இலங்கை திறைசேரியிலிருந்து சுமார் 2.5 மில்லியன் அமெரிக்க டாலர் நிதியை இணையவழிக் குற்றவாளிகள் (Cybercriminals) திருடியதாகக் கூறப்படும் சம்பவம் தொடர்பாக, குற்றப் புலனாய்வுத் திணைக்களம் (CID) நீதிமன்றத்தில் உண்மைகளைப் சமர்ப்பித்துள்ளது.

புலனாய்வு முன்னேற்றங்களை ஆய்வு செய்த கொழும்பு கோட்டை நீதவான் நீதிமன்றம், ஐந்து அதிகாரிகளுக்கு வெளிநாட்டுப் பயணத்தடை விதிக்குமாறு CID விடுத்த கோரிக்கைக்கு அனுமதி வழங்கியது. கொழும்பு கோட்டை நீதவான் இசுரு நெத்திகுமார முன்னிலையில் இந்த வழக்கு விசாரணைக்கு எடுத்துக்கொள்ளப்பட்டபோது, இந்த இணையவழிக் குற்றம் தொடர்பான பல முக்கிய தகவல்களை CID வெளிப்படுத்தியது.

விசாரணை அதிகாரியின் வாக்குமூலம்:

“ஆஸ்திரேலியாவுடனான கடன் மறுசீரமைப்பு செயல்முறையைத் தொடர்ந்து, ‘Export Finance Australia’ நிறுவனத்திற்கு செலுத்தப்பட வேண்டிய கடன் தவணைப் பணம், இணையவழிக் குற்றவாளிகளால் திசைதிருப்பப்பட்டுள்ளது.

நீண்டகாலமாக, சம்பந்தப்பட்ட நிறுவனத்தின் உத்தியோகபூர்வ மின்னஞ்சல் முகவரியான ‘exportfinance.gov.au’ மூலமே கடன் திருப்பிச் செலுத்துதல் உள்ளிட்ட நிதிப் பரிமாற்றங்கள் நடைபெற்று வந்தன. இந்த மின்னஞ்சல் மூலம் அனுப்பப்பட்ட விலைப்பட்டியல்களின் (Invoices) அடிப்படையில், வெளிநாட்டு வளங்கள் திணைக்களம் கடன் கொடுப்பனவுகளைச் செயல்படுத்தியது.

2025 அக்டோபர் 28 அன்று, மின்னஞ்சல் முகவரியின் டொமைன் பெயர் (Domain name) மாற்றப்பட்டுள்ளதாக ‘Enable’ நிறுவனம் எச்சரிக்கை விடுத்திருந்தது. இருப்பினும், அந்த எச்சரிக்கையையும் மீறி பணப் பரிமாற்றம் செய்யப்பட்டுள்ளது. உத்தியோகபூர்வ மின்னஞ்சல் ‘exportfinance.gov.au’ ஆகும். ஆனால், இதற்குப் பதிலாக ‘exportfinanceav.com’ என்ற பெயரில் ஒரு போலி டொமைன் உருவாக்கப்பட்டுள்ளது. Enable நிறுவனம் சர்வர் அமைப்பிற்குள் நுழைந்து தரவு பரிசோதனையை நடத்தியது. இதுவரை மேற்கொள்ளப்பட்ட விசாரணைகளின்படி, மின்னஞ்சல் அமைப்பிற்குள் அங்கீகரிக்கப்படாத ஊடுருவல்கள் நடந்ததற்கான ஆதாரங்கள் எதுவும் கிடைக்கவில்லை.”

முக்கிய கண்டுபிடிப்புகள்

• தரவு அழிப்பு: நிதி அமைச்சின் வெளிநாட்டுப் கொடுப்பனவு வசதிகளை வழங்கும் தகவல் தொழில்நுட்ப நிறுவனமான ‘Enable’, வெளிநாட்டு வளங்கள் திணைக்களத்தின் தரவு அமைப்புகளை ஆய்வு செய்தபோது, சில தரவுகள் அழிக்கப்பட்டிருப்பது கண்டறியப்பட்டது. இது திட்டமிட்டு செய்யப்பட்டதா என்பது குறித்து விசாரணைகள் தொடர்கின்றன.

• சட்ட நடவடிக்கை: பொதுச் சொத்துச் சட்டம், கணினி குற்றங்கள் சட்டம் மற்றும் தண்டனைச் சட்டக் கோவை ஆகியவற்றின் கீழ் விரிவான விசாரணைகள் நடத்தப்பட்டு வருகின்றன. இதுவரை சந்தேக நபர்கள் எவரும் அடையாளம் காணப்படவில்லை.

• நிபுணர் குழு: இந்த இணையவழிக் குற்றம் குறித்து தொழில்நுட்ப ரீதியான விசாரணைகளை மேற்கொள்ள ஒரு சிறப்பு நிபுணர் குழுவை நியமிக்க நீதிமன்றம் அனுமதி அளித்துள்ளது. இதில் அரச இரசாயன பகுப்பாய்வு திணைக்களம், இலங்கை கணினி அவசர தயார்நிலை குழு (CERT) மற்றும் கொழும்பு பல்கலைக்கழக கணினி பீடாதிபதி ஆகியோர் இடம்பெறவுள்ளனர்.

நீதிமன்ற உத்தரவு: கட்டாய விடுப்பில் அனுப்பப்பட்டுள்ள ஐந்து அதிகாரிகளின் வங்கி கணக்குகளை ஆய்வு செய்ய நீதவான் அனுமதி வழங்கினார். மேலும், இந்த விசாரணையின் நுணுக்கமான மற்றும் தொழில்நுட்பத் தன்மையைக் கருத்தில் கொண்டு, வழக்கு கோப்பை நீதிமன்றப் பாதுகாப்பகத்தில் (Safe) பாதுகாப்பாக வைக்குமாறு நீதவான் உத்தரவிட்டார்.