ராணிப்பேட்டை
சோளிங்கரில் செய்தி சேகரிக்கச் சென்ற செய்தியாளர்களைக் கடுமையாகத் தாக்கியதாகத் தவெக சட்டமன்ற உறுப்பினர் கபில், அவரது சகோதரர் உள்ளிட்டோர் மீது காவல்துறை அதிரடியாக வழக்குப்பதிவு செய்துள்ளது.
முதல்வர் படத்தால் வெடித்த சர்ச்சை:
கடந்த ஜூலை 23-ஆம் தேதி ராணிப்பேட்டை மாவட்டம் சோளிங்கரில், தவெக தலைவரும் முதலமைச்சருமான விஜய் நடித்த ‘ஜனநாயகன்’ திரைப்படம் வெளியானது. படத்தைப் பார்த்துவிட்டு வந்த சோளிங்கர் தொகுதி எம்.எல்.ஏ கபிலிடம், சிவா என்ற யூடியூப் செய்தியாளர் கேள்வி எழுப்பிய போது, அவரை எம்.எல்.ஏ தாக்கப் பாய்வது போன்ற வீடியோ சமூக வலைதளங்களில் வெளியாகிப் பெரும் சர்ச்சையானது. பின்னர், ‘எம்.எல்.ஏ விளையாட்டாகத்தான் அப்படிச் செய்தார்’ என சிவா ஒரு விளக்க வீடியோவை வெளியிட்டார்.
அலுவலகத்திற்கு வரவழைத்துக் கொடூரத் தாக்குதல்:
இந்த விளக்க வீடியோவை யூடியூப் சேனலிலும் பதிவிடுமாறு எம்.எல்.ஏ கபில் மற்றும் அவரது சகோதரர் தனஞ்செழியன் சிவாவை வற்புறுத்தியுள்ளனர். மேலும், அவரைத் தங்கள் அலுவலகத்திற்கு வரவழைத்துக் கடுமையாகத் தாக்கியுள்ளனர். இதையறிந்து சம்பவ இடத்திற்குச் சென்ற செய்தியாளர்கள் அரங்கநாதன், கல்யாண சுந்தரம் ஆகியோர் இதனை வீடியோ எடுத்ததால் ஆத்திரமடைந்த கபில் தரப்பினர், அவர்களையும் சரமாரியாகத் தாக்கிச் செல்போன்களைப் பறித்து வீடியோக்களை அழித்துள்ளனர். படுகாயமடைந்த இரு செய்தியாளர்களும் மீட்கப்பட்டு அரசு மருத்துவமனையின் அவசரச் சிகிச்சைப் பிரிவில் அனுமதிக்கப்பட்டுள்ளனர்.
சாலை மறியல் & போலீஸ் அதிரடி வழக்குப்பதிவு:
இந்தக் கொடூரத் தாக்குதலைக் கண்டித்தும், செய்தியாளர்களுக்கு உரியப் பாதுகாப்பு வழங்கக் கோரியும் பத்திரிகையாளர்கள், உறவினர்கள் மற்றும் பொதுமக்கள் என 100-க்கும் மேற்பட்டோர் சோளிங்கர் பகுதியில் மாபெரும் சாலை மறியலில் ஈடுபட்டனர். விரைந்து வந்த போலீசார் பேச்சுவார்த்தை நடத்திப் போராட்டத்தைக் கலைத்தனர். இந்நிலையில், செய்தியாளர்களைத் தாக்கிய விவகாரத்தில் தவெக எம்.எல்.ஏ கபில், அவரது சகோதரர் தனஞ்செழியன் உள்ளிட்டோர் மீது சோளிங்கர் போலீசார் தற்போது 3 பிரிவுகளின் கீழ் அதிரடியாக வழக்குப்பதிவு செய்து விசாரணையைத் தீவிரப்படுத்தியுள்ளனர்.
#TVKMLAKapil #SholinghurMLA #TVKGovernment #JournalistsAttacked #RanipetNews #Sholinghur #ChiefMinisterVijay #JosephVijay #ThalapathyVijay #JananaayaganMovie #TamilNaduNews #TNPolitics #ViralNewsTN #TrendingTN #LatestNewsTN #TNNewsUpdates
