அமெரிக்காவைக் கையாள்வதற்கு கனடாவிடம் இன்னும் பல வழிமுறைகள்/வாய்ப்புகள் இருப்பதாகத் தொழில் துறை அமைச்சர் மெலனி ஜோலி (Melanie Joly) தெரிவித்துள்ளார். இருப்பினும், அந்தச் சாத்தியமான நடவடிக்கைகளை பகிரங்கமாக அறிவித்து மத்திய அரசு பேச்சுவார்த்தை நடத்தாது என்றும் அவர் கூறியுள்ளார்.
அமெரிக்கா இந்த வர்த்தகப் போரை மேலும் தீவிரப்படுத்தினால் கனடா என்ன செய்யும் என்று புதன்கிழமை கல்கரியில் (Calgary) நடைபெற்ற நிதி உதவி அறிவிப்பு விழாவிற்குப் பிறகு ஜோலியிடம் கேட்கப்பட்டபோது, “சுமார் 28 பில்லியன் டாலர் மதிப்பிலான அமெரிக்க வரிகளுக்கு ஈடாக, டாலருக்கு டாலர் என்ற அடிப்படையில் சரியான பதிலடி நடவடிக்கைகளை எடுக்க நாங்கள் முடிவு செய்துள்ளோம்,” என்று கூறினார்.
“எங்கள் கைகளில் பல வாய்ப்புகள் (cards) உள்ளன, நிச்சயமாக நாங்கள் இறக்குவதற்குப் பல காய்களும் உள்ளன,” என்றும் அவர் மேலும் கூறினார்.
மேலும், அமெரிக்கா வர்த்தகப் போரை மேலும் தீவிரப்படுத்தக்கூடும் என்ற வதந்திகள் குறித்து கனடா கருத்து தெரிவிக்காது என்றும், அமெரிக்க அதிபர் டொனால்ட் டிரம்ப் நிர்வாக உத்தரவில் கையெழுத்திட்ட பிறகே அதுகுறித்து பேசப்படும் என்றும் ஜோலி குறிப்பிட்டார்.
அமெரிக்காவிற்கு மிகவும் முக்கியமான எரிபொருள் அல்லது பொட்டாஷ் (potash) மீது கனடா வரிகளை விதிப்பதற்கான சாத்தியக்கூறுகள் மற்றும் எரிசக்தி வளங்களை ஒரு ஆயுதமாகப் பயன்படுத்துவது குறித்து ஜோலியிடம் கேள்வி எழுப்பப்பட்டது, ஆனால் அதுகுறித்து கருத்து தெரிவிக்க அமைச்சர் மறுத்துவிட்டார்.
