந்து விபரங்களை வழங்குமாறு காவல்துறையினர் கேட்டுக்கொண்டுள்ளனர்.

இக்குற்றச்சாட்டுகள் நீதிமன்றத்தில் இன்னும் நிரூபிக்கப்படவில்லை என்பதுடன், குற்றம் நிரூபிக்கப்படும் வரை குற்றம் சாட்டப்பட்டவர் நிரபராதியாகவே கருதப்படுவார்.