பல நாட்களாக நீடித்த கேள்விகளுக்குப் பிறகு, குறிப்பிட்ட சில தரைப்படைகளை இந்தப் பிராந்தியத்திற்கு அனுப்புவதை பென்டகன் தற்போது அதிகாரப்பூர்வமாக உறுதிப்படுத்தியுள்ளது.
பிபிசி-க்கு அளித்த அறிக்கையில், அமெரிக்க ராணுவ செய்தித் தொடர்பாளர் ஒருவர் கூறுகையில், ’82-வது ஏர் போர்ன் டிவிஷன்’ (82nd Airborne Division) தலைமையகத்தின் சில பிரிவுகள், சில ‘டிவிஷன் எனேப்ளர்ஸ்’ (division enablers) மற்றும் ‘1-வது பிரிகேட் காம்பாட் டீம்’ (1st Brigade Combat Team) ஆகியவை மத்திய கிழக்கு நாடுகளுக்கு அனுப்பப்பட உள்ளன.என தெரிவித்துள்ளார்
பாதுகாப்பு காரணங்களுக்காக, இது குறித்த கூடுதல் விவரங்களை வழங்க அந்த செய்தித் தொடர்பாளர் மறுத்துவிட்டார்.
இந்த படைப்பிரிவுகளின் அமைப்பு, மோதலில் பயன்படுத்தப்படக்கூடிய அமெரிக்காவின் திறன்கள் மற்றும் திட்டங்கள் பற்றி நமக்கு நிறையத் தகவல்களைத் தருகின்றன.
வட கரோலினாவைத் தளமாகக் கொண்ட ’82-வது ஏர் போர்ன்’, அமெரிக்க ராணுவத்தின் மிகச்சிறந்த போர் பிரிவுகளில் ஒன்றாகக் கருதப்படுகிறது. இதன் சில பிரிவுகள் உலகின் எந்தப் பகுதிக்கும் 18 மணி நேரத்திற்குள் விரைந்து செல்லும் தயார் நிலையில் எப்போதும் இருக்கும்.
இந்த வீரர்கள் பாராசூட் மூலமாகவோ அல்லது ஹெலிகாப்டர் மூலமாகவோ இலக்கு வைக்கப்பட்ட பகுதிக்குள் குதித்து, அந்தப் பகுதியைத் தங்கள் கட்டுப்பாட்டுக்குள் கொண்டு வரப் பயிற்சி பெற்றவர்கள். ஈரான் விவகாரத்தில், கார்க் தீவு (Kharg Island) அல்லது பிற முக்கியப் பகுதிகளைக் கைப்பற்றுவதற்கான வாய்ப்பை இது அமெரிக்காவிற்கு வழங்கக்கூடும்.
இருப்பினும், இந்தப்பிரிவு விரைவான நகர்வுக்காக வடிவமைக்கப்பட்டது என்பதால், நீண்ட காலப் போருக்குத் தேவையான கனரக உபகரணங்கள் இதில் குறைவாகவே இருக்கும்.
அதே சமயம், நியூயார்க்கைத் தளமாகக் கொண்ட 10-வது மவுண்டன் டிவிஷனின் (10th Mountain Division) ஒரு பகுதியான ‘1-வது பிரிகேட் காம்பாட் டீம்’ அல்லது ‘1-வது பிசிடி’ (1st BCT), நீண்ட காலப் போருக்கு அல்லது ராணுவ ரீதியாகக் கூறப்படும் “முழு அளவிலான” (full spectrum) செயல்பாடுகளுக்குத் தேவையான அனைத்து வசதிகளையும் கொண்டது.
