வாஷிங்டனில் நடைபெற்ற ‘செமாஃபோர் உலகப் பொருளாதார உச்சிமாநாட்டில்’ (Semaphore World Economy summit) உரையாற்றிய அமெரிக்க வர்த்தகச் செயலாளர் ஹோவர்ட் லட்னிக், சீனாவுடனான கனடாவின் அதிகரித்து வரும் வர்த்தக உறவைக் கடுமையாக விமர்சித்துள்ளார். கனடாவின் வர்த்தக உத்தி குறித்துப் பேசுகையில், “அவர்கள் மிகவும் மோசமாகச் செயல்படுகிறார்கள்” (They suck) என்று அவர் குறிப்பிட்டார்.
அமெரிக்காவிற்கு அழுத்தம் அதிகரிக்கும் என்பதால் வர்த்தகப் பேச்சுவார்த்தைகளில் காலம் கனடாவின் பக்கம் இருப்பதாகக் கனடாவின் முன்னாள் தலைமைப் பேச்சுவார்த்தையாளர் ஸ்டீவ் வெர்ஹீல் கூறியிருந்தார். இதற்குப் பதிலளித்த லட்னிக், “இது நான் கேள்விப்பட்டதிலேயே மிக மோசமான உத்தி” என்றும், அமெரிக்காவே “உலகின் மிகப்பெரிய நுகர்வோர்” என்றும் கூறினார்.
கனடா பிரதமர் மார்க் கார்னி அமெரிக்காவுடன் சிக்கல்களைக் கொண்டிருப்பதாகக் குறிப்பிட்ட லட்னிக், அவர் சீனாவுக்குச் சென்று அந்நாட்டுடன் வர்த்தகத் தொடர்புகளை மேற்கொள்வதை விமர்சித்தார். “சீனப் பொருளாதாரம் கனடாவின் பொருட்களை வாங்கும் என்று அவர் நினைக்கிறாரா? சீனா முற்றிலும் ஏற்றுமதியை மட்டுமே நம்பியிருக்கும் ஒரு பொருளாதாரம்” என்று அவர் கூறினார்.
சீனாவிடமிருந்து மின்சாரக் கார்களைப் பெற்றுக்கொள்ள கனடா சம்மதித்திருப்பது “பைத்தியக்காரத்தனம்” என்றும் அவர் வர்ணித்தார்.
கனடா-அமெரிக்கா-மெக்ஸிகோ இடையிலான வர்த்தக ஒப்பந்தம் (CUSMA) தொடர்பான பேச்சுவார்த்தைகள் ஜூலை 1-ஆம் தேதிக்குள் முடிவடையும் என்று தான் எதிர்பார்க்கவில்லை என அமெரிக்க வர்த்தகப் பிரதிநிதி ஜேமிசன் கிரீர் ஏற்கனவே தெரிவித்திருந்தார்.
கனடா-அமெரிக்க வர்த்தக அமைச்சர் டொமினிக் லெப்லாங்க் நாடாளுமன்றக் குழுவிடம் பேசுகையில், கனடியப் பொருளாதாரத்திற்குச் சாதகமான ஒரு ஒப்பந்தத்தில் விரைவாகக் கையெழுத்திடத் தயாராக இருப்பதாகத் தெரிவித்தார்.
“அமெரிக்கப் பொருளாதாரத்திற்குத் தேவையான பல விஷயங்கள் எங்களிடம் உள்ளன. எனவே நாம் ஒரு உடன்பாட்டை எட்டுவோம் என்பதில் நான் நம்பிக்கையுடன் இருக்கிறேன்,” என்று அவர் கூறினார்.
