சென்னை
தமிழக சட்டப்பேரவையில் இன்று உணவு மற்றும் நுகர்வோர் பாதுகாப்புத்துறை மானியக் கோரிக்கை மீதான விவாதத்தின் போது, ரேஷன் அரிசி குறித்து அமைச்சர் செங்கோட்டையன் பேசிய கருத்து அவையில் பெரும் சர்ச்சையை ஏற்படுத்தியுள்ளது.
எம்.ஆர்.கே. பன்னீர்செல்வம் பெருமிதம்:
சட்டப்பேரவை விவாதத்தின் போது பேசிய திமுக எம்.எல்.ஏ எம்.ஆர்.கே. பன்னீர்செல்வம், “எங்களுடைய 5 ஆண்டு கால ஆட்சியில் நெல் மூட்டைகளை மழையில் நனையாமல் பாதுகாப்பாகக் குடோன்களில் வைத்தோம். நெல்லை முளைக்க விடாமல் பாதுகாத்து, மக்களுக்குச் சுத்தமான வெள்ளை நிறத்தில் அரிசி கிடைக்க வழி செய்தோம்,” என்று பெருமிதத்துடன் குறிப்பிட்டார்.
அமைச்சர் செங்கோட்டையனின் சர்ச்சை பதில்:
இதற்குப் பதிலளித்துப் பேசிய அமைச்சர் செங்கோட்டையன், “மக்கள் ரேஷன் கடை அரிசியை ஆட்டுக்கும், கோழிக்கும்தான் பயன்படுத்திக் கொண்டிருக்கின்றனர் என்பதே உண்மை,” என்று அதிரடியாகத் தெரிவித்தார். அமைச்சரின் இந்தப் பேச்சுக்கு அவையில் இருந்த திமுக உறுப்பினர்கள் தரப்பில் இருந்து கடும் எதிர்ப்பு கிளம்பியது.
அமைச்சர் அளித்த விளக்கம்:
திமுகவினரின் கடுமையான எதிர்ப்பைத் தொடர்ந்து மீண்டும் பேசிய அமைச்சர் செங்கோட்டையன், “நீங்கள் கூறினீர்கள், அதனால் நான் கூறினேன். தமிழகத்தில் சன்ன ரக நெல் உற்பத்தி மிகவும் குறைவாகவே உள்ளது. அதனால் அண்டை மாநிலங்களில் இருந்துதான் அவற்றை நாம் வாங்குகிறோம். தமிழகத்தில் சன்ன ரக நெல்லை அதிக அளவில் உற்பத்தி செய்ய வேண்டும் என்பதற்காகவே, அதற்கான ஊக்கத்தொகையை முதலமைச்சர் உயர்த்தி வழங்கியுள்ளார். ரேஷன் கடை அரிசியைச் சிலர் பயன்படுத்துவதில்லை என்பதே நிதர்சனமான உண்மை,” என்று கூறி தனது உரையை முடித்துக்கொண்டார்.
#Sengottaiyan #TNAssembly #RationRiceIssue #MRKPanneerselvam #DMK #TNPolitics #TamilNaduNews #ChennaiNews #ViralNewsTN #TrendingTN #LatestNewsTN #TNNewsUpdates
