டொராண்டோ நகரின் மையப்பகுதியில் (Downtown) நடந்த கொள்ளைச் சம்பவத்தைத் தொடர்ந்து, மூன்று சந்தேக நபர்களை அடையாளம் காண காவல்துறை பொதுமக்களின் உதவியை நாடியுள்ளது.

டொராண்டோ காவல்துறை சேவையின் (Toronto Police Service) தகவலின்படி, ஏப்ரல் 25 அன்று அதிகாலை 4:30 மணியளவில் பே ஸ்ட்ரீட் (Bay Street) மற்றும் அடிலெய்ட் ஸ்ட்ரீட் வெஸ்ட் (Adelaide Street West) பகுதிக்கு அதிகாரிகள் விரைந்தனர்.

சம்பவம் குறித்த விபரங்கள்:

பாதிக்கப்பட்ட நபர் விடுதி (Hotel) ஒன்றில் தங்குவதற்காக வரிசையில் காத்திருந்தபோது, அவருக்கு முன்னால் இருந்த ஒரு குழுவினருடன் ஏற்பட்ட வாய்மொழித் தர்க்கம் பின்னர் உடல்ரீதியான தாக்குதலாக மாறியதாகப் புலனாய்வாளர்கள் தெரிவித்துள்ளனர். இந்த மோதலின் போது, சந்தேக நபர்கள் அந்த நபர் மீது தாக்குதல் நடத்தி, அவரது தனிப்பட்ட சொத்துக்களைத் திருடிக்கொண்டு நடைப்பயணமாகத் தப்பிச் சென்றுள்ளனர்.

சந்தே நபர்களின் விபரங்கள்:

• சந்தேக நபர் 1: 28–35 வயதுடைய ஆண், நடுத்தர உடல்வாகு, கறுப்பு நிறத்திலான சிறிய கூர்மையான தலைமுடி (Spiky hair) மற்றும் சிறிய கறுப்புத் தாடி கொண்டவர். இவர் மார்புப் பகுதியில் “SUPREME” என எழுதப்பட்ட கறுப்பு நிறப் பஃபி ஜாக்கெட் (Puffy jacket), சிவப்பு நிற AMIRI லோகோ கொண்ட கறுப்பு நிற டி-ஷர்ட் மற்றும் நீல நிற ஜீன்ஸ் அணிந்திருந்தார்.

• சந்தேக நபர் 2: 28–35 வயதுடைய ஆண், நடுத்தர உடல்வாகு, சிறிய கறுப்பு நிறச் சுருள் முடி மற்றும் சிறிய கறுப்புத் தாடி கொண்டவர். இவர் வெள்ளை நிற டி-ஷர்ட், கறுப்பு நிற குவாட்டர்-ஜிப் (Quarter-zip) ஸ்வெட்டர், கறுப்பு நிறக் காற்சட்டை மற்றும் வலது காதில் ஒரு கம்மல் அணிந்திருந்தார்.

• சந்தேக நபர் 3: 28–35 வயதுடைய ஆண், மெலிந்த உடல்வாகு, சிறிய கறுப்புத் தாடி கொண்டவர். இவர் “BALENCIAGA” என எழுதப்பட்ட கறுப்பு நிற டி-ஷர்ட், வெள்ளை அல்லது சாம்பல் நிற ஹூடி (Hoodie), கிழிந்த சாம்பல் நிற ஜீன்ஸ், வெள்ளை நிற காலணி மற்றும் மெல்லிய உலோகச் சட்டமிட்ட கண்ணாடி அணிந்திருந்தார்.

விசாரணையின் ஒரு பகுதியாக சந்தேக நபர்களின் புகைப்படங்கள் வெளியிடப்பட்டுள்ளன. இது குறித்து ஏதேனும் தகவல் தெரிந்தவர்கள் 416-808-1400 என்ற எண்ணில் காவல்துறையைத் தொடர்பு கொள்ளுமாறு கேட்டுக்கொள்ளப்படுகிறார்கள்.