வடமராட்சி கிழக்கு, அம்பன் பகுதியில் இடம்பெற்ற பாரிய வாகன விபத்தொன்றில், வாகனத்தில் பயணித்தவர்கள் எவ்வித காயங்களுமின்றி அதிர்ஷ்டவசமாக உயிர் தப்பியுள்ளனர்.
அம்பன் பகுதியில் இன்று பகல் குறித்த வாகனம் பயணித்துக்கொண்டிருந்த போது, முன்னால் சென்ற மற்றொரு வாகனத்தை முந்திச் செல்ல (Overtake) முயன்றுள்ளது. இதன்போது, சாரதியின் கட்டுப்பாட்டை இழந்த வாகனம், அதிவேகமாகச் சென்று வீதியோரத்திலிருந்த மின்கம்பத்துடன் மோதி விபத்துக்குள்ளானது.
மின்கம்பத்துடன் மோதிய வேகத்தில் வாகனம் பலத்த சேதங்களுக்கு உள்ளாகி, அதன் முன்பகுதி முழுமையாக நசுங்கியுள்ளது.
விபத்தின் தாக்கத்தினால் மின் கம்பம் உடைந்து சேதமடைந்துள்ளது. இதனால் அப்பகுதிக்கான மின்சார விநியோகம் தற்காலிகமாகத் துண்டிக்கப்பட்டுள்ளது.
வாகனம் மிகக் கடுமையாகச் சேதமடைந்த போதிலும், அதற்குள் பயணித்தவர்கள் எவ்வித பாரிய காயங்களுமின்றி உயிர் தப்பியமை பெரும் ஆச்சரியத்தை ஏற்படுத்தியுள்ளது.
சம்பவம் தொடர்பாகத் தகவல் அறிந்த பொலிஸார், மேலதிக விசாரணைகளை மேற்கொண்டு வருகின்றனர். குறுகிய வீதிகளில் அதிவேகமாக வாகனங்களை முந்திச் செல்ல முற்படுவதே இவ்வாறான விபத்துகளுக்கு முதன்மைக் காரணம் எனச் சமூக ஆர்வலர்கள் சுட்டிக்காட்டியுள்ளனர்.
