சென்னை:
அதாயி கல்விக் குழுமம் சார்பில் ஒருங்கிணைக்கப்பட்ட மீலாதுன் நபி விழா மற்றும் சமய நல்லிணக்க மாநாட்டில் அமைச்சர் ஆதவ் அர்ஜுனா கலந்து கொண்டு சிறப்புரையாற்றினார். நிகழ்ச்சியில் அவர் பேசியதன் முக்கிய விவரங்கள் பின்வருமாறு:
அன்பும் கருணையுமே நபிகளாரின் செய்தி
“எல்லோருக்கும் என்னுடைய மீலாது நபி வாழ்த்துகள். சிலர் தனக்காகவும், குடும்பத்திற்காகவும் வாழ்வார்கள்; ஒரு சிலர் மட்டுமே மக்களுக்காகவும் உலகிற்காகவும் வாழ்வார்கள். அப்படி மனிதராகப் பிறந்து இறைத்தூதராக வாழ்ந்து, அன்பும், கருணையும், நம்பிக்கையும் என ஒட்டுமொத்த உலகத்திற்கே நற்செய்தியைக் கொடுத்துச் சென்றவர் நபிகள் நாயகம்.
என் இஸ்லாமிய நண்பர்களும், குறிப்பாக ஓய்வுபெற்ற நீதியரசர் அக்பர் அலி அவர்களும்தான் இஸ்லாமிய மார்க்கம் குறித்து எனக்கு நிறைய அறிவைக் கொடுத்தனர்.”
சாதி, மதப் பாகுபாடற்ற மாபெரும் வெற்றி
“நபிகள் நாயகம் பிறந்த இந்த நன்னாளில் ஒரு மகிழ்ச்சியான விஷயம் என்னவென்றால், கண்ணியத்திற்குரிய காயிதே மில்லத்தின் கனவு 60 வருடங்களுக்குப் பிறகு நிறைவேறியுள்ளது. பிறப்பால் ஒருவரின் உயர்வை நிர்ணயிக்கக் கூடாது என்பதே அண்ணல் அம்பேத்கர் கண்ட உண்மையான விடுதலை.
2026 தேர்தலில் எங்கள் தலைவர் விஜய்யின் வெற்றியும், த.வெ.க.வின் வெற்றியும் சாதாரணமானதல்ல; இது பெண்களாலும் இளைஞர்களாலும் உருவாக்கப்பட்ட மாபெரும் வெற்றி. இத்தேர்தலில் மக்கள், முதல்-அமைச்சர் முதல் வேட்பாளர்கள் வரை சாதி, மதம் என எதையும் பார்க்கவில்லை. எந்தப் பாகுபாடும் இன்றி வாக்களித்து மிகப்பெரிய மாற்றத்தை ஏற்படுத்தியுள்ளனர்.”
அதிகாரத்தை வழங்குவதே உண்மையான சமத்துவ அரசியல்
“இந்தியாவின் மதச்சார்பற்ற கொள்கைக்கு சவால் விடுக்கப்படும் இந்த நேரத்தில், ‘பெரம்பூர் ஜோசப் விஜய்’ எனத் தைரியமாகத் தன்னை அடையாளப்படுத்திய எங்கள் தலைவர், “நான் பிறப்பால் கிறிஸ்தவன் என்றாலும், வளர்ப்பால் அனைவருக்கும் பொதுவானவன்” என்ற செய்தியையே ஆணித்தரமாகக் கூறினார்.
அரசியலில் பெரும்பான்மை, சிறுபான்மை என்ற பேதமே இருக்கக் கூடாது. கடந்த 60 ஆண்டுகளாக ‘இஸ்லாமியர்களுக்கு நாங்கள்தான் பாதுகாப்பு’ எனப் பல கட்சிகள் கூறி வந்தன. பாதுகாப்புக் கொடுப்பது மட்டுமே அரசியலல்ல; அதிகாரத்தைக் கொடுப்பதே உண்மையான சமத்துவ அரசியல். இஸ்லாமிய சமூகத்தில் பிறந்து, இந்தியாவின் பாதுகாப்பிற்காக அணுசக்தியை உருவாக்கியவர் ஏ.பி.ஜே. அப்துல்கலாம். அவரது ‘அக்னிச் சிறகுகள்’ புத்தகத்தைப் படித்து வளர்ந்தவன் நான்.”
அதிகாரத்தை நோக்கிப் பயணிக்க அழைப்பு
“ஒரு சாதாரண குடிசை வீட்டில் இருந்து கோட்டைக்கு வருவதுதான் உண்மையான அரசியல் வெற்றி. ஐ.யூ.எம்.எல் (IUML) தலைவர்கள் எங்களிடம் அமைச்சரவையில் இடம் வேண்டும் எனக் கேட்கவே இல்லை. ஆனால், அதிகாரத்திற்காக நாமே முயற்சிக்க வேண்டும். அதிகாரம்தான் எதிர்காலத் தலைமுறைக்கு உத்வேகம் அளித்து, நமக்குப் பொருளாதார சுதந்திரத்தை உருவாக்கும்.
என் அம்மா ஒரு ஏழை விவசாயி; எனக்கு 5 வயதாக இருக்கும்போதே அவர் தற்கொலை செய்து என் கண்முன்னே இறந்துவிட்டார். ‘என்னிடம் அதிகாரம் வரும்போது எந்த ஊழலும் இருக்கக் கூடாது’ என நினைத்தே நான் தினமும் கையெழுத்திடுகிறேன். என் பெரியம்மா திலகவதி, தைரியமாகப் படித்து முதல் பெண் ஐ.பி.எஸ் அதிகாரியானார். அவரைப் போல, நீங்களும் தைரியமாகப் படித்து, உங்கள் சமூகத்தின் பிரச்சனைகளைத் தீர்க்கும் அதிகாரத்திற்கு வர வேண்டும்.”
#AadavArjuna #MiladUnNabi #TNPolitics #TVKGovernment #ChiefMinisterVijay #SocialJustice #Equality #DrAmbedkar #APJAbdulKalam #TamilNaduNews #Secularism #ChennaiNews #TamilNews #LatestNewsTN #TrendingTN #TNNewsUpdates
