பார்ஹேவன்: கனடாவின் ஒட்டாவா (Ottawa), பார்ஹேவன் (Barrhaven) பகுதியில் செவ்வாய்க்கிழமை காலை மோட்டார் சைக்கிள் ஒன்றும் மற்றொரு வாகனமும் நேருக்கு நேர் மோதி விபத்துக்குள்ளானதில், நபர் ஒருவர் ஆபத்தான நிலையில் மருத்துவமனையில் அனுமதிக்கப்பட்டுள்ளதாக அவசரக்கால மீட்புச் சேவையினர் தெரிவித்துள்ளனர்.
ஸ்ட்ரான்ட்ஹெர்ட் டிரைவ் (Strandherd Drive) மற்றும் கிரீன்பேங்க் வீதி (Greenbank Road) சந்திப்பில் இந்தத் தீவிர விபத்து நேரிட்டுள்ளதாக ஒட்டாவா பொலிஸார் தங்களது சமூக ஊடகப் பக்கத்தில் உறுதிப்படுத்தியுள்ளனர்.
காலை 9:30 மணியளவில் அவசர அழைப்பைப் பெற்றுக்கொண்ட ஒட்டாவா அவசர மருத்துவ உதவியாளர்கள் (Paramedics), சம்பவ இடத்திற்கு விரைந்து காயமடைந்த நபரை மீட்டு, ஆபத்தான நிலையில் (Critical condition) மருத்துவமனைக்குக் கொண்டு சேர்த்தனர். எனினும், பாதிக்கப்பட்ட நபர் மோட்டார் சைக்கிளை ஓட்டி வந்தவரா அல்லது காரில் பயணித்தவரா என்பதை அவர்களால் உடனடியாக உறுதிப்படுத்த முடியவில்லை.
விபத்தையடுத்து, காலை 9:45 மணி நிலவரப்படி, ஸ்ட்ரான்ட்ஹெர்ட் டிரைவ் வீதியானது ரியோகான் அவென்யூ (Riocan Avenue) முதல் ஜக்வெயில் வீதி (Jockvale Road) வரையிலும், கிரீன்பேங்க் வீதியானது மார்க்கெட்பிளேஸ் அவென்யூ (Marketplace Avenue) முதல் பெரிகன் டிரைவ் (Berrigan Drive) வரையிலும் பொலிஸாரால் முற்றாக மூடப்பட்டு விசாரணைகள் நடத்தப்பட்டன.
அந்த வழியூடாகப் பயணிக்கும் வாகன ஓட்டிகள் மாற்று வழிகளைப் பயன்படுத்துமாறும், விபத்து நடந்த பகுதியைத் தவிர்க்குமாறும் பொலிஸார் அறிவுறுத்தியுள்ளனர்
