இலங்கைக்கும் வியட்நாமுக்கும் இடையே நேரடி விமானப் போக்குவரத்துச் சேவைகளை ஆரம்பிக்கும் விதமாக, அந்நாட்டின் தேசிய விமான சேவையான “வியட்நாம் ஏர்லைன்ஸ்” (Vietnam Airlines) நிறுவனத்தின் முதலாவது மங்கள விமானம் (Inaugural Flight) கட்டுநாயக்க பண்டாரநாயக்க சர்வதேச விமான நிலையத்தை ஓகஸ்ட் 16ஆம் திகதி இரவு வந்தடைந்தது.
இவ்விமான சேவைக்காக ஏர்பஸ் ஏ-320 (Airbus A320) வகையைச் சேர்ந்த விமானம் பயன்படுத்தப்பட்டிருந்ததுடன், கட்டுநாயக்க விமான நிலையத்தை வந்தடைந்த அவ்விமானத்திற்கு நீராதார வரவேற்பு (Water Salute) வழங்கப்பட்டு உற்சாக வரவேற்பளிக்கப்பட்டது.
வியட்நாமின் ஹோ சி மின் (Ho Chi Minh City) நகரிலிருந்து VN-671 இலக்கக் கொண்ட இந்த விமானம், ஓகஸ்ட் 16ஆம் திகதி இரவு 11:02 மணிக்குக் கட்டுநாயக்க விமான நிலையத்தை வந்தடைந்திருந்தது.
இவ்விமானத்தில் 164 பயணிகள் வருகை தந்திருந்ததுடன், இங்கிருந்து மீண்டும் 172 பயணிகளுடன் விமானம் வியட்நாமை நோக்கிப் புறப்பட்டுச் சென்றது.
இதற்கமைய, இவ்விமானங்கள் வாரத்திற்கு 03 நாட்கள், அதாவது ஞாயிறு, புதன் மற்றும் வெள்ளி ஆகிய நாட்களில் வியட்நாமுக்கும் கட்டுநாயக்க விமான நிலையத்திற்கும் இடையே இயக்கப்படவுள்ளதுடன், ஒரு விமானப் பயணத்திற்கு 04 மணி 30 நிமிடங்கள் காலம் எடுக்கும்.
இவ்விமான வரவேற்பைக் கௌரவிக்கும் வகையில் கட்டுநாயக்க விமான நிலையத்தில் விசேட நிகழ்வொன்று ஏற்பாடு செய்யப்பட்டிருந்ததுடன், இதில் இலங்கைகான வியட்நாம் தூதுவர் த்ரின் தி தாம் (Trinh Thi Tam) பிரதம விருந்தினராகக் கலந்துகொண்டார்.
