இலங்கை கிரிக்கெட் (SLC) மாற்றக் குழுவின் புதிய தலைவராக நியமிக்கப்பட்டுள்ள எரான் விக்ரமரத்ன, ஜனாதிபதி அநுர குமார திஸாநாயக்க மற்றும் விளையாட்டு மற்றும் இளைஞர் விவகார அமைச்சர் சுனில் குமார கமகே ஆகியோரின் அழைப்பினை ஏற்றுத் தனது பணிகளைப் பொறுப்பேற்றுள்ளதாகத் தெரிவித்துள்ளார்.

முன்னாள் இலங்கை கிரிக்கெட் வீரர்கள் மற்றும் தேசிய அணித் தலைவர்களுடன் நடத்திய விரிவான கலந்துரையாடல்களின் பின்னர் இந்த நியமனத்தை ஏற்றுக்கொண்டதாகக் குறிப்பிட்ட விக்ரமரத்ன, ஏப்ரல் 29 முதல் இப்பொறுப்பு நடைமுறைக்கு வந்துள்ளதாகவும் கூறினார்.

எரான் விக்ரமரத்ன தலைமையிலான இந்த ஒன்பது பேர் கொண்ட குழுவில் பின்வரும் உறுப்பினர்கள் இடம்பெற்றுள்ளனர்:

• சிதத் வெட்டிமுனி

• ரோஷன் மகாநாம

• குமார் சங்கக்கார

• பிரகாஷ் ஷாஃப்டர்

• துஷிர ரதல்ல

• அவந்தி கொலம்பகே

• உப்புல் குமாரப்பெரும

• தினால பிலிப்ஸ்

இந்தக் குழுவானது நேர்மை மற்றும் நிபுணத்துவம் கொண்ட நபர்களின் தொகுப்பு என்றும், கிரிக்கெட் அனுபவம், கார்ப்பரேட் மேலாண்மை மற்றும் சட்ட அறிவு ஆகியவற்றின் கலவையாக இது அமைந்துள்ளதென்றும் அவர் விவரித்தார்.

நிர்வாகச் சீர்திருத்தம் மற்றும் களத்தில் சிறந்த செயல்பாடு ஆகிய இரண்டு முக்கிய தூண்களின் ஊடாக, இலங்கை கிரிக்கெட்டின் பெருமையையும் திறனையும் மீட்டெடுப்பதே இந்தக் குழுவின் முக்கிய நோக்கமாகும்.

நிர்வாகச் சீர்திருத்தம்

நிர்வாகம் குறித்துக் கருத்துத் தெரிவித்த விக்ரமரத்ன, இலங்கை கிரிக்கெட்டின் தற்போதைய கட்டமைப்பை முழுமையாக மாற்றியமைப்பதே உடனடி முன்னுரிமை என்றார். இந்த முயற்சியின் மையமாக, விளையாட்டிற்கு நவீன மற்றும் வலுவான அடித்தளத்தை வழங்கும் வகையில் முன்மொழியப்பட்ட புதிய யாப்பை நடைமுறைப்படுத்துவது அமையும். சர்வதேச கிரிக்கெட் பேரவையின் (ICC) விதிமுறைகளுக்கு முழுமையாக இணங்குவதுடன், அமைப்பிற்குள் வெளிப்படைத்தன்மை, ஊழல் எதிர்ப்பு நடவடிக்கைகள் மற்றும் தொழில்முறை ஆகியவற்றைப் புகுத்தக் குழு உறுதிபூண்டுள்ளதாக அவர் கூறினார். மேலும், பொதுமக்களின் நம்பிக்கையை மீண்டும் கட்டியெழுப்புவதற்கு நிதிப் பொறுப்புக்கூறல் மற்றும் தகுதிக்கு முன்னுரிமை அளிப்பது அவசியம் என்றும் அவர் வலியுறுத்தினார்.

திறன் மற்றும் செயல்பாடு

மைதானத்தில் வெற்றியை ஈட்டுவதற்கு நிர்வாகச் சிறப்பம்சம் அடிப்படையானது என்று விக்ரமரத்ன குறிப்பிட்டார். தேசிய அணிகள் சர்வதேச மட்டத்தில் தொடர்ந்து சிறப்பாக விளையாடுவதற்கும், உலக கிரிக்கெட் தரவரிசையில் இலங்கையை மீண்டும் முதன்மை நிலைக்குக் கொண்டு செல்வதற்கும் ஏற்ற முறையான கட்டமைப்புகள், உலகத்தரம் வாய்ந்த வசதிகள் மற்றும் ஊக்கத்தொகை முறைகளை உருவாக்குவதில் குழு கவனம் செலுத்தும்.

விளையாட்டுடனான தனது தனிப்பட்ட தொடர்பு குறித்துப் பேசிய விக்ரமரத்ன, தனது பாடசாலை  கிரிக்கெட் காலத்திலிருந்தே கிரிக்கெட் மீது மிகுந்த ஆர்வம் கொண்டுள்ளதாகத் தெரிவித்தார். இலங்கை கிரிக்கெட்டின் தலைவிதியை மாற்றியமைக்கும் இந்த மாற்றத்திற்குத் தலைமை தாங்கும் வாய்ப்பு தனக்குக் கிடைத்த ஒரு கௌரவம் மற்றும் பொறுப்பு என்றும் அவர் குறிப்பிட்டார்.

கிரிக்கெட் ரசிகர்களின் ஆதரவையும் ஆக்கபூர்வமான கருத்துக்களையும் எதிர்பார்ப்பதாகத் தெரிவித்த விக்ரமரத்ன, ரசிகர்களின் ஆர்வத்திற்குப் பிரதிபலனாக அளவிடக்கூடிய மற்றும் நிலையான முடிவுகளை வழங்கப் பாடுபடுவதாக உறுதியளித்தார்.