சென்னை
தமிழ்நாடு சட்டப்பேரவையில் பட்ஜெட் மற்றும் வேளாண் பட்ஜெட் மீதான விவாதம் நடைபெற்றபோது, திமுக முன்னாள் அமைச்சரும் எம்.எல்.ஏ.வுமான எம்.ஆர்.கே.பன்னீர்செல்வம் மற்றும் அமைச்சர் ரமேஷ் இடையேயான காரசாரமான விவாதமும், அதனைத் தொடர்ந்து நடைபெற்ற நகைச்சுவையான உரையாடலும் சட்டமன்றத்தில் பெரும் சிரிப்பலையை ஏற்படுத்தியது.
விவசாயிகள் ஏமாற்றம் – எம்.ஆர்.கே.பன்னீர்செல்வம்:
சட்டப்பேரவையில் விவாதத்தில் கலந்துகொண்டு பேசிய திமுக முன்னாள் அமைச்சர் எம்.ஆர்.கே.பன்னீர்செல்வம், “விவசாயிகளின் பயிர்க்கடன் முழுமையாகத் தள்ளுபடி செய்யப்படும் என எதிர்பார்க்கப்பட்ட நிலையில், அது செய்யப்படவில்லை. இதனால் ஆட்சி மாற்றம் வரும் என நினைத்த விவசாயிகளுக்குப் பெருத்த ஏமாற்றம்தான் மிஞ்சியுள்ளது,” எனத் தெரிவித்தார்.
அமைச்சர் ரமேஷ் பதிலடி:
இதற்குப் பதிலளித்து இந்து சமய அறநிலையத்துறை அமைச்சர் ரமேஷ் பேசுகையில், “கடந்த திமுக ஆட்சியில் ரூ.309 கோடியில் நெல் சேமிப்புக் கிடங்குகள் அமைக்கப்படும் என்று அறிவிக்கப்பட்டதே, அது என்ன ஆனது? எம்.ஆர்.கே. பன்னீர்செல்வம் தற்போது வெறும் திரைக்கதை, வசனம் மட்டுமே பேசி வருகிறார். கடந்த ஆட்சியில் விவசாயிகளுக்கு நெல்லைச் சேமித்து வைக்கக் கூட இடமில்லாத பரிதாப நிலைதான் இருந்தது. நெல் கொள்முதலில் கூட பல்வேறு முறைகேடுகள் நடைபெற்றதாக விவசாயிகள் தெரிவித்தனர். கரும்புத் தோட்டத்தில் கான்கிரீட் போட்டு நடந்து சென்ற விவசாயி விவகாரம் குறித்தும் அவர் இப்போது எதுவும் கூறவில்லையே,” எனத் கடுமையாக விமர்சித்தார்.
“சாமி அமைச்சரைப் பார்த்தாலே தெரிகிறது!” – எம்.ஆர்.கே. பன்னீர்செல்வம் கிண்டல்:
அமைச்சரின் பேச்சுக்குத் தொடர்ந்து பதிலளித்துப் பேசிய எம்.ஆர்.கே. பன்னீர்செல்வம், “தமிழக வெற்றிக் கழகம் எப்படித்தான் ஆட்சிக்கு வந்தது என்பது, இந்தச் ‘சாமி அமைச்சரைப்’ பார்த்தாலே நன்றாகத் தெரிகிறது,” என்றார். இந்து சமய அறநிலையத்துறை அமைச்சரான ரமேஷைச் ‘சாமி அமைச்சர்’ என்று அவர் கிண்டலாகக் குறிப்பிட்டதைக் கேட்டதும், அவையில் அமர்ந்திருந்த முதலமைச்சர் ச.ஜோசப் விஜய் குலுங்கி குலுங்கிச் சிரித்தார்.
திரைப்படம் பார்த்தவர்கள் vs கொள்கைக்காகப் போராடியவர்கள்:
தொடர்ந்து பேசிய எம்.ஆர்.கே. பன்னீர்செல்வம், “இப்போதுதான் தவெகவினர் எப்படிப் பிரச்சாரம் செய்கிறார்கள் என்பதன் டெக்னிக் எனக்குப் புரிகிறது. அவர் பேசுவது உண்மையா? பொய்யா? என்று யாருக்கும் தெரியாதவாறு மிகவும் டெக்னிக்காகப் பேசுகிறார். நீங்களெல்லாம் சினிமா படத்தைப் பார்த்துவிட்டு அரசியலுக்கு வந்தவர்கள். ஆனால், நாங்களும் அதிமுகவினரும் கொள்கையைப் படித்து, பல ஆண்டுகளாகக் களத்தில் போராடி அரசியலுக்கு வந்தவர்கள். திமுக ஆட்சியில் எப்போதுமே ‘ஆக்டிங்’ கிடையாது; ‘ஆக்ஷன்’ மட்டுமே இருந்தது. தவெக எப்படி ஆட்சிக்கு வந்தது என்பதற்கான டெக்னிக் இந்த அமைச்சரின் பேச்சைப் பார்த்தாலே தெரிகிறது,” என்று நக்கல் அடித்தார்.
அமைச்சரின் கலகலப்பான பதில்:
இதற்குச் சற்றும் தாமதிக்காமல் பதிலளித்த அமைச்சர் ரமேஷ், “அந்த டெக்னிக்கை நான் வேறு எங்கிருந்தும் கற்றுக்கொள்ளவில்லை; இன்றைக்குச் சபைக்கு வருவதற்கு முன்பு, சரியாக 10 நிமிடங்களுக்கு முன்புதான் அண்ணன் எம்.ஆர்.கே. பன்னீர்செல்வத்திடமிருந்து இதைக் கற்றுக்கொண்டேன்,” எனத் தெரிவித்தார். அமைச்சரின் இந்த நகைச்சுவையான பதிலைக் கேட்டதும் ஒட்டுமொத்தச் சட்டமன்ற அவையும் சிரிப்பலையில் அதிர்ந்தது.
#MRKPanneerselvam #MinisterRamesh #ChiefMinisterVijay #ThalapathyVijay #TVKGovernment #TNAssembly #DMK #TamilNaduNews #Chennai #TNPolitics #ViralNewsTN #TrendingTN #LatestNewsTN #TNNewsUpdates
