சென்னை
தமிழ்நாடு அரசுப் போக்குவரத்துக் கழகங்களில் காலியாக உள்ள நடத்துநர் பணியிடங்களை நிரப்ப உத்தரப்பிரதேசத்தைச் சேர்ந்த தனியார் நிறுவனத்திற்கு ஒப்பந்தம் வழங்கப்பட்டுள்ளதற்கு நாம் தமிழர் கட்சியின் தலைமை ஒருங்கிணைப்பாளர் சீமான் கடும் கண்டனம் தெரிவித்துள்ளார்.
உ.பி. நிறுவனத்திற்கு ரூ.61.56 கோடியில் ஒப்பந்தம்:
சென்னை மாநகரப் போக்குவரத்துக் கழகப் (MTC) பேருந்துகளில் காலியாகவுள்ள 1,797 நடத்துநர் பணியிடங்களை நிரப்ப, உத்தரப்பிரதேச மாநிலத்தைச் சேர்ந்த ‘எஸ்.எஸ். எண்டர்பிரைசஸ்’ (S.S. Enterprises) என்ற தனியார் நிறுவனத்திற்கு ரூ.61.56 கோடி மதிப்பிலான ஒப்பந்தம் அளிக்கப்பட்டுள்ளது. அரசுப் பணியிடங்களில் நிரந்தர ஊழியர்களை நியமிக்கக் கோரி வரும் நிலையில், தவெக அரசின் இந்த நடவடிக்கை ஊழியர்களின் உரிமைப் பறிப்பு மட்டுமின்றி, தமிழ்நாட்டின் இறையாண்மைக்கும் எதிரான கொடுஞ்செயலாகும் என சீமான் விமர்சித்துள்ளார்.
“இந்தித் திணிப்பிற்கு வழிவகுக்காதா?”:
“லட்சக்கணக்கான தமிழக இளைஞர்கள் வேலையின்றித் திண்டாடும் நிலையில், உ.பி. நிறுவனத்தின் மூலம் நியமனம் செய்ய வேண்டிய அவசியம் என்ன? அந்த நிறுவனம் தமிழக இளைஞர்களைப் பணியமர்த்துமா அல்லது இந்தி பேசும் வடமாநிலத்தவரா? இது மறைமுக இந்தித் திணிப்பிற்கு வழிவகுக்காதா? வங்கி, அஞ்சலகம் போல் இனி தமிழ்நாடு பேருந்துகளிலும் மொழி புரியாத வடமாநிலத்தவரால் தமிழ்நாட்டு மக்கள் தத்தளிக்க வேண்டுமா?” என சீமான் சரமாரியாகக் கேள்வியெழுப்பியுள்ளார்.
“கர்நாடக முதல்வரிடம் உள்ள உறுதி தமிழக அரசிடம் இல்லை”:
டெல்லி சிறப்புப் பிரதிநிதியாகக் கர்நாடகாவைச் சேர்ந்தவரை நியமித்ததற்கான பலனைத்தான் தற்போது தவெக அரசு அனுபவிக்கிறது. 3 தமிழர்கள் கொல்லப்பட்ட விவகாரத்தில், ‘எங்கள் மாநில விவகாரங்களில் தலையிட வேண்டாம்’ எனக் கர்நாடக முதல்வர் இறுக்கமாக இருக்கும் நிலையில், தமிழக அரச நிர்வாகத்தில் மற்ற மாநிலத்தவர் தலையீடு இருக்கக் கூடாது என்ற உறுதி தவெக அரசுக்கு ஏன் வரவில்லை என்றும் அவர் கேள்வி எழுப்பியுள்ளார்.
“தமிழக இளைஞர்களுக்குப் பெருந்துரோகம்”:
அரசுப் பணிகளைத் தனியாருக்குத் தாரை வார்ப்பதைத் தடுப்போம் என வாக்குறுதியளித்துவிட்டு, தற்போது பணிகளை உ.பி. நிறுவனத்திடம் ஒப்படைத்துவிட்டு, வேலையில்லா இளைஞர்களுக்கு மாதம் ரூ.4,000 உதவித்தொகை தருவோம் எனத் தவெக அரசு ஏமாற்றுவது வெட்கக்கேடானது. உடனடியாக இந்த முடிவைக் கைவிட்டு, தமிழக அரசே நேரடியாக நிரந்தரப் பணியாளர்களை நியமிக்க வேண்டும் என சீமான் திட்டவட்டமாக வலியுறுத்தியுள்ளார்.
#Seeman #NaamTamilarKatchi #NTK #MTCBus #TNTransport #TVKGovernment #TNPolitics #TamilNaduNews #ChennaiNews #StopPrivatization #YouthEmployment #ViralNewsTN #TrendingTN #LatestNewsTN #TNNewsUpdates
