கடந்த 2026 மார்ச் மாதம் டொராண்டோ நகரின் மையப்பகுதியில் அமைந்துள்ள அமெரிக்க தூதரகத்தில் (U.S. Consulate) நடத்தப்பட்ட துப்பாக்கிச் சூடு உட்பட, ஜிடிஏ (GTA) பகுதி முழுவதும் இடம்பெற்ற பல துப்பாக்கிச் சூட்டுச் சம்பவங்களுடன் தொடர்புடைய ஒரு பாரிய கூட்டுப் புலனாய்வு விசாரணையின் முக்கிய திருப்புமுனைகளை டொராண்டோ போலீசார் வெளியிட்டுள்ளனர்.
இந்த விசேட நடவடிக்கையின் கீழ் மூன்று சந்தேகநபர்கள் கைது செய்யப்பட்டுள்ளதுடன், இரண்டு துப்பாக்கிகளும் பறிமுதல் செய்யப்பட்டுள்ளதாக புலனாய்வாளர்கள் தெரிவித்துள்ளனர். மேலும், இந்த வழக்கின் தொடர்ச்சியாக கடந்த ஜூன் 11 அன்று ஐந்து இடங்களில் சோதனை ஆவணங்களுடன் (Search warrants) நடத்தப்பட்ட சோதனையின் போது, கான்ஸ்டபிள் மார்க் பினிசோட்டோ (Const. Marc Pinizzotto) என்ற போலீஸ் அதிகாரி பணியில் இருந்தபோது சுட்டுக் கொல்லப்பட்ட சோகமான சம்பவமும் அரங்கேறியுள்ளது.
இந்தச் சோதனை நடவடிக்கையின் போது, டொராண்டோவைச் சேர்ந்த நிக்கோலஸ் பென்னட் (Nicholas Bennett – 19) என்ற வாலிபரே கான்ஸ்டபிள் மார்க் பினிசோட்டோவைச் சுட்டுக் கொன்றதாக போலீசார் குற்றம் சாட்டியுள்ளனர். அவர் மீது ‘முதல் நிலை கொலைக் குற்றம்’ (First-Degree Murder) மற்றும் டொராண்டோவில் நடந்த தனித்தனி துப்பாக்கிச் சூடு விசாரணைகள் தொடர்பான பல துப்பாக்கிக் குற்றச்சாட்டுகளும் பதிவு செய்யப்படவுள்ளன.
அதேவேளை, கடந்த மார்ச் 10 அன்று அமெரிக்க தூதரகக் கட்டடத்தைக் குறிவைத்து பலமுறை துப்பாக்கியால் சுடப்பட்ட சம்பவம் தொடர்பாக டொராண்டோவைச் சேர்ந்த ஷெல்டன் டிரேசி-ஸ்டீவர்ட் (Sheldon Tracey-Stewart – 18) என்பவர் மீது குற்றம் சாட்டப்பட்டுள்ளது. இச்சம்பவத்தில் எவருக்கும் காயம் ஏற்படவில்லை என்பது குறிப்பிடத்தக்கது.
அமெரிக்க தூதரக துப்பாக்கிச் சூடு, மார்ச் 25 அன்று ஸ்கார்பரோவில் (Scarborough) உள்ள அடுக்குமாடி குடியிருப்பு ஒன்றைக் குறிவைத்து நடத்தப்பட்ட துப்பாக்கிச் சூடு மற்றும் மார்ச் 26 அன்று எட்டோபிகோக்கில் (Etobicoke) உள்ள வணிக நிறுவனம் ஒன்றைக் குறிவைத்து நடத்தப்பட்ட துப்பாக்கிச் சூடு ஆகிய அனைத்துச் சம்பவங்களுக்கும் இடையே தொடர்பு இருப்பதை இந்த விசாரணை அம்பலப்படுத்தியுள்ளதாக போலீசார் தெரிவித்துள்ளனர்.
இந்த எட்டோபிகோக் துப்பாக்கிச் சூட்டுச் சம்பவம் தொடர்பாக, பாரி (Barie) பகுதியைச் சேர்ந்த ஜெயோன் பர்கர் (Jayon Burgher – 18) என்ற மூன்றாவது சந்தேகநபர் ஏற்கனவே கைது செய்யப்பட்டு குற்றம் சாட்டப்பட்டுள்ளார்.
இந்நிலையில், அமெரிக்க தூதரக துப்பாக்கிச் சூட்டுச் சம்பவத்துடன் தொடர்புடைய ஜாரா ஜாபி (Zara Jabbi – 19) என்ற மற்றொரு இளைஞரை புலனாய்வாளர்கள் தீவிரமாகத் தேடி வருகின்றனர். இவர் இந்த ஒட்டுமொத்த துப்பாக்கிச் சூட்டுச் சம்பவங்களுடன் தொடர்புடையவர் என்ற போதிலும், கான்ஸ்டபிள் மார்க் பினிசோட்டோ கொல்லப்பட்ட சம்பவத்தில் இவருக்குத் தொடர்பிருப்பதாக போலீசார் கூறவில்லை. எனினும், இவர் ஆயுதம் ஏந்திய ஆபத்தானவர் என்று எச்சரிக்கப்பட்டுள்ளது.
ஜாரா ஜாபி இருக்கும் இடம் குறித்து ஏதேனும் தகவல் தெரிந்தவர்கள் உடனடியாக டொராண்டோ போலீசாரை 416-808-2510 என்ற எண்ணில் தொடர்புகொள்ளுமாறு கேட்டுக்கொள்ளப்பட்டுள்ளனர்.
