சென்னை
நடப்பாண்டில் சாதாரண வகை நெல்லுக்குக் குவிண்டாலுக்கு ரூ.3,000 கொள்முதல் விலை கிடைக்கும் வகையில், ஊக்கத்தொகையை ரூ.559 ஆக உயர்த்த வேண்டும் என்று பா.ம.க. தலைவர் அன்புமணி ராமதாஸ் வலியுறுத்தியுள்ளார். இது தொடர்பாக அவர் வெளியிட்டுள்ள விரிவான அறிக்கையின் விவரம் பின்வருமாறு:
ஊக்கத்தொகை உயர்வு போதுமானதல்ல:
தமிழ்நாட்டில் நடப்பாண்டில் அரசால் கொள்முதல் செய்யப்படும் நெல்லுக்கு, மாநில அரசின் சார்பில் வழங்கப்படும் ஊக்கத்தொகை சன்ன ரக நெல்லுக்கு ரூ.289 ஆகவும், சாதாரண ரக நெல்லுக்கு ரூ.159 ஆகவும் உயர்த்தப்பட்டிருக்கிறது. அதேபோல் கரும்புக்கான ஊக்கத்தொகை ரூ.709.50 ஆக உயர்த்தப்பட்டு டன்னுக்கு ரூ.4,000 ஆக வழங்கப்படும் என்று தவெக அரசு அறிவித்திருக்கிறது. உண்மையில் சாதாரண ரக நெல்லுக்கான ஊக்கத்தொகையை ரூ.28 மட்டும்தான் தமிழக அரசு உயர்த்தியுள்ளது. இது எந்த வகையிலும் போதுமானதல்ல.
நெல்லுக்கான ஊக்கத்தொகையைத் தமிழ்நாடு அரசு பெரிய அளவில் உயர்த்தவில்லை. நடப்பாண்டில் சாதாரண வகை நெல்லுக்குக் குவிண்டாலுக்கு ரூ.2,441, சன்ன வகை நெல்லுக்கு ரூ.2,461 கொள்முதல் விலை வழங்கப்படும் என்று மத்திய அரசு அறிவித்திருந்தது. அத்துடன் தமிழக அரசின் ஊக்கத்தொகையாகச் சன்னரக நெல்லுக்கு ரூ.156, சாதாரண ரக நெல்லுக்கு ரூ.131 வீதம் கடந்த திமுக ஆட்சியில் வழங்கப்பட்டது. இப்போது தற்போதைய தவெக அரசு சாதாரண ரக நெல்லுக்கான ஊக்கத்தொகையைக் குவிண்டாலுக்கு ரூ.28, சன்னரக நெல்லுக்கு ரூ.133 உயர்த்தியிருக்கிறது. இதன் காரணமாக நெல்லுக்கான கொள்முதல் விலை சன்னரக நெல்லுக்கு ரூ.2,750, சாதாரண ரக நெல்லுக்கு ரூ.2,600 ஆக உயர்ந்திருக்கிறது. இது போதுமானதல்ல.
கணக்கு காட்டி பெருமிதம் பேசும் அரசு:
சாதாரண நெல்லுக்கான கொள்முதல் விலையை மத்திய அரசு குவிண்டாலுக்கு ரூ.72 உயர்த்தியுள்ளது. ஆனால், தமிழக அரசு அதன் ஊக்கத்தொகையை, மத்திய அரசால் உயர்த்தப்பட்டதை விடப் பாதிக்கும் குறைவாகவே உயர்த்தியுள்ளது. சன்னரக நெல்லுக்கான ஊக்கத்தொகை ரூ.289 ஆக உயர்த்தப்பட்டிருப்பதாக அரசு பெருமிதம் தெரிவித்துள்ளது. இதனால் விவசாயிகளுக்கு எந்தப் பயனும் இல்லை. அரசால் கொள்முதல் செய்யப்படும் நெல் வகைகளில் 95 விழுக்காட்டுக்கும் கூடுதலான நெல் சாதாரண ரகங்களைச் சேர்ந்தவை ஆகும். அதனால் சாதாரண ரக நெல்லுக்கான கொள்முதல் விலைதான் கூடுதலாக உயர்த்தப்பட வேண்டும்.
அனைவருக்கும் பயனளிக்கக் கூடிய சாதாரண ரக நெல்லுக்கான ஊக்கத்தொகையை வெறும் ரூ.28 மட்டும் உயர்த்தி விட்டு, மிகக் குறைந்த அளவிலேயே கொள்முதல் செய்யப்படும் சன்னரக நெல்லுக்கான ஊக்கத்தொகையை ரூ.133 உயர்த்துவதால் யாருக்கும் எந்தப் பயனும் இல்லை. ஊக்கத்தொகையை உயர்த்தி விட்டோம் என்று கணக்கு காட்டிப் பெருமிதம் பேசுவதற்காக மட்டும்தான் தமிழக அரசின் இந்த அறிவிப்பு பயன்படும்.
மாநில அரசுகளின் ஒப்பீடு:
ஒடிசாவில் கடந்த ஆண்டு ஒரு குவிண்டால் நெல்லுக்கு ரூ.800 வீதமும், கேரளத்தில் ரூ.650 வீதமும் ஊக்கத்தொகை வழங்கப்பட்டது. நடப்பாண்டில் அந்த மாநிலங்களில் ஊக்கத்தொகை இன்னும் கூடுதலாக உயர்த்தப்படலாம். அவற்றுடன் ஒப்பிடும்போது தமிழக அரசால் வழங்கப்படும் ஊக்கத்தொகை மிகவும் குறைவானதாகும்.
ரூ.3,000 கொள்முதல் விலை வழங்கக் கோரிக்கை:
தமிழ்நாட்டில் ஒரு குவிண்டால் நெல் உற்பத்தி செய்ய ரூ.2,300 முதல் ரூ.2,400 வரை செலவாகிறது. அத்துடன் கூடுதலாக ரூ.200 மட்டும் சேர்த்துக் கொள்முதல் விலை நிர்ணயிப்பது எந்த வகையிலும் நியாயம் அல்ல. எனவே, நடப்பாண்டில் சாதாரண வகை நெல்லுக்குக் குவிண்டாலுக்கு ரூ.3,000 கிடைக்கும் வகையில் ஊக்கத்தொகையை ரூ.559 ஆக உயர்த்த வேண்டும். அதேபோல், அடுத்த ஆண்டில் தவெகவின் தேர்தல் அறிக்கையில் வாக்குறுதி அளிக்கப்பட்டவாறு நெல்லுக்கான கொள்முதல் விலையை ரூ.3,500 ஆக உயர்த்த வேண்டும்.
கரும்புக்கு ரூ.4,500 வழங்க வேண்டும்:
கரும்புக்கான கொள்முதல் விலையைப் பொறுத்தவரை 2025-26 அரவைப் பருவத்தில் சர்க்கரை ஆலைகளில் பதிவு செய்து வழங்கப்பட்ட கரும்புக்கு மத்திய அரசால் டன் ஒன்றுக்கு ரூ.3,290.50 கொள்முதல் விலை வழங்கப்பட்டுள்ளது. ஆனால், அரசின் சார்பில் ஊக்கத்தொகை எதுவும் அறிவிக்கப்படவில்லை. அதற்கு முன் 2024-25ஆம் ஆண்டில் கரும்புக்கு வழங்கப்பட்ட ஊக்கத்தொகையான ரூ.349 உடன் கூடுதலாக ரூ.360.50 சேர்த்து ரூ.709.50 வழங்கப்படும் என அறிவிக்கப்பட்டுள்ளது. இதன் மூலம் கரும்புக்கு டன்னுக்கு ரூ.4,000 வழங்கப்படும் எனத் தமிழக அரசு அறிவித்திருக்கிறது. இந்த ஊக்கத்தொகை அறிவிப்பு விவசாயிகளுக்கு முழுமையான மகிழ்ச்சியை அளிக்காது என்றாலும், மனநிறைவு அளிக்கும்.
2026-27ஆம் ஆண்டுக்கான அரவைப் பருவம் வரும் அக்டோபர் மாதம் தொடங்கவுள்ளது. வரும் பருவத்தில் கொள்முதல் செய்யப்படும் கரும்புக்கு மத்திய அரசின் கொள்முதல் விலையாக டன்னுக்கு ரூ.3,383 அறிவிக்கப்பட்டுள்ளது. இத்துடன் கடந்த ஆண்டுக்குத் தமிழக அரசு அறிவித்த ஊக்கத்தொகையைச் சேர்த்தால் டன்னுக்கு ரூ.4,092 கிடைக்கும். கடந்த ஆண்டுக்கான ஊக்கத்தொகையுடன் நடப்பாண்டில் ரூ.408 உயர்த்தி வழங்கினால் கரும்புக்குக் கொள்முதல் விலையாக ரூ.4,500 கிடைக்கும். எனவே வரும் அரவைப் பருவத்தில் கரும்புக்கான கொள்முதல் விலையுடன் மாநில அரசின் ஊக்கத்தொகையாக ரூ.1,117 சேர்த்து வழங்க வேண்டும். அதற்கான அறிவிப்பை இப்போதே வெளியிட வேண்டுமென வலியுறுத்துகிறேன்.
#AnbumaniRamadoss #PMK #FarmersIssue #TamilNaduFarmers #PaddyPrice #SugarcanePrice #TVKGovernment #ThalapathyVijay #TNPolitics #TamilNaduNews #Chennai #AgricultureTN #ViralNewsTN #TrendingTN #LatestNewsTN #TNNewsUpdates
