மத்திய கிழக்கில் போர் பதற்றம் அதிகரித்து வரும் நிலையில், ஈராக்கின் குர்திஸ்தான் பிராந்தியத்தில் உள்ள எர்பில் (Erbil) நகரில் அமைந்துள்ள பிரித்தானியாவின் முன்னணி எண்ணெய் நிறுவனமான பிபி (BP) மற்றும் அதன் துணை நிறுவனமான காஸ்ட்ரோல் (Castrol) ஆகியவற்றின் எரிபொருள் கிடங்கு மீது இன்று புதன்கிழழை (1) அதிகாலை ட்ரோன் தாக்குதல் நடத்தப்பட்டுள்ளது.

ஈரானில் இருந்து ஏவப்பட்டதாகக் கருதப்படும் இந்தத் தற்கொலைப் படை ட்ரோன்கள், எரிபொருள் டாங்கிகள் மீது மோதி வெடித்ததில் அந்தப் பகுதியே போர்க்களம் போலக் காட்சியளித்தது.

இந்த விபத்தில் யாருக்கும் உயிரிழப்பு ஏற்படவில்லை என்றாலும், பல மில்லியன் டொலர் மதிப்புள்ள சொத்துக்கள் நாசமாகியுள்ளன.

ஈரான் மற்றும் அதன் ஆதரவு பெற்ற ஆயுதக் குழுக்கள், ஈராக் மற்றும் குவைத் போன்ற அண்டை நாடுகளில் உள்ள மேற்கத்திய நாடுகளின் எரிசக்தி மையங்களைக் குறிவைத்துத் தாக்கி வருகின்றன.

குறிப்பாக, பிரித்தானியா மற்றும் அமெரிக்காவின் ராணுவத் தளங்கள் மீது தாக்குதல் நடத்தப்படும் எனத் தந்தி மூலம் ஈரான் ஏற்கெனவே எச்சரிக்கை விடுத்திருந்தது.

அதன் தொடர்ச்சியாகவே, பிரித்தானியாவின் பொருளாதார முதுகெலும்பாக விளங்கும் எண்ணெய் நிறுவனங்கள் மீது இந்தத் தாக்குதல் நடத்தப்பட்டுள்ளது. இது சர்வதேசச் சந்தையில் கச்சா எண்ணெய் விலையை ஒரு பேரலுக்கு 100 டொலருக்கும் மேல் உயர்த்தியுள்ளது.

இந்தத் தாக்குதல் சம்பவத்தின் வீடியோக்கள் தற்போது சமூக வலைத்தளங்களில் வைரலாகி வருகின்றன.

அதில், வானுயரத்திற்கு எழும்பும் கரும்புகை மற்றும் தீப்பிழம்புகளுக்கு இடையே மீட்புப் படையினர் தீயை அணைக்கப் போராடும் காட்சிகள் இடம்பெற்றுள்ளன. இதே நேரத்தில் குவைத் சர்வதேச விமான நிலையத்தில் உள்ள எரிபொருள் டாங்கிகள் மீதும் ஈரான் ட்ரோன் தாக்குதல் நடத்தியதாகத் தகவல்கள் வெளியாகியுள்ளன. ஈரானின் இத்தகைய தொடர் தாக்குதல்கள், வளைகுடா நாடுகளில் பணியாற்றும் வெளிநாட்டு ஊழியர்கள் மற்றும் பாதுகாப்புப் படையினர் மத்தியில் கடும் பீதியை ஏற்படுத்தியுள்ளது.

ஏப்ரல் 1, 2026-ஆம் திகதியான இன்று, பிரித்தானியப் பாதுகாப்புத் துறைச் செயலர் ஜான் ஹீலி (John Healey) இந்தத் தாக்குதலுக்குக் கடும் கண்டனம் தெரிவித்துள்ளார். “ஈராக் மண்ணில் உள்ள எங்கள் சொத்துக்கள் மற்றும் வீரர்களைப் பாதுகாக்க எத்தகைய நடவடிக்கையும் எடுக்கப்படும்” என்று அவர் எச்சரித்துள்ளார்.

அமெரிக்க ஜனாதிபதி டொனால்ட் ட்ரம்ப், ஈரான் மீதான இராணுவ நடவடிக்கை இன்னும் 2 முதல் 3 வாரங்களில் முடிவுக்கு வரும் என்று கூறியிருந்தாலும், களத்தில் ஈரான் தனது தாக்குதல்களைத் தீவிரப்படுத்தி வருவது உலக நாடுகளைப் பெரும் கவலையில் ஆழ்த்தியுள்ளது.