செங்கல்பட்டு:

மதுராந்தகம் மற்றும் தாராபுரம் சட்டமன்ற இடைத்தேர்தல்களில் போட்டியிடும் ஆளும் தவெக வேட்பாளர்கள் தோற்கடிக்கப்பட வேண்டும் என மார்க்சிஸ்ட் கம்யூனிஸ்ட் கட்சியின் மாநிலச் செயலாளர் பெ.சண்முகம் தெரிவித்துள்ளார்.

செங்கல்பட்டு மாவட்டம் மதுராந்தகம் சட்டமன்றத் தொகுதி இடைத்தேர்தலில் போட்டியிடும் மார்க்சிஸ்ட் கம்யூனிஸ்ட் கட்சி வேட்பாளர் சுகந்தியை ஆதரித்து, மேலவளம்பேட்டை பகுதியில் அக்கட்சியின் மாநிலச் செயலாளர் பெ.சண்முகம் தீவிர தேர்தல் பிரச்சாரத்தில் ஈடுபட்டார். பின்னர் செய்தியாளர்களைச் சந்தித்த அவர் கூறியதாவது:

மக்களுக்கு இழைக்கப்பட்ட துரோகம்:

“மதுராந்தகம் இடைத்தேர்தல் இயல்பாக வந்தது அல்ல. கடந்த சட்டமன்றத் தேர்தலில் தேர்ந்தெடுக்கப்பட்ட சட்டமன்ற உறுப்பினர் பதவியை ராஜினாமா செய்துவிட்டு, தவெகவில் இணைந்ததன் விளைவாக தொகுதி மக்கள் மீது இந்த இடைத்தேர்தல் திணிக்கப்பட்டுள்ளது. அதிமுகவின் அரசியல் நிலைப்பாட்டில் உடன்பாடு இல்லையென்றால், அக்கட்சியிலிருந்து விலகி சுயேச்சை சட்டமன்ற உறுப்பினராகச் செயல்பட்டிருக்க முடியும்; அதற்காகப் பதவியை ராஜினாமா செய்யவேண்டிய அவசியம் இல்லை.

தேர்ந்தெடுக்கப்பட்ட 20 நாட்களுக்குள் பதவியை ராஜினாமா செய்திருப்பது பொறுப்பற்ற செயல்; தன்னை நம்பி வாக்களித்த மக்களுக்கு இழைக்கப்பட்ட துரோகம். எதற்காகப் பதவியை ராஜினாமா செய்து கட்சி மாறினார்? மீண்டும் அதே தொகுதியில் எதற்காகப் போட்டியிடுகிறார்? என்ற கேள்விகளை மதுராந்தகம் தொகுதி மக்கள் எழுப்ப வேண்டிய நிலை ஏற்பட்டுள்ளது.

தவெகவிற்கு ஆதரவு கிடையாது:

இதுபோன்ற செயல்களுக்குத் தேர்தல் மூலம் மக்கள் ஆதரவு அளித்தால், எதிர்காலத்தில் தேர்ந்தெடுக்கப்படும் பிரதிநிதிகள் குறுகிய காலத்திலேயே பதவியை ராஜினாமா செய்து, மீண்டும் வேறு கட்சி சார்பில் தேர்தலில் போட்டியிடுவதற்கு அது வழிவகுக்கும். மதுராந்தகம் தொகுதியில் தவெக சார்பில் போட்டியிடும் வேட்பாளருக்கு இடதுசாரிகள் ஆதரவு அளிக்க முடியாது.

கடந்த தேர்தலில் தவெக அதிக இடங்களில் வெற்றி பெற்றதன் அடிப்படையில் அவர்கள் ஆட்சியமைக்க இடதுசாரிகள் ஆதரவு அளித்துள்ளனர்; அந்த ஆதரவு நீடிக்கிறது. ஆனால், வேறு கட்சியிலிருந்து வந்தவர்களைத் தவெகவில் இணைத்துக்கொண்டு மீண்டும் அவர்களையே தேர்தலில் போட்டியிட அனுமதித்துள்ளவர்களுக்கு ஆதரவாக வாக்கு கேட்பதில் எங்களுக்கு உடன்பாடு இல்லை. பாமக போலத் தேர்தலைப் புறக்கணிக்காமல், திமுகவுடன் இணைந்து போட்டியிட முடியாத சூழலில் இடதுசாரிகள் தனித்துப் போட்டியிடும் முடிவை எடுத்துள்ளனர். மதுராந்தகத்தில் சிபிஎம் வேட்பாளர் சுகந்திக்கும், தாராபுரத்தில் சிபிஐ வேட்பாளர் லட்சுமணனுக்கும் மக்கள் ஆதரவளிக்க வேண்டும்; தவெக வேட்பாளர்கள் தோற்கடிக்கப்பட வேண்டும்.

தலைமைத் தேர்தல் ஆணையரை நீக்குக:

நாட்டின் பல்வேறு பகுதிகளில் மேற்கொள்ளப்பட்டு வரும் சிறப்பு தீவிர வாக்காளர் பட்டியல் திருத்தப் பணிகளில் (SIR) இதுவரை 15 கோடிக்கும் மேற்பட்ட வாக்காளர்கள் நீக்கப்பட்டுள்ளனர். தலைமைத் தேர்தல் ஆணையர் ஞானேஷ்குமார் தன்னிச்சையாகச் செயல்பட்டதாக மற்ற இரண்டு ஆணையர்களே தெரிவித்துள்ளனர். தன்னாட்சி அதிகாரம் பெற்ற தேர்தல் ஆணையத்தை மத்திய அரசின் கைப்பாவையாக மாற்றிய குற்றத்துக்காக ஞானேஷ்குமார் உடனடியாகப் பதவியிலிருந்து நீக்கப்பட வேண்டும். உச்ச நீதிமன்ற வழிகாட்டுதலின்படி பிரதமர், எதிர்க்கட்சித் தலைவர், உச்ச நீதிமன்றத் தலைமை நீதிபதி அடங்கிய குழுவே தேர்தல் ஆணையர்களை நியமிக்க வேண்டும்\” என்று சண்முகம் தெரிவித்தார்.

#CPIM #PShanmugam #ByElection2026 #Maduranthakam #Dharapuram #SuganthiCPIM #TVKGovt #GyaneshKumar #ElectionCommission #TNPolitics #BmNews #TamilNews #BreakingNewsTN #TamilNaduNews #LatestNews #TamilNewsLive