ஏற்கனவே காவல்துறை அதிகாரி போல் ஆள்மாறாட்டம் செய்தது மற்றும் தாக்குதல் நடத்தியது ஆகிய குற்றங்களுக்காகத் தண்டனை பெற்ற ட்ராவிஸ் பேட்ரன் (35), தற்போது மீண்டும் “வெறுப்புப் பேச்சைத் தூண்டிய” குற்றச்சாட்டில் கைது செய்யப்பட்டுள்ளார்.
சஸ்காட்சுவான் மாகாணம் ரெட்வர்ஸ் (Redvers) பகுதியைச் சேர்ந்த பேட்ரன் மீது, ஒரு குறிப்பிட்ட குழுவிற்கு எதிராகத் திட்டமிட்டு வெறுப்பைப் பரப்பியதாக (Willful promotion of hatred) ஏப்ரல் 10-ம் தேதி வழக்குப் பதிவு செய்யப்பட்டது. கடந்த 2025-ம் ஆண்டு ஏப்ரல் மாதம் இணையதளத்தில் அவர் பதிவிட்ட வெறுக்கத்தக்கக் கருத்துக்கள் குறித்த நீண்டகால விசாரணைக்குப் பிறகு இந்த நடவடிக்கை எடுக்கப்பட்டுள்ளது.
ட்ராவிஸ் பேட்ரன் கடந்த காலங்களில் பலமுறை சட்டச் சிக்கல்களில் சிக்கியுள்ளார்:
2022: யூத மக்களுக்கு எதிரான வெறுப்புப் பேச்சை வெளியிட்டதற்காக ஒரு வருடச் சிறைத் தண்டனை பெற்றார்.
2022: 2019-ம் ஆண்டு ரெஜினா (Regina) பகுதியில் இரண்டு ஆசிரியர்களைத் தாக்கிய வழக்கில் குற்றவாளியாக அறிவிக்கப்பட்டார்.
2023: சஸ்காட்டூன் (Saskatoon) பகுதியில் ஒரு பெண்ணிடம் தன்னை ஒரு காவல்துறை அதிகாரி என்று பொய் கூறி, அந்தப் பெண் தனது குழந்தையைக் கடத்துவதாகக் குற்றம் சாட்டினார். இதற்காக அவருக்கு 15 மாதச் சிறைத் தண்டனை வழங்கப்பட்டது.
இவர் இப்போது செயல்பாட்டில் இல்லாத “கனடிய தேசியவாதக் கட்சி” (Canadian Nationalist Party) என்ற அமைப்பின் தலைவராக இருந்தார். இந்தக் கட்சி 2019-ம் ஆண்டு கூட்டாட்சித் தேர்தலில் போட்டியிட்டது. “கனடாவின் ஐரோப்பிய வம்சாவளிப் பெரும்பான்மையைத் தக்கவைப்பதே” இந்தக் கட்சியின் முக்கிய நோக்கமாக இருந்தது. போதிய உறுப்பினர்கள் இல்லாததால் 2022-ல் இந்தக் கட்சி கலைக்கப்பட்டது.
பேட்ரன் வரும் மே 13-ம் தேதி கார்லைல் (Carlyle) மாகாண நீதிமன்றத்தில் ஆஜர்படுத்தப்பட உள்ளார்.
